ఎంటర్‌టైన్‌మెంట్ కోసం గంటకు ₹10 కోట్లు ఖర్చు – సింగరేణి నిధులు దుర్వినియోగం

హైదరాబాద్ డిసెంబర్ 14 (ప్రజా మంటలు):

"జాగృతి జనం బాట" కార్యక్రమంలో భాగంగా బషీర్‌బాగ్ ప్రెస్ క్లబ్‌లో నిర్వహించిన ప్రెస్‌మీట్‌లో తెలంగాణ జాగృతి అధ్యక్షురాలు కల్వకుంట్ల కవిత సీఎం రేవంత్ రెడ్డి ప్రభుత్వంపై తీవ్ర విమర్శలు గుప్పించారు. సీఎం గంట ఎంటర్‌టైన్‌మెంట్ కోసం పది కోట్ల రూపాయలు ఖర్చు చేశారని, అది కూడా సింగరేణి కార్మికుల నిధుల నుంచే ఖర్చు చేశారని ఆరోపించారు.

ఫుట్‌బాల్ మ్యాచ్‌పై తీవ్ర విమర్శలు

సీఎం రేవంత్ రెడ్డి ఫుట్‌బాల్ ఆడుతానని ప్రచారం చేసుకోవడానికే ఈ మ్యాచ్ జరిగిందని, దీని వల్ల తెలంగాణ ప్రజలకు ఎలాంటి ప్రయోజనం లేదని కవిత వ్యాఖ్యానించారు.
“ఈ పదికోట్ల రూపాయలను కాంగ్రెస్ తన పార్టీ ఫండ్ నుంచే సింగరేణికి తిరిగి చెల్లించాలి” అని డిమాండ్ చేశారు. గతంలో కేసీఆర్ ప్రభుత్వంలో ఇలాంటివి జరిగితే వాటిపై కూడా సమాధానం చెప్పాల్సిందేనన్నారు.

రాహుల్ గాంధీపై వ్యాఖ్యలు

రాహుల్ గాంధీ చిక్కడపల్లి లైబ్రరీకి వెళ్లకుండా మ్యాచ్ కోసం స్టేడియానికి రావడం బాధాకరమని, విద్యార్థులకు ఇచ్చిన హామీలను పట్టించుకోకుండా రాజుల్లా వచ్చి వెళ్లిపోయారని విమర్శించారు.

హైదరాబాద్ డివిజన్లపై అభ్యంతరం

హైదరాబాద్‌లో డివిజన్ల విభజన అశాస్త్రీయంగా జరిగిందని, ఒకే పార్టీ గెలిచేలా డివిజన్లు రూపొందించారని ప్రజలు అంటున్నారని తెలిపారు.
మల్కాజ్‌గిరిలో గతంలో 500 మంది ప్రజాప్రతినిధులు ఉంటే ఇప్పుడు 40 మందికే పరిమితం చేశారని, లోకలైజ్డ్ వ్యవస్థను సెంట్రలైజ్డ్ చేసి ప్రజలకు అన్యాయం చేశారని పేర్కొన్నారు.

బాలసుబ్రమణ్యం విగ్రహం అంశం

“జయ జయహే తెలంగాణ” పాట పాడనని బాలసుబ్రమణ్యం అన్నారనే ఆరోపణల నేపథ్యంలో ఆయన విగ్రహం విషయంలో తాను తెలంగాణ వాదుల పక్షానే ఉంటానని స్పష్టం చేశారు. రవీంద్రభారతిలో తెలంగాణ జానపద కళాకారుల విగ్రహాలు ఏర్పాటు చేయాలని, సినీ కళాకారుల విగ్రహాలకు ఇతర ప్రాంతాలు ఎంపిక చేయాలని సూచించారు.

హైదరాబాద్ మౌలిక వసతులపై ఆందోళన

జనం బాటలో భాగంగా ఐదు రోజులు హైదరాబాద్, సికింద్రాబాద్ నియోజకవర్గాల్లో పర్యటించామని, ప్రజా రవాణా, డ్రైనేజీ, మంచినీటి సమస్యలు తీవ్రమని కవిత తెలిపారు.

• గతంలో 7,500 బస్సులు ఉండగా ఇప్పుడు 3,500కే తగ్గాయని
• బస్సులు తగ్గడంతో వ్యక్తిగత వాహనాలు పెరిగాయని
• ఆర్టీసీని ప్రైవేటీకరించే ప్రయత్నం జరుగుతోందని
  ఆమె ఆరోపించారు.

నగర సమస్యలపై లెక్కలు

స్ట్రీట్ డాగ్స్ సమస్య, డ్రగ్స్ దందా, క్రైమ్ రేటు పెరుగుదలపై ప్రభుత్వం నిర్లక్ష్యం వహిస్తోందని చెప్పారు.
2022లో 92,924 డాగ్ బైట్ కేసులు ఉండగా 2024లో లక్షా 21 వేల కేసులు నమోదయ్యాయని వివరించారు.

మంచినీరు, డ్రైనేజీ, చెత్త సమస్యలు

అడిక్‌మెట్‌లో నీళ్లకు పెట్రోల్ వాసన వస్తోందని, అనేక బస్తీల్లో మురికినీరు సరఫరా అవుతోందని తెలిపారు. GHMC సిబ్బంది కొరత, ఔట్‌సోర్సింగ్ విధానంతో సమస్యలు పెరుగుతున్నాయని విమర్శించారు.

కేంద్రం నిధులపై ఆరోపణ

2019–20 నుంచి 2023–24 వరకు తెలంగాణ కేంద్రానికి ట్యాక్స్ రూపంలో ₹4,35,990 కోట్లు చెల్లిస్తే, కేంద్రం రిటర్న్‌గా ₹3,76,000 కోట్లు మాత్రమే ఇచ్చిందని, దాదాపు ₹60 వేల కోట్లు తగ్గించి ఇచ్చిందని కవిత తెలిపారు.
హైదరాబాద్ లాంటి మహానగరాలకు కేంద్రం ప్రత్యేక ప్యాకేజీలు ఇవ్వాల్సిందేనని డిమాండ్ చేశారు.

పోరాటం కొనసాగుతుంది

జనం బాట పర్యటనలో గుర్తించిన ప్రతి సమస్యపై ఫాలోఅప్ చేస్తామని, ప్రజల పక్షాన నిరంతరం జాగృతి పోరాటం కొనసాగిస్తుందని కల్వకుంట్ల కవిత స్పష్టం చేశారు.