జగిత్యాల కామర్స్ ఫోరం ఆధ్వర్యంలో విద్యార్థులకు సిఏ కోర్సుపై అవగాహన కార్యక్రమం

జగిత్యాల, నవంబర్ 27 (ప్రజా మంటలు)
జగిత్యాల జిల్లా కామర్స్ ఫోరం ఆధ్వర్యంలో పలు పాఠశాలలకు చెందిన పదవ తరగతి విద్యార్థులకు చార్టెడ్ అకౌంటెన్సీ (CA) కోర్సు పై అవగాహన కార్యక్రమం నిర్వహించారు. న్యూఢిల్లీలోని ఇన్స్టిట్యూట్ ఆఫ్ చార్టెడ్ అకౌంటెంట్స్ ఆఫ్ ఇండియా (ICAI) కరీంనగర్ శాఖ తరఫున ప్రముఖ చార్టెడ్ అకౌంటెంట్లు పాల్గొని విద్యార్థులకు సిఏ కోర్సు వివరాలను అందించారు.

ఇంజినీరింగ్, మెడిసిన్‌ తప్ప ఇతర ఉత్తమ కెరీర్‌ అవకాశాల గురించి తెలియజేస్తూ, సిఏ కోర్సు అయ్యే ఖర్చు, చదువుకు పట్టే సమయం, క్లాసుల నిర్వహణ, పరీక్షల నిర్మాణం, చదవాల్సిన విధానం, కోర్సు పూర్తి చేసిన తర్వాత కెరీర్‌లో ఉన్నత స్థాయికి ఎదగడం వంటి అంశాలపై పూర్తి స్థాయి అవగాహన కల్పించారు. విద్యార్థులు అడిగిన ప్రశ్నలకు నిపుణులు ప్రత్యక్షంగా సమాధానాలు ఇచ్చారు.

కార్యక్రమంలో ICAI కరీంనగర్ శాఖ వైస్ చైర్మన్ వి. శేఖర్ రెడ్డి, సెక్రటరీ బెక్కంటి అజయ్, CA స్టూడెంట్ వింగ్ అధ్యక్షులు గందెశ్రీ శ్రీనివాస్, మాజీ సెక్రటరీ వెన్నం శ్యాంసుందర్, మల్లేశం, ఎం. శివకుమార్, శ్యాంసుందర్ తదితరులు పాల్గొన్నారు.

జగిత్యాల కామర్స్ ఫోరం కన్వీనర్ మరియు నలంద డిగ్రీ కళాశాల కరస్పాండెంట్ శ్రీపాద నరేష్, శ్రీ చైతన్య జూనియర్ కాలేజ్ కరస్పాండెంట్ ముసిపట్ల రాజేందర్, అలాగే జిల్లా ప్రైవేట్ డిగ్రీ కళాశాలల అధ్యాపకులు కూడా పాల్గొన్నారు.

ఆక్స్ఫర్డ్, శ్రీనిధి, శ్రీ ప్రతిభ ఉన్నత పాఠశాలలు మరియు ఎన్ ఎస్ వి, నవ్య జూనియర్ కళాశాలలకు చెందిన విద్యార్థులు పాల్గొన్నారు. మొత్తం 300 మంది విద్యార్థులు ఈ అవగాహన కార్యక్రమంలో పాల్గొన్నారు.