కాంగ్రెస్ ప్రభుత్వం ఆరు గ్యారంటీలను మరిచిపోయింది - కవిత

కొత్తగూడెం డిసెంబర్ 18 :ప్రజా మంటలు)::
తెలంగాణ జాగృతి జనంబాట కార్యక్రమంలో భాగంగా జాగృతి అధ్యక్షురాలు కల్వకుంట్ల కవిత కొత్తగూడెం జిల్లాలో విస్తృతంగా పర్యటించారు. రెండు రోజుల పాటు జిల్లాలో ప్రజల సమస్యలను తెలుసుకొని, బాధితులతో నేరుగా మాట్లాడి పరిష్కార దిశగా పోరాటం చేస్తామని స్పష్టం చేశారు.

ఇల్లందు: దర్గా–ఆలయ సందర్శన, మత సామరస్యానికి నిదర్శనం

ఇల్లందు మండలం సత్యనారాయణపురంలోని హజ్రత్ నాగూల్ మీరా దర్గాను సందర్శించిన కవిత ప్రత్యేక ప్రార్థనలు నిర్వహించారు. ఈ సందర్భంగా మాట్లాడుతూ, దర్గా విషయంలో ఫారెస్ట్ డిపార్ట్‌మెంట్ తీవ్ర ఇబ్బందులు పెడుతోందని ఆరోపించారు. ఉర్సు సందర్భంగా వేలాది మంది భక్తులు వస్తున్నప్పటికీ కనీస సౌకర్యాలు కల్పించడం లేదన్నారు.
దర్గా పక్కనే రాముల వారి ఆలయం ఉండటం హిందూ–ముస్లిం ఐక్యతకు చక్కని ఉదాహరణగా పేర్కొన్నారు. శాశ్వత నిర్మాణాలకు అనుమతులు ఇవ్వాలని, మహిళలకు ప్రత్యేక సౌకర్యాలు కల్పించాలని, మిషన్ భగీరథ ద్వారా నీటి సదుపాయం కల్పించాలని మంత్రులను డిమాండ్ చేశారు.

సర్పంచ్ ఎన్నికలపై వ్యాఖ్యలు

సర్పంచ్ ఎన్నికల్లో గుర్తులు లేనప్పుడు పార్టీలు గొప్పలు చెప్పుకోవడం అనవసరమని కవిత వ్యాఖ్యానించారు. గ్రామస్తులు పరిచయాలు, పనితీరు ఆధారంగా ఓటేస్తారని తెలిపారు. ఎన్నికల అనంతరం అయినా గ్రామాల్లో మౌలిక వసతులు కల్పించాలని, లేదంటే ప్రజల ఆగ్రహాన్ని ఎదుర్కోవాల్సి వస్తుందని హెచ్చరించారు.

కాంగ్రెస్ హామీలపై విమర్శ

కాంగ్రెస్ ప్రభుత్వం ఆరు గ్యారంటీలను మరిచిపోయిందని కవిత విమర్శించారు. మహిళలకు రూ.2,500 హామీ, పెన్షన్ల పెంపు, ఉచిత కరెంట్ వంటి హామీలు అమలు కాలేదన్నారు. భర్త చనిపోయిన మహిళలకు పదేళ్లుగా పెన్షన్లు రావడం లేదని ఆవేదన వ్యక్తం చేశారు.

కొత్తగూడెం: జాగృతి జెండా ఆవిష్కరణ

కొత్తగూడెం ఎంజీ రోడ్డులోని మార్కెట్‌లో జాగృతి నియోజకవర్గ ఇన్‌చార్జ్ జగదీశ్ ఆధ్వర్యంలో ఏర్పాటు చేసిన తెలంగాణ జాగృతి జెండాను కవిత ఆవిష్కరించారు. ప్రజాస్వామ్య విలువలు రాష్ట్రంలో ప్రమాదంలో పడ్డాయని, పార్టీ మారిన ఎమ్మెల్యేల విషయంలో స్పీకర్ తీర్పు రాజ్యాంగ విరుద్ధమని విమర్శించారు.

తాను బీఆర్ఎస్ నుంచి బయటకు వచ్చిన వెంటనే ఎమ్మెల్సీ పదవికి రాజీనామా చేసినప్పటికీ ఇప్పటివరకు దానిపై చర్యలు తీసుకోలేదని పేర్కొన్నారు.

సింగరేణి అంశంపై తీవ్ర ఆందోళన

సింగరేణిని ప్రైవేట్‌కు అప్పగించే కుట్ర జరుగుతోందని ఆరోపించారు. డిపెండెంట్ ఉద్యోగాల్లో తీవ్ర అన్యాయం జరుగుతోందని, సింగరేణి హాస్పిటల్, స్కూల్ వ్యవస్థను వెంటనే మెరుగుపరచాలని డిమాండ్ చేశారు. సింగరేణి కార్మికుల కోసం నిరంతరం పోరాటం కొనసాగిస్తామని స్పష్టం చేశారు.

కొత్తగూడెం ప్రభుత్వ ఆసుపత్రి సందర్శన

కొత్తగూడెం ప్రభుత్వ సర్వజనీన ఆసుపత్రిని సందర్శించిన కవిత, రోగులు, వైద్యులు, సిబ్బందితో మాట్లాడి సమస్యలు తెలుసుకున్నారు.
650–750 పడకల సూపర్ స్పెషాలిటీ హాస్పిటల్ అవసరమని, కార్డియాలజీ, నెఫ్రాలజీ, యూరాలజీ వంటి విభాగాలు లేవని తెలిపారు. పిడియాట్రిక్ విభాగంలో డాక్టర్ల కొరత, ఎక్స్‌రే, ఎంఆర్ఐ స్కాన్ సదుపాయాల లేమిపై ఆందోళన వ్యక్తం చేశారు. కాంట్రాక్ట్ సిబ్బందికి ఉద్యోగ భద్రత, హెల్త్ పాలసీ కల్పించాలని డిమాండ్ చేశారు.

పాల్వంచ – మణుగూరు

పాల్వంచలో పెద్దమ్మ తల్లి ఆలయాన్ని దర్శించుకొని ప్రత్యేక పూజలు నిర్వహించారు.
మణుగూరులో ఇటీవల మృతి చెందిన జాగృతి నాయకురాలు మల్లీశ్వరి కుటుంబ సభ్యులను పరామర్శించి ధైర్యం చెప్పారు.