ఐబొమ్మ రవికి నాంపల్లి కోర్టు 14 రోజుల జ్యూడిషియల్ రిమాండ్

హైదరాబాద్ నవంబర్ 26 (ప్రజా మంటలు):

సినీ పైరసీ కేసులో అరెస్టైన ఇమ్మడి రవి అలియాస్ “ఐబొమ్మ రవి”కి నాంపల్లి కోర్టు 14 రోజుల జ్యూడిషియల్ రిమాండ్ విధించింది. రవిని గత వారం పోలీసులు కస్టడీలోకి తీసుకుని విచారణ జరిపారు. సోమవారం పోలీసు కస్టడీ గడువు ముగియడంతో అతన్ని కోర్టులో హాజరుపరచగా, జ్యూడిషియల్ రిమాండ్‌కు ఆదేశాలు జారీ అయ్యాయి.

కస్టడీలో కీలక సమాచారం వెలుగులోకి

పోలీసు విచారణ సమయంలో రవి పలు ముఖ్యమైన వివరాలను వెల్లడించినట్లు సమాచారం. ఐబొమ్మ పేరిట జరిగే సినీ పైరసీ కార్యకలాపాలను ప్రధానంగా రవియే నిర్వహిస్తున్నాడని పోలీసులు నిర్ధారించారు. అతడు ఈ అక్రమ వ్యాపారంతో 100 కోట్ల రూపాయలకుపైగా సంపాదించినట్లు విచారణలో తేలిందని అధికార వర్గాలు తెలిపాయి.

30 కోట్ల బ్యాంకు లావాదేవీలు గుర్తింపు

రవికి సంబంధించిన రూ. 30 కోట్లకు పైగా బ్యాంకు లావాదేవీలు ఇప్పటికే పోలీసులు ట్రాక్ చేసినట్లు తెలుస్తోంది. ఈ వ్యవహారంలో మరికొందరి ప్రమేయం ఉందా అన్న దానిపై దర్యాప్తు కొనసాగుతోంది.

టెలిగ్రామ్ ద్వారా సీక్రెట్ డీల్స్

పోలీసులు రవి టెలిగ్రామ్ యాప్ ద్వారా సినిమా ఫైళ్ళను బేరమాడి కొనుగోలు చేసినట్లు గుర్తించారు. పైరసీ కంటెంట్‌ను ఆన్‌లైన్‌లో విపణి చేసే విధానంలో అతడు పలు సురక్షిత గ్రూపులు, ఛానెల్లను ఉపయోగించినట్లు విచారణలో ఆధారాలు లభించాయి.

యాడ్స్ ద్వారా భారీ ఆదాయం

ఐబొమ్మ సైట్‌లో సినిమా ఓపెన్ చేసిన వెంటనే 15 యాడ్స్ ఆటోమేటిక్‌గా ఓపెన్ అయ్యేలా సిస్టమ్ డిజైన్ చేసినట్లు పోలీసులు గుర్తించారు. ఈ యాడ్ నెట్‌వర్క్ ద్వారానే రవికి భారీగా ఆదాయం వచ్చినట్లు అధికారులు చెబుతున్నారు.

ఐబొమ్మపైరసీ నెట్‌వర్క్‌లో ఇంకా ఎవరు ఉన్నారు? ఇతర దేశాల్లో ఉన్న సర్వర్లు–ఫండింగ్–చానెల్లు ఏవి? అనే అంశాలపై దర్యాప్తు కొనసాగుతోంది.