పద్మభూషణ్‌, పద్మశ్రీ పురస్కారాల గ్రహీతలకు సీఎం రేవంత్ రెడ్డి అభినందనలు

హైదరాబాద్, జనవరి 25 (ప్రజా మంటలు):

2026 సంవత్సరానికి గాను కేంద్ర ప్రభుత్వం ప్రకటించిన పద్మభూషణ్‌, పద్మశ్రీ పురస్కారాలకు తెలంగాణ, ఆంధ్రప్రదేశ్ రాష్ట్రాల నుంచి ఎంపికైన ప్రముఖులకు ముఖ్యమంత్రి . రేవంత్ రెడ్డి  హృదయపూర్వక అభినందనలు తెలిపారు.

సేవ, శాస్త్ర–సాంకేతికం, వైద్యం, విద్య, సాహిత్యం, కళల రంగాల్లో వారు అందించిన విశిష్ట సేవలకు గుర్తింపుగా ఈ ప్రతిష్ఠాత్మక పురస్కారాలు లభించాయని ముఖ్యమంత్రి పేర్కొన్నారు.

🔹 పద్మభూషణ్ పురస్కారం

• డా. నోరి దత్తాత్రేయుడు – రాష్ట్ర ప్రభుత్వ సలహాదారు, ప్రముఖ క్యాన్సర్ వ్యాధి నిపుణులు

🔹 పద్మశ్రీ పురస్కారాలు

సైన్స్ & టెక్నాలజీ రంగం

• గడ్డమానుగు చంద్ర మౌళి
• కృష్ణమూర్తి బాలసుబ్రహ్మణ్యన్
• కుమారస్వామి తంగరాజ్

వైద్య రంగం

• గూడూరు వెంకట్ రావు
• పాల్కొండ విజయానంద్ రెడ్డి

పశుసంవర్ధక రంగం

• మామిడి రామా రెడ్డి (మరణానంతరం)

విద్య – సాహిత్య రంగాలు

• మామిడాల జగదీశ్ కుమార్
• వెంపటి శశిశేఖర్
• వెంపటి కుటుంబ శాస్త్రి

కళల రంగం

• కూచిపూడి నృత్య కళాకారిణి దీపికా రెడ్డి
• ప్రముఖ నటులు మురళీ మోహన్, రాజేంద్ర ప్రసాద్
• సంగీత విద్వాంసులు గరిమెళ్ల బాలకృష్ణ ప్రసాద్

🔹 త్వరలో ఘన సన్మానం

ప్రస్తుతం అమెరికా పర్యటనలో ఉన్న ముఖ్యమంత్రి రేవంత్ రెడ్డి గారు పర్యటన ముగించుకొని రాష్ట్రానికి తిరిగివచ్చిన అనంతరం, పద్మ పురస్కార గ్రహీతలను ఘనంగా సన్మానించనున్నట్లు వెల్లడించారు. గతంలో మాజీ ఉపరాష్ట్రపతి ఎం. వెంకయ్య నాయుడు, మెగాస్టార్ చిరంజీవి వంటి వారిని శిల్పకళా వేదికలో సన్మానించినట్టే ఈ ఏడాదీ ప్రత్యేక కార్యక్రమం నిర్వహిస్తామని తెలిపారు.

కెటిఆర్ అభినందనలు

సైన్స్ అండ్ ఇంజినీరింగ్ విభాగంలో విశేష పరిశోధనలు చేసిన గడ్డమానుగు చంద్ర మౌళి, కృష్ణమూర్తి బాలసుబ్రహ్మణియన్, కుమారస్వామి తంగరాజ్లకు పద్మశ్రీ పురస్కారాలు లభించడం వారి మేధస్సుకు దక్కిన గౌరవమని బీఆర్ఎస్ నేత కేటీఆర్ ప్రశంసించారు.

అలాగే వైద్య రంగంలో సామాన్యులకు అత్యాధునిక చికిత్సలను అందుబాటులోకి తీసుకొచ్చిన ప్రముఖ సర్జన్ గూడూరు వెంకట్ రావు, క్యాన్సర్ నిపుణులు పాల్కొండ విజయానంద్ రెడ్డిలకు ఈ అత్యున్నత గౌరవం దక్కడం ఆనందకరమని తెలిపారు.

కూచిపూడి నృత్య కళాకారిణి దీపికా రెడ్డి నృత్య రంగంలో చేసిన అద్భుత ప్రదర్శనలకు గానూ పద్మశ్రీ లభించిందని గుర్తుచేశారు. అలాగే పశుసంవర్ధక రంగంలో నిస్వార్థ సేవలు అందించిన మామిడి రామా రెడ్డికి మరణానంతరం పద్మశ్రీ ప్రకటించడం ఆయన సేవలకు దక్కిన నిజమైన గుర్తింపని కేటీఆర్ వ్యాఖ్యానించారు.