యంగ్ ఇండియా స్కూల్, IIM హైదరాబాద్, కేంద్రీయ–నవోదయ విద్యాలయాలపై కీలక చర్చలు

న్యూఢిల్లీ డిసెంబర్ 16 (ప్రజా మంటలు):

తెలంగాణలో విద్యా రంగాన్ని సమగ్రంగా అభివృద్ధి చేయడానికి రాష్ట్ర ప్రభుత్వం చేపడుతున్న చర్యలకు కేంద్రం మద్దతు ఇవ్వాలని ముఖ్యమంత్రి ఎ. రేవంత్ రెడ్డి కేంద్ర ఆర్థిక మంత్రి నిర్మలా సీతారామన్‌ను కోరారు. న్యూఢిల్లీలో జరిగిన భేటీలో బీసీ, ఎస్సీ, ఎస్టీ, మైనారిటీ వర్గాల విద్యార్థులకు నాణ్యమైన విద్య అందించేందుకు చేపడుతున్న పథకాలను వివరించారు.

యంగ్ ఇండియా ఇంటిగ్రేటెడ్ రెసిడెన్షియల్ స్కూళ్లు (YIIRS)

రాష్ట్రవ్యాప్తంగా 105 శాసనసభ నియోజకవర్గాల్లో యంగ్ ఇండియా ఇంటిగ్రేటెడ్ రెసిడెన్షియల్ స్కూళ్లు నిర్మిస్తున్నట్టు సీఎం తెలిపారు. 5వ తరగతి నుంచి 12వ తరగతి వరకు ఉండే ఒక్కో స్కూల్‌లో 2,560 మంది విద్యార్థులు చదువుకునేలా ఏర్పాట్లు చేస్తున్నామని చెప్పారు. మొత్తం 105 స్కూళ్ల ద్వారా ప్రత్యక్షంగా 2.70 లక్షల మంది విద్యార్థులకు లాభం చేకూరుతుందని, సమీప ప్రభుత్వ పాఠశాలలకు విద్యా హబ్‌లుగా మారడంతో పరోక్షంగా మరింత మంది విద్యార్థులకు ప్రయోజనం ఉంటుందని వివరించారు.

ఈ స్కూళ్ల నిర్మాణానికి రూ.21 వేల కోట్లు ఖర్చు అవుతుందని, అత్యాధునిక వసతులు, ల్యాబ్‌లు, స్టేడియాలతో నిర్మిస్తున్నామని తెలిపారు. అదనంగా జూనియర్, డిగ్రీ, సాంకేతిక కళాశాలలు, ఉన్నత విద్యా సంస్థల్లో మౌలిక వసతుల అభివృద్ధికి మరో రూ.9 వేల కోట్లు వెచ్చించనున్నట్లు పేర్కొన్నారు. మొత్తంగా విద్యా రంగానికి రూ.30 వేల కోట్లు పెట్టుబడి పెట్టనున్నట్టు చెప్పారు.

ఈ నిధుల సమీకరణ కోసం ప్రత్యేక ప్రయోజన సంస్థ (SPC) ఏర్పాటు చేసి, దాని ద్వారా తీసుకునే రుణాలను ఎఫ్ఆర్‌బీఎం పరిమితుల నుంచి మినహాయించాలని కేంద్రాన్ని కోరారు. విద్యపై చేసే వ్యయాన్ని మానవ వనరుల అభివృద్ధికి పెట్టుబడిగా పరిగణించాలని విజ్ఞప్తి చేశారు. YIIRS మోడల్‌ను కేంద్ర ఆర్థిక మంత్రి ప్రశంసిస్తూ, SPC వివరాలు సమర్పించాలని సూచించారు.

హైదరాబాద్‌కు ఐఐఎం మంజూరు చేయాలంటూ విజ్ఞప్తి

కేంద్ర విద్యా మంత్రి ధర్మేంద్ర ప్రధాన్‌ను కలిసిన సీఎం రేవంత్ రెడ్డి, హైదరాబాద్‌కు ఇండియన్ ఇన్‌స్టిట్యూట్ ఆఫ్ మేనేజ్‌మెంట్ (IIM) మంజూరు చేయాలని కోరారు. టెక్నాలజీ, లైఫ్ సైన్సెస్, ఏరోస్పేస్, డిఫెన్స్, లాజిస్టిక్స్, అడ్వాన్స్డ్ మాన్యుఫ్యాక్చరింగ్ రంగాల్లో హైదరాబాద్ ముందంజలో ఉందని, ఇక్కడ ఐఐఎం అవసరం ఉందని తెలిపారు.

ఐఐఎం ఏర్పాటుకు యూనివర్సిటీ ఆఫ్ హైదరాబాద్ ప్రాంగణంలో 200 ఎకరాల భూమి గుర్తించామని, తరగతులు వెంటనే ప్రారంభించేందుకు ట్రాన్సిట్ క్యాంపస్ సిద్ధంగా ఉందని చెప్పారు. ఎయిర్, రైల్, రోడ్ కనెక్టివిటీతో పాటు అనుకూల వాతావరణం హైదరాబాద్ ప్రత్యేకతగా పేర్కొన్నారు.

కేంద్రీయ, నవోదయ విద్యాలయాలపై ప్రతిపాదనలు

జిల్లాల సంఖ్య పెరిగిన నేపథ్యంలో తెలంగాణలో కొత్తగా 9 కేంద్రీయ విద్యాలయాలు, 16 జవహర్ నవోదయ విద్యాలయాలు మంజూరు చేయాలని సీఎం కోరారు. ఇందుకు అవసరమైన భూమి, వసతులు రాష్ట్ర ప్రభుత్వం కల్పిస్తుందని తెలిపారు.

ఈ సమావేశాల్లో ఎంపీలు, రాష్ట్ర ప్రభుత్వ ప్రతినిధులు పాల్గొన్నారు.