అరుదైన ఆపరేషన్ చేసి బాలుడికి పునర్జన్మ ఇచ్చిన గాంధీ వైద్యులు

కిలో కు పైగా బరువు ఉన్న ప్లీహం తొలగింపు

సికింద్రాబాద్, నవంబర్ 20 (ప్రజామంటలు) :

సికింద్రాబాద్ గాంధీ ఆస్పత్రిలో తొలిసారిగా 7 ఏళ్ల బాలుడికి ల్యాపరోస్కోపిక్ విధానంలో ప్లీహము తొలగించే శస్త్రచికిత్సను వైద్యులు విజయవంతంగా నిర్వహించారు. పీడియాట్రిక్ సర్జరీ విభాగం ప్రొఫెసర్,హెచ్‌ఓడీ డాక్టర్ నాగార్జున ఆధ్వర్యంలో ఈ శస్త్రచికిత్స జరిగింది. మంచిర్యాల జిల్లా అకినేపల్లి గ్రామానికి చెందిన సూర అఖిల్ అనే బాలుడు పుట్టకతోనే రక్తవ్యాధి హెరిడిటరీ స్ఫీరోసైటోసిస్ తో బాధపడుతున్నాడు. మూడు నెలల వయసు నుంచే వ్యాధి లక్షణాలు కనిపించాయి.

ప్లీహము పెరగడం, జాండీస్, తీవ్ర రక్తహీనతతో బాధపడుతూ ప్రతి వారం రక్త మార్పిడి అవసరమయ్యేది. ల్యాపరోస్కోపిక్ స్ప్లీనెక్టమీ చాలా క్లిష్టమైన శస్త్రచికిత్స. రక్తస్రావం ప్రమాదం ఎక్కువగా ఉండడం, ఓపెన్ సర్జరీకి మార్చాల్సిన పరిస్థితులు రావడం, ఖర్చులు అధికం కావడం వంటి కారణాలతో ప్రైవేట్ ఆస్పత్రుల్లో కూడా ఇది అరుదుగానే చేస్తారు.

పలు ప్రైవేట్ ఆసుపత్రులకు వెళ్ళినప్పటికీ ప్రయోజనం లేకపోవడం, ఖర్చు అధికంగా అవుతుండటంతో తండ్రి రవి గాంధీ ఆసుపత్రికి తన కుమారుడిని తీసుకువచ్చి, అడ్మిట్ చేయించారు.  అయితే గాంధీ ఆస్పత్రి వైద్యులు ఈ శస్త్రచికిత్సను పూర్తిగా ఉచితంగా విజయవంతంగా పూర్తి చేశారు.క్లిష్టమైన ఓపెన్ సర్జరీ కాకుండా, ల్యాపరోస్కోపిక్ విధానంలో కడుపుకు నాలుగు చోట్ల రంద్రాలు చేసి, అందులోనుంచి ప్లీహాన్ని చిన్న,చిన్న ముక్కలుగా చేసి, బయటకు తీశారు. భవిష్యత్ లో ప్లీహాం లేని కారణంగా  వ్యాధి నిరోదక శక్తి సన్నగిల్లకుండా, వ్యాక్సిన్ లు వేశారు.

ఈనెల 6న సర్జరీ విజయవంతంగా చేశారు. శస్త్రచికిత్సలో డాక్టర్ మనోజ్ కుమార్, డాక్టర్ విష్ణువర్ధన్ రెడ్డి, డాక్టర్ పవన్ రావు,డాక్టర్ అశ్రిత్ రెడ్డి, డాక్టర్ హర్ష, డాక్టర్ సాజిద్ పాల్గొన్నారు. అనస్తీషియా విభాగం నుంచి ప్రొఫెసర్ డాక్టర్ అవుల మురళి, డాక్టర్ బబిత కీలక సహకారం అందించారు.శస్త్రచికిత్స విజయవంతానికి ఆపరేషన్ ధియేటర్ సిబ్బంది సిస్టర్ అరుణ, వార్డు సిబ్బంది సిస్టర్ సువర్ణ సహకరించారు. ఆస్పత్రి మెడికల్ సూపరింటెండెంట్ డాక్టర్ వాణి సంబంధిత వైద్యులను అభినందించారు. దాదాపు ప్రైవేట్,కార్పొరేట్ ఆసుపత్రుల్లో దాదాపు రూ.10లక్షలకు పైగా ఖర్చు అయ్యే ఈ సర్జరీని గాంధీ లో ఉచితంగా చేశామని, కోలుకున్న  బాలుడు అఖిల్ ను ఈ రోజు డిశ్చార్జీ చేస్తున్నట్లు తెలిపారు.  

ఈసందర్బంగా ఆమె మాట్లాడుతూ….ప్రభుత్వ ఆస్పత్రుల్లో కూడా అత్యాధునిక, క్లిష్టమైన శస్త్రచికిత్సలు చేసేందుకు గాంధీ ఆస్పత్రి పూర్తిస్థాయిలో సిద్ధంగా ఉంది. పేద, వెనుకబడిన పిల్లలకు కూడా ప్రపంచ స్థాయి చికిత్స అందిస్తున్నాం" అని తెలిపారు. వైద్య రంగానికి సీఎం రేవంత్ రెడ్డి, వైద్య, ఆరోగ్య శాఖ మంత్రి దామోదర రాజనర్సింహా లు ప్రత్యేక చొరవ తీసుకుంటూ, వైద్య రంగం బలోపేతానికి కృషి చేస్తున్నారన్నారు.తమ కుమారుడికి ఒక్క రూపాయి ఖర్చు లేకుండా ఆపరేషన్ చేసి, కాపాడిన గాంధీ డాక్టర్లకు తండ్రి రవి కృతజ్ఞతలు తెలిపారు. డబ్బులు లేని తమలాంటి వారికి గాంధీ ఆసుపత్రి గొప్ప వరమని అన్నారు.

కార్యక్రమంలో పీడియాట్రిక్ ప్రొఫెసర్ డా.జార్జ్,ఆర్ఎంవో లు డా.శేషాద్రి, డా.కళ్యాణ చక్రవర్తి,డా.యోగేందర్,సిబ్బంది పాల్గొన్నారు.
––