గుంపుమేస్త్రికి ప్రధాన గూఢచారి సంతోష్ రావు : జాగృతి నేత కవిత తీవ్ర ఆరోపణలు

హైదరాబాద్, జనవరి 27 (ప్రజా మంటలు):

బీఆర్ఎస్ అధినేత కేసీఆర్ గారిని ఉద్యమకారులు, అమరవీరుల కుటుంబాల నుంచి దూరం చేయడానికి ప్రధాన కారణం సంతోష్ రావేనని జాగృతి నేత తీవ్ర ఆరోపణలు చేశారు. గుంపుమేస్త్రికి ప్రధాన గూఢచారిగా వ్యవహరిస్తూ కేసీఆర్ వ్యక్తిగత విషయాల వరకూ సమాచారాన్ని చేరవేసిన వ్యక్తి సంతోష్ రావేనని విమర్శించారు.

కేసీఆర్ ఫార్మ్ హౌస్‌లో ఇడ్లి తిన్నారా? సగం తిన్నారా? అనే స్థాయి సమాచారం కూడా గుంపుమేస్త్రికి చేరేలా చేసిన వ్యక్తి ఆయనేనని అన్నారు. గద్దర్ లాంటి ఉద్యమ నాయకులు గంటల తరబడి గేట్ల బయట వేచి ఉండే పరిస్థితి రావడానికి, ఈటల రాజేందర్ వంటి నేతలు కూడా బయటకు రాలేకపోవడానికి సంతోష్ రావే కారణమని ఆరోపించారు.

సంతోష్ రావును సిట్ విచారణకు పిలవటం మంచిదేనని, అయితే రాజకీయ ఒత్తిళ్ల కారణంగా ఆయనకు శిక్ష పడే అవకాశాలు అనుమానంగానే ఉన్నాయని పేర్కొన్నారు. నిజంగా పోలీసులు చట్టప్రకారం, రాజకీయ ఒత్తిళ్లకు లొంగకుండా పని చేస్తే కచ్చితంగా శిక్ష పడుతుందని స్పష్టం చేశారు.

ఇలాంటి వ్యక్తికి కేటీఆర్, హరీష్ రావులు ఎందుకు వత్తాసు పలుకుతున్నారో అర్థం కావడం లేదని ప్రశ్నించారు. గతంలో తాను ప్రస్తావించిన “దయ్యాల్లో మొదటి దయ్యం” సంతోష్ రావేనని వ్యాఖ్యానించారు.

డ్రాగ్ మాఫియా దాడిలో గాయపడ్డ సౌమ్యకు అండగా ఉంటాం

ఇక డ్రగ్స్, గంజాయి మాఫియాపై కూడా జాగృతి నేత తీవ్ర ఆగ్రహం వ్యక్తం చేశారు. నిజామాబాద్‌కు చెందిన ఎక్సైజ్ కానిస్టేబుల్ సౌమ్య గారి కుటుంబాన్ని పరామర్శించినట్లు తెలిపారు. ఆమె పరిస్థితి ఇంకా క్రిటికల్‌గా ఉన్నప్పటికీ కొంత మెరుగుదల ఉందన్నారు.

ఒక ఎక్సైజ్ కానిస్టేబుల్‌ను చంపే స్థాయికి గంజాయి ముఠాలు వెళ్లాయంటే ప్రభుత్వానికి వారి మీద ఎంతమాత్రం భయం లేదని స్పష్టమవుతోందని విమర్శించారు. డ్రగ్స్, గంజాయి ఫ్రీ తెలంగాణ చేస్తామని హామీ ఇచ్చిన ప్రభుత్వం పూర్తిగా విఫలమైందని ఆరోపించారు.

గ్రామాల్లోనే కాకుండా పాఠశాలల వరకూ డ్రగ్స్, గంజాయి చేరుతున్నాయని, దీని వల్ల మహిళలు, పిల్లలు తీవ్రంగా నష్టపోతున్నారని ఆందోళన వ్యక్తం చేశారు. గృహహింస ఘటనలకు కూడా మత్తు పదార్థాలే కారణమవుతున్నాయని అన్నారు.

డ్రగ్స్, గంజాయి మాఫియాను అరికట్టేందుకు ఎక్సైజ్, ఫారెస్ట్ సిబ్బందికి ఆయుధాలు ఇవ్వాలని, వారికి తగిన రక్షణ కల్పించాలని ప్రభుత్వాన్ని డిమాండ్ చేశారు. జాగృతి కార్యకర్తలు, నాయకులు ఈ మహమ్మారిపై పోరాటానికి సిద్ధమవాలని పిలుపునిచ్చారు.

డ్రగ్స్, గంజాయి ముఠాల సమాచారం తెలిసిన వెంటనే పోలీసులకు తెలియజేయాలని ప్రజలను కోరారు. సౌమ్య గారి కుటుంబానికి జాగృతి తరఫున పూర్తి అండగా ఉంటామని హామీ ఇచ్చారు.