జీవో 252 సవరించాలని జగిత్యాల కలెక్టరేట్ ఎదుట జర్నలిస్టుల ధర్నా

జగిత్యాల, డిసెంబర్ 27 (ప్రజా మంటల):

రాష్ట్ర ప్రభుత్వం జారీ చేసిన జీఓ నెం.252లోని నిబంధనలు వేలాది మంది జర్నలిస్టుల ఉపాధికి ముప్పుగా మారాయని ఆరోపిస్తూ, శనివారం జగిత్యాల జిల్లా కలెక్టరేట్ ఎదుట జర్నలిస్టులు ధర్నా నిర్వహించారు. ఈ జీవోను తక్షణమే సవరించాలని డిమాండ్ చేశారు.

ఈ సందర్భంగా టీయూడబ్ల్యూజే హెచ్ రాష్ట్ర ఉపాధ్యక్షుడు గంగుల రాంగోపాల్ మాట్లాడుతూ, కొత్త అక్రిడిటేషన్ విధానంలో చేసిన మార్పుల వల్ల రాష్ట్రవ్యాప్తంగా సుమారు 10 వేల మంది జర్నలిస్టులు అక్రిడిటేషన్ కోల్పోయే ప్రమాదం ఉందన్నారు. ప్రజాస్వామ్య విలువలను, పత్రికా స్వేచ్ఛను పరిరక్షించాలన్న ఉద్దేశంతో ప్రభుత్వం కొత్త జీవో తీసుకువచ్చినా, అందులోని కొన్ని నిబంధనలు జర్నలిస్టుల జీవనోపాధిని దెబ్బతీస్తున్నాయని పేర్కొన్నారు.

గతంలో అమల్లో ఉన్న జీఓ నం.239 ప్రకారం పెద్ద పత్రికలకు 20 మంది కరస్పాండెంట్లు, 20 మంది డెస్క్ జర్నలిస్టులు, 4 మంది కెమెరామెన్‌లకు అక్రిడిటేషన్లు ఉండేవని, కానీ నూతన జీవో 252లో వాటిని వరుసగా 12, 12, 3కు తగ్గించడం అన్యాయమని విమర్శించారు. ఇదే విధంగా జిల్లా స్థాయిలోనూ అక్రిడిటేషన్ల సంఖ్యను తగ్గించడం తీవ్ర ఆందోళన కలిగిస్తోందన్నారు.

జిల్లా అధ్యక్షుడు శికారి రామకృష్ణ మాట్లాడుతూ, మీడియం పత్రికలు, శాటిలైట్ ఛానళ్లకు అక్రిడిటేషన్లలో కోత విధించడం తీవ్రంగా నష్టపరిచే అంశమన్నారు. గతంలో కేబుల్ చానళ్లకు రాష్ట్ర స్థాయిలో ఇచ్చే 12 అక్రిడిటేషన్లను పూర్తిగా రద్దు చేయడం అన్యాయమని తెలిపారు.

జిల్లా ఎలక్ట్రానిక్ మీడియా అధ్యక్షుడు దొమ్మాటి అంజుగౌడ్ మాట్లాడుతూ, గతంలో ప్రతి జిల్లాకు నాలుగు అక్రిడిటేషన్లు ఉండగా, ఇప్పుడు రెండు మాత్రమే ఇవ్వడం జర్నలిస్టులపై తీవ్ర ప్రభావం చూపుతుందన్నారు.

నేషనల్ కౌన్సిల్ మెంబర్ సిరిసిల్ల శ్రీనివాస్, కోరుట్ల ప్రెస్ క్లబ్ అధ్యక్షుడు ముక్కెర చంద్రశేఖర్ మాట్లాడుతూ, గతంలో నియోజకవర్గ స్థాయిలో ఉన్న అక్రిడిటేషన్లను పూర్తిగా తొలగించడం అన్యాయమన్నారు. అలాగే ఒక లక్ష జనాభాకు ఒక అక్రిడిటేషన్, అంతకంటే ఎక్కువైతే రెండవ అక్రిడిటేషన్ ఇచ్చే విధానాన్ని తొలగించడం పట్ల తీవ్ర అసంతృప్తి వ్యక్తం చేశారు.

డెస్క్ జర్నలిస్టులను వేరు చేసి ‘మీడియా కార్డు’ పేరుతో విభజన తేవడం జర్నలిస్టు సమాజంలో తీవ్ర చర్చకు దారితీస్తోందని, ఇది ప్రభుత్వ ప్రతిష్ఠకే భంగం కలిగించే ప్రమాదం ఉందని వారు హెచ్చరించారు. 15 వేల కంటే తక్కువ సర్క్యులేషన్ ఉన్న చిన్న పత్రికలకు కూడా ఈ జీవో ద్వారా అన్యాయం జరుగుతోందని తెలిపారు.

డెస్క్, ఫీల్డ్ జర్నలిస్టుల మధ్య భేదం లేకుండా అందరినీ అక్రిడిటెడ్ జర్నలిస్టులుగా గుర్తించి, వారి హక్కులు, గౌరవం, ఉపాధిని కాపాడేలా జీఓ 252లో తక్షణ సవరణలు చేయాలని ప్రభుత్వాన్ని వారు డిమాండ్ చేశారు.

ఈ కార్యక్రమంలో జిల్లా ప్రధాన కార్యదర్శి ఏ. గంగాధర్, కోరుకంటి విజయ్, కోశాధికారి కటుకం రాజేశ్, గోపిగౌడ్, ఎండీ సాజిద్, మెట్‌పల్లి ప్రెస్ క్లబ్ అధ్యక్షుడు లక్కం మల్లేశం, శివకుమార్, పుల్లా శ్రీనివాస్, నవీన్, హరీష్, రత్నాకర్, కటుకం గణేష్, ప్రభాకర్, సంతోష్, ముకేష్ తదితరులు పాల్గొన్నారు.