బీసీలకు ద్రోహం చేస్తున్నది కాంగ్రెస్ – రిజర్వేషన్లపై  కవిత ఆరోపణలు, తీవ్ర విమర్శలు

హైదరాబాద్, నవంబర్ 26 (ప్రజా మంటలు):

తెలంగాణ జాగృతి అధ్యక్షురాలు కల్వకుంట్ల కవిత కాంగ్రెస్ ప్రభుత్వాన్ని బీసీలకు ద్రోహం చేసిన పార్టీగా అభివర్ణించారు. గ్రామ పంచాయితీ ఎన్నికల రిజర్వేషన్ల కేటాయింపులో బీసీలను ఉద్దేశపూర్వకంగా మోసం చేసిందని తీవ్ర ఆరోపణలు చేశారు. కులగణనలో కాంగ్రెస్ పార్టీ తప్పుడు లెక్కలు చూపించడంతో బీసీ రిజర్వేషన్లు భారీగా తగ్గిపోయాయని కవిత విమర్శించారు.

 రాజ్యాంగ దినోత్సవం సందర్భంగా జరిగిన ప్రెస్ మీట్‌లో బాబా సాహెబ్ అంబేడ్కర్.కు నివాళులు అర్పించారు.

కవిత మాట్లాడుతూ ఎస్సీ, ఎస్టీ, బీసీ వర్గాల హక్కులు రాజ్యాంగ బద్దంగా కాపాడాల్సిన బాధ్యత ప్రభుత్వంపై ఉందని గుర్తు చేశారు. కానీ ప్రస్తుతం బీసీలు, మహిళలు, ఆదివాసీలకు అవకాశాలు తగ్గినట్లు ఆమె పేర్కొన్నారు.

బీసీలకు 42% పేర మోసం చేసిన కాంగ్రెస్

తెలంగాణలో కాంగ్రెస్ పార్టీ 42 శాతం బీసీ రిజర్వేషన్లు ఇస్తామని హామీ ఇచ్చి ఇప్పుడు కేవలం 21.29 శాతం మాత్రమే ఇచ్చిందని ఆరోపించారు. కొత్తగూడెం, మహబూబాబాద్, ఆదిలాబాద్ జిల్లాల్లో రిజర్వేషన్లు తీవ్రంగా తగ్గడంతో బీసీలకు నష్టం జరిగిందని చెప్పారు. గ్రామాల వారీగా కులాల నిజమైన లెక్కలను ప్రభుత్వం వెంటనే బయటకు తీసుకురావాలని ఆమె డిమాండ్ చేశారు.

ప్రస్తుతం ప్రకటించిన రిజర్వేషన్లలో రాజకీయ జోక్యం స్పష్టంగా కనిపిస్తోందని కవిత మండిపడ్డారు. “రాజ్యాంగం ప్రకారం కాకుండా మంత్రుల ఆదేశాల ప్రకారం రిజర్వేషన్లు ఇచ్చారు" అని అన్నారు. ఒకేసారి బీజేపీని కూడా ఆమె తీవ్రంగా విమర్శించారు. బీసీల విముక్తికి పోరాడాల్సిన పార్టీయే నిశ్శబ్దంగా చూస్తోందని, ఈ అంశంలో ప్రధాన దోషి బీజేపీయేనని కవిత అన్నారు.

ఎస్సీలు లేని చోట ఎస్సీ రిజర్వేషన్ లా?

ఎస్టీలు లేని గ్రామాల్లో కూడా ఎస్టీ రిజర్వేషన్లు ప్రకటించడం కాంగ్రెస్ నిర్లక్ష్యానికి నిదర్శనం అని పేర్కొన్నారు. నాన్–రిజర్వేషన్ పంచాయితీల్లో బీసీలు పెద్ద ఎత్తున నామినేషన్లు వేయాలని కవిత పిలుపునిచ్చారు. అవసరమైతే ఎన్నికలను వాయిదా వేయాలని ఆమె అభిప్రాయపడ్డారు.

జీహెచ్ఎంసీ విస్తరణ, రియల్ ఎస్టేట్ ప్రయోజనాలు, ఫ్రీ బస్సు స్కీంలో లోపాలు, ఆర్‌టీసీ ఉద్యోగుల తగ్గింపు వంటి అంశాలపై కూడా కవిత ప్రభుత్వాన్ని తప్పుబట్టారు. మహిళలకు కోటి సంపద హామీ, అమలులో లేకుండా కేవలం మాటల్లోనే ఉందని కామెంట్ చేశారు.

రాబోయే రోజుల్లో జాగృతి తరఫున బీసీ రిజర్వేషన్ల కోసం ఆందోళనలు మరింత ఉధృతం కానున్నాయని కవిత స్పష్టం చేశారు.