జగిత్యాలలో ఘనంగా గణేష్ నవరాత్రి ఉత్సవాల ముగింపు

జగిత్యాల, సెప్టెంబర్ 25 (ప్రజా మంటలు):

జగిత్యాల పట్టణంలో గణేష్ నవరాత్రి ఉత్సవాలు భక్తిశ్రద్ధలతో కొనసాగుతున్నాయి. పట్టణ మార్కెట్ వెనుక పద్మశాలి గణేష్ భక్త భజన మండలి ఆధ్వర్యంలో నిర్వహిస్తున్న 75వ వినాయక నవరాత్రి ఉత్సవాల్లో ఎమ్మెల్యే డా. సంజయ్ కుమార్ పాల్గొని ప్రత్యేక పూజలు నిర్వహించారు. అనంతరం పట్టణంలోని వివిధ ప్రాంతాల్లో ఏర్పాటు చేసిన గణనాథులను దర్శించుకుని ప్రత్యేక పూజలు చేశారు.

మార్కండేయనగర్‌లో ఘనంగా గోరింటాకు కార్యక్రమం

జగిత్యాల పట్టణంలోని 24వ వార్డు మార్కండేయనగర్‌లో శివ హిందూ యూత్ ఆధ్వర్యంలో మహిళలకు గోరింటాకు కార్యక్రమాన్ని ఘనంగా నిర్వహించారు. ఈ కార్యక్రమానికి మాజీ మున్సిపల్ చైర్‌పర్సన్ అడువాల జ్యోతి లక్ష్మణ్ హాజరై మహిళలతో కలిసి గోరింటాకు పెట్టుకున్నారు. మహిళలతో ఆత్మీయంగా ముచ్చటిస్తూ కార్యక్రమంలో ఉత్సాహంగా పాల్గొన్నారు.

సంప్రదాయాలు, మహిళల ఐక్యతను ప్రతిబింబించేలా కార్యక్రమాన్ని నిర్వహించారు. కౌన్సిలర్ మానపురి పవిత్ర మహేష్‌తో పాటు పలువురు మహిళలు, శివ హిందూ యూత్ సభ్యులు పాల్గొన్నారు.

కార్యక్రమాల్లో మున్సిపల్ చైర్‌పర్సన్ సమిండ్ల వాణి శ్రీనివాస్, డీసీసీ అధ్యక్షుడు గాజంగి నందయ్య, కౌన్సిలర్ సిరిపురం శ్రీలత శ్రీనివాస్, పట్టణ కాంగ్రెస్ నాయకులు, భక్తులు తదితరులు పాల్గొన్నారు.

24వ వార్డులో భక్తిశ్రద్ధలతో కుంకుమ పూజలు

24వ వార్డులో శివ హిందూ యూత్ ఆధ్వర్యంలో ఏర్పాటు చేసిన గణనాథుని వద్ద కుంకుమ పూజలను భక్తిశ్రద్ధలతో నిర్వహించారు. మున్సిపల్ చైర్‌పర్సన్ సమిండ్ల వాణి శ్రీనివాస్ హాజరై ప్రత్యేక పూజలు నిర్వహించారు. ఈ సందర్భంగా ఆమె మాట్లాడుతూ.. వినాయక నవరాత్రులను పురస్కరించుకుని భక్తులు ఐకమత్యంతో పూజలు నిర్వహించడం అభినందనీయమన్నారు. గణనాథుని ఆశీస్సులతో ప్రజలందరూ సుఖసంతోషాలతో, ఆయురారోగ్యాలతో ఉండాలని ఆకాంక్షించారు.

కార్యక్రమంలో కౌన్సిలర్లు మానపురి పవిత్ర మహేష్, దుమాల రాజ్‌కుమార్, సామల జమున రాజశేఖర్, శివ హిందూ యూత్ నిర్వాహకులు, సభ్యులు, మహిళలు, భక్తులు, స్థానికులు పాల్గొన్నారు.