బీర్పూర్ మండలంలో రోళ్లవాగు–అరగుండాల ప్రాజెక్టు ను పరిశీలించిన జీవన్ రెడ్డి 

రైతులు, మత్స్యకారులకు అండగా నిలుస్తాం : మాజీ మంత్రి జీవన్ రెడ్డి

జగిత్యాల రూరల్, డిసెంబర్ 31 (ప్రజా మంటలు):

బీర్పూర్ మండలంలోని రోళ్లవాగు–అరగుండాల ప్రాజెక్టును మాజీ మంత్రి తాటిపర్తి జీవన్ రెడ్డి పరిశీలించారు. ఈ సందర్భంగా ప్రాజెక్టుకు సంబంధించిన సమస్యలను క్షేత్రస్థాయిలో పరిశీలించి, తక్షణ పరిష్కార చర్యలపై అధికారులతో చర్చించారు.

ఈ సందర్భంగా రాష్ట్ర మంత్రి అడ్లూరి లక్ష్మణ్ కుమార్‌తో ఫోన్‌లో మాట్లాడి నిధుల మంజూరుకు చర్యలు తీసుకోవాలని కోరారు. మంత్రి సానుకూలంగా స్పందించడంతో తక్షణమే అవసరమైన నిధులు మంజూరైనట్లు తెలిపారు. ఈ సందర్భంగా రైతులు, మత్స్యకారులు, స్థానిక నాయకులు మాజీ మంత్రి జీవన్ రెడ్డికి కృతజ్ఞతలు తెలిపారు.

ప్రాజెక్టు సమస్యలపై వివరాలు

మాజీ మంత్రి మాట్లాడుతూ, అరగుండాల ప్రాజెక్టుకు ప్రధాన సమస్య నీటి నిల్వలేనని అన్నారు. రోళ్లవాగు నుంచి రావాల్సిన నీరు, వాగుపై ఉన్న 100కు పైగా మోటార్ల కారణంగా దిగువకు చేరడం కష్టమవుతోందన్నారు. వారం రోజుల క్రితం నీరు తగ్గిపోయి, మళ్లీ ప్రాజెక్టుకు చేరాలంటే కనీసం రెండు రోజుల పాటు నీటి ప్రవాహం అవసరమని తెలిపారు.

ఈ విషయాన్ని మంత్రి అడ్లూరి లక్ష్మణ్ కుమార్ దృష్టికి తీసుకెళ్లడంతో, చీఫ్ ఇంజినీర్‌తో చర్చించి డీ–53 కాలువకు 12 ఎల్ (సుమారు 500 క్యూసెక్కులు) నీటి సరఫరా పెంచేలా చర్యలు తీసుకున్నట్లు వెల్లడించారు.

అరగుండాల కెనాల్ గేట్ విరిగిపోవడంతో పాటు కాలువల్లో జంగిల్ పెరిగిపోయిందని, రూ.75 వేల అంచనాతో మరమ్మతులు చేపడుతున్నట్లు తెలిపారు. ఎన్‌ఆర్‌జీఈఎస్ (NRGS) ద్వారా కాలువల శుద్ధి సాధ్యం కాకపోవడంతో ప్రత్యేక నిధులు కేటాయించి స్లూయిస్ గేట్ల మరమ్మత్తులు, కాలువల శుభ్రత పనులు చేపడుతున్నట్లు చెప్పారు.

నీటి నిల్వలు – భవిష్యత్ ప్రణాళిక

గతంలో రోళ్లవాగులో 0.25 టీఎంసీ నీటిని నిల్వ చేసుకునే సామర్థ్యం ఉండేదని, దీనిపై అటవీ శాఖ అభ్యంతరం లేదని తెలిపారు. అదనపు నిల్వ కోసం కేంద్ర ప్రభుత్వ అనుమతుల కోసం ప్రతిపాదనలు పంపినట్లు చెప్పారు. ఈ నిల్వతో బీర్పూర్, నరసింహులపల్లి, తుంగూరు, కొల్వాయి, కమ్మునూరు, చెర్లపల్లి, కండ్లపల్లి, మంగేల్, రంగసాగర్ ప్రాంతాలకు సాగునీరు అందే అవకాశముందని తెలిపారు.

మూడు గేట్లకు ఇప్పటికే ఆర్డర్లు ఇచ్చామని, రెండు వారాల్లో అమర్చితే భవిష్యత్తులో నీటి సమస్య తలెత్తదని తెలిపారు.

మత్స్యకారుల సమస్యలపై స్పందన

గత నాలుగేళ్లుగా చెరువుల్లో నీరు నిల్వ లేకపోవడంతో కోట్ల రూపాయల విలువైన మత్స్య సంపద నష్టపోయిందని, మత్స్యకారులు జీవనోపాధి కోల్పోయారని అన్నారు. ఈ ఏడాది చేప పిల్లలను వదిలి మత్స్య సంపదను పునరుద్ధరిస్తామని హామీ ఇచ్చారు.

ఇతర పనులు

కమ్మునూరులో లిఫ్ట్ ఇరిగేషన్‌కు సంబంధించిన ట్రాన్స్‌ఫార్మర్ కాపర్ వైర్లు, ఆయిల్ దొంగతనం జరిగిన విషయాన్ని ప్రస్తావిస్తూ, మరమ్మతులకు అంచనాలు సిద్ధం చేసినట్లు తెలిపారు. మంగల్ ప్రాంతంలోనూ దొంగతన ఘటనలు జరగడంతో జనవరి 15లోగా నీరు అందించేలా చర్యలు తీసుకుంటామని తెలిపారు.

కొల్వాయి లిఫ్ట్ ఇరిగేషన్ వద్ద ఇసుక పేరుకుపోవడంతో పనులు నిలిచాయని, ప్రస్తుతం లేబర్ అందుబాటులోకి రావడంతో వారం రోజుల్లో పనులు పూర్తి చేస్తామని చెప్పారు.

బీర్పూర్ మండలం మొత్తం వ్యవసాయాధారిత ప్రాంతమని, రైతులు ఎదుర్కొంటున్న సమస్యలను ప్రత్యక్షంగా పరిశీలించి పరిష్కరించేందుకే ఈ పర్యటన చేపట్టామని తెలిపారు. ఇంజినీరింగ్ అధికారులు, ముఖ్యంగా చెక్రు నాయక్ గారి సూచనలతో సమగ్ర ప్రణాళిక రూపొందించి ముందుకు వెళ్తామని తెలిపారు.

రాబోయే రబీ సీజన్‌లో రైతులకు ఎలాంటి ఇబ్బందులు లేకుండా సాగునీరు అందించడమే లక్ష్యంగా ప్రభుత్వం పని చేస్తుందని మాజీ మంత్రి జీవన్ రెడ్డి స్పష్టం చేశారు.