భారతీయ జీవన విధానమే ప్రపంచానికి ఆదర్శం.  ఆర్ఎస్ఎస్ జిల్లా సహ కార్యవాహ సాయి మధుకర్. 

జగిత్యాల అక్టోబర్ 5 (ప్రజా మంటలు)
ఎంతో ఉన్నతమైన భారతీయ జీవన విధానమే నేడు ప్రపంచానికి ఆదర్శమని, దానిని నిలుపుకోవాల్సిన బాధ్యత ప్రతి ఒక్కరిపై ఉందని ఆర్ఎస్ఎస్ జిల్లా సహ కార్యవాహ సాయి మధుకర్ అన్నారు. జగిత్యాల పట్టణం గోవిందుపల్లి బస్తి విజయదశమి ఉత్సవాన్ని ఆదివారం స్థానిక ఎల్ జి గార్డెన్ లో నిర్వహించారు. ఈ కార్యక్రమానికి సిద్ధార్థ విద్యాసంస్థల డైరెక్టర్,ట్రస్మా జిల్లా అధ్యక్షుడు బోయిన్ పల్లి శ్రీధర్ రావు ముఖ్యఅతిథిగా విచ్చేసారు.

ప్రధాన వక్త గా ఆర్ఎస్ఎస్ జిల్లా సహ కార్యవాహ సాయి మధుకర్ పాల్గొన్నారు. ఈ సందర్భంగా ఆయన మాట్లాడుతూ ఆర్ఎస్ఎస్ వ్యవస్థాపకులు డాక్టర్ హెడ్గేవార్ జన్మతః దేశభక్తుడని తెలిపారు. పాఠశాల స్థాయిలోనే  తోటి విద్యార్థులను కూడగట్టుకొని ఆంగ్లేయులకు వ్యతిరేకంగా పనిచేసి పాఠశాల నుండి బహిష్కరించబడ్డాడని తెలిపారు.

కలకత్తాలో వైద్య విద్యార్థిగా ఉంటూ అనుశీలన సమితి అనే విప్లవ సంస్థలో చేరి బాంబు తయారీలో కూడా శిక్షణ పొందారని తెలిపారు. స్వాతంత్ర సాధన కోసం  అటవీ సత్యాగ్రహం లో పాల్గొని జైలుకు వెళ్లారన్నారు. దేశ ప్రజల్లో ఉన్న అనైక్యత కారణంగానే బ్రిటిష్ వారు ఈ దేశాన్ని పరిపాలిస్తున్నారని, దేశ ప్రజల్లో ఐక్యభావం పెంపొందించడం కోసం ఒక సంస్థ అవసరమని ఉద్దేశంతో 1925 సంవత్సరంలో విజయదశమి రోజున ఆర్ఎస్ఎస్ ను స్థాపించారని తెలిపారు.

కొద్దిమందితో నాగపూర్ లో ప్రారంభించిన సంస్థ నేడు ప్రపంచంలోనే అతిపెద్ద సంస్థగా అవతరించిందన్నారు. ప్రతిరోజు శాఖలో ఇచ్చే శిక్షణ కారణంగానే స్వయం సేవకులు వివిధ రంగాలలో దేశం కోసం, ధర్మం కోసం నిస్వార్థంగా పని చేస్తున్నారన్నారు. ఎన్నో అవరోధాలు, అవమానాలు ఎదుర్కొన్నప్పటికీ తనదైన కార్య పద్ధతిలో పనిచేస్తూ ఆర్ఎస్ఎస్ 100 సంవత్సరాల కాలంలో ఎన్నో విజయాలను, సామాజిక మార్పులను సాధించిందన్నారు.

ఆర్ఎస్ఎస్ శతాబ్ది సంవత్సరాన్ని పురస్కరించుకొని భారతదేశం విశ్వ గురువుగా నిలవాలని ఆర్ఎస్ఎస్ కోరుకుంటుందన్నారు. ఈ క్రమంలో సమాజంలో కొన్ని మార్పులు రావాలని ఆర్ఎస్ఎస్ భావిస్తుందని, అవే పంచ పరివర్తన్ పేరుతో ప్రజల ముందు ఉంచుతుందన్నారు. సమాజంలో అంటరానితనాన్ని రూపుమాపి సామాజిక సమరసతను సాదించాలని, అన్ని రంగాలలో స్వదేశీ భావాన్ని పెంపొందించి స్వావలంబన తో జీవించాలని కోరారు.

పర్యావరణాన్ని పరిరక్షించే దిశగా ప్రతి ఒక్కరూ కృషి చేయాలని మొక్కలు నాటడంతో పాటు సాగునీటి వనరులను పరిరక్షించుకోవాలని, ప్లాస్టిక్ వాడకాన్ని తగ్గించాలని కోరారు. మనదేశంలో అతి విశిష్టమైన కుటుంబ వ్యవస్థను మరింత పటిష్టం చేసుకుని ప్రపంచానికి ఆదర్శంగా నిలవాలన్నారు. పౌర విధులను పాటించడం ద్వారా దేశంలో క్రమశిక్షణాయుత వాతావరణాన్ని పెంపొందించాలని పిలుపునిచ్చారు.

ముఖ్య అతిథిగా పాల్గొన్న శ్రీధర్ రావు మాట్లాడుతూ ఆర్ఎస్ఎస్ గత 100 సంవత్సరాలుగా చేస్తున్న సామాజిక సేవా కార్యక్రమాలను కొనియాడారు. భారతదేశాన్ని ఉన్నత స్థానంలో నిలిపేందుకు ఆర్ఎస్ఎస్ చేస్తున్న కృషికి సమాజంలోని ప్రతి ఒక్కరు సహకరించాలని కోరారు. ఈ కార్యక్రమంలో సుమారు 200 మంది స్వయం సేవకులు పాల్గొన్నారు.