ర్యాగింగ్‌ చట్ట రీత్యా నేరం దీని వల్ల భవిష్యత్తు నాశనం అవుతుంది: జిల్లా ఎస్పీ  అశోక్ కుమార్ 

జగిత్యాల నవంబర్ 27(ప్రజా మంటలు)
గంజాయి, డ్రగ్స్ వంటి మత్తు పదార్థాలకు అలవాటు పడి జీవితాలు నాశనం చేసుకోవద్దు.

ఉత్తమ డాక్టర్లుగా ఎదిగి జిల్లా వైద్య కళాశాలకు మంచి పేరు తీసుకురావాలి

జగిత్యాల పట్టణంలోని ప్రభుత్వ వైద్య కళాశాల విద్యార్థులకు ర్యాగింగ్ మరియు డ్రగ్స్ వంటి మత్తు పదార్థాల వల్ల కలిగే దుష్పరిణామాలపై అవగాహన సదస్సును పోలీస్ శాఖ ఆధ్వర్యంలో ఏర్పాటు చేశారు. ఈ కార్యక్రమానికి ముఖ్య అతిథిగా జిల్లా ఎస్పీ అశోక్ కుమార్  హాజరై విద్యార్థులకు కీలక సూచనలు చేశారు.

ఈ సందర్భంగా ఎస్పీ  మాట్లాడుతూ…విద్యార్థులు ర్యాగింగ్ వంటి చట్టవిరుద్ధ చర్యలకు ఎట్టి పరిస్థితుల్లోనూ పాల్పడకూడదని, అలాంటి ఘటనలు జరిగితే కఠినమైన చట్టపరమైన చర్యలు తప్పవని స్పష్టం చేశారు. స్నేహపూర్వక వాతావరణంలో చదువుకోవాలని, సీనియర్లు జూనియర్ల ను ప్రోత్సహించి మార్గనిర్దేశనం చేయాలని, భయపెట్టడం వంటి చర్యలు చేయకూదని  అన్నారు.ర్యాగింగ్ వల్ల బాధితుల మానసిక స్థితిపై తీవ్ర ప్రభావం పడుతుందని, గతంలో ర్యాగింగ్ కారణంగా అనేక మంది విద్యార్థులు తమ భవిష్యత్తును కోల్పోయిన సంఘటనలు ఉన్నాయని గుర్తుచేశారు.

ర్యాగింగ్ నిరోధక చట్టం ప్రకారం ర్యాగింగ్‌ లో పాల్గొనే విద్యార్థులపై క్రిమినల్ కేసులు, జైలు శిక్ష, కాలేజీ నుండి బహిష్కరణ, స్కాలర్షిప్ రద్దు, భవిష్యత్తులో ఉద్యోగ అవకాశాల కోల్పోవడం వంటి తీవ్ర శిక్షలు ఉంటాయని ఎస్పీ  వివరించారు.
కళాశాల ప్రాంగణం సురక్షితంగా ఉండేందుకు ప్రతి విద్యార్థి సహకరించాలని, ర్యాగింగ్‌ ను పూర్తిగా నిర్మూలించేందుకు అందరూ కలిసి పనిచేయాలని సూచించారు.

ఎవరైనా ర్యాగింగ్ బాధితులుగా మారితే 100 నంబర్‌కు లేదా సమీప పోలీస్ స్టేషన్‌కు వెంటనే సమాచారం ఇవ్వాలని సూచించారు. అదేవిధంగా కళాశాలలో యాంటీ-ర్యాగింగ్ కమిటీ లను బలపరచాలని అధ్యాపకులకు సూచించారు.

గంజాయి, డ్రగ్స్ వంటి మత్తు పదార్థాలు విద్యార్థుల భవిష్యత్తును నాశనం చేస్తాయని, ఇటువంటి వ్యసనాలకు దూరంగా ఉండాలని ఎస్పీ సూచించారు. మత్తు పదార్థాల‌కు సంబంధించిన సమాచారం అందించినా పోలీస్ శాఖ వెంటనే చర్యలు తీసుకుంటుందని తెలిపారు.

ఈ సందర్భంగా ఎస్పీ  యాంటీ ర్యాగింగ్ పోస్టర్లను ఆవిష్కరించి, విద్యార్థులతో యాంటీ-ర్యాగింగ్ ప్రతిజ్ఞ చేయించారు.

ఈ కార్యక్రమంలో డీఎస్పీ రఘు చందర్, టౌన్ ఇన్స్పెక్టర్ కరుణాకర్, కళాశాల ప్రిన్సిపల్ సునీల్ కుమార్,  హెచ్ ఓ డి కాద్రి, అధ్యాపకులు మరియు 200 మంది విద్యార్థులు పాల్గొన్నారు.