అంబేద్కర్ ఎస్సీ స్టడీ సర్కిల్‌కు శాశ్వత భవనం మంజూరు చేయాలి

ధర్మపురి, జనవరి 21 (ప్రజా మంటలు):

జగిత్యాల జిల్లాలోని అంబేద్కర్ ఎస్సీ స్టడీ సర్కిల్‌కు శాశ్వత భవనం నిర్మాణానికి నిధులు మంజూరు చేయాలని మాజీ మంత్రి తాటిపర్తి జీవన్ రెడ్డి డిప్యూటీ ముఖ్యమంత్రి మల్లు భట్టి విక్రమార్కను కోరారు.

ఈ మేరకు ఆయన డిప్యూటీ సీఎంకు లేఖ రాసి, తెలంగాణ రాష్ట్ర ఎస్సీ స్టడీ సర్కిల్ ద్వారా ఎస్సీ, ఎస్టీ, బీసీ, మైనార్టీ విద్యార్థులకు వివిధ పోటీ పరీక్షల కోసం ఉచిత శిక్షణ అందిస్తున్న విషయాన్ని గుర్తు చేశారు. గ్రామీణ ప్రాంతాల విద్యార్థులకు శిక్షణ, హాస్టల్ సదుపాయాలు కల్పించేందుకు రాష్ట్ర ప్రభుత్వం జిల్లాల వారీగా 11 ఎస్సీ స్టడీ సర్కిళ్లను మంజూరు చేసినట్టు పేర్కొన్నారు.

ప్రస్తుతం జగిత్యాల జిల్లా ఎస్సీ స్టడీ సర్కిల్ ఒక ప్రైవేట్ భవనంలో కొనసాగుతుండటంతో, సరిపడా తరగతి గదులు, వసతి గృహాలు, మరుగుదొడ్లు వంటి మౌలిక వసతులు లేక విద్యార్థులు ఇబ్బందులు ఎదుర్కొంటున్నారని జీవన్ రెడ్డి తెలిపారు. ఈ పరిస్థితుల్లో శాశ్వత భవనం నిర్మాణం అత్యవసరమని స్పష్టం చేశారు.

స్టడీ సర్కిల్ అవసరాల మేరకు జగిత్యాల పట్టణంలోని ఎస్‌ఆర్‌ఎస్‌పీ క్యాంప్ ప్రాంతంలో, ధారూర్ క్యాంప్ పరిధిలో సర్వే నెంబర్లు 218, 219, 221లలో ప్రభుత్వ భూమిని గుర్తించినట్టు లేఖలో వివరించారు. ఈ భూమి విస్తీర్ణం సుమారు 0.25 ఎకరాలు ఉండగా, జగిత్యాల అర్బన్ తహసీల్దార్ దీనిని గుర్తించినట్టు పేర్కొన్నారు.

ఈ భూమిలో అంబేద్కర్ ఎస్సీ స్టడీ సర్కిల్‌కు శాశ్వత భవనం నిర్మించేందుకు అవసరమైన నిధులు మంజూరు చేసి, జగిత్యాల జిల్లా పోటీ పరీక్షల అభ్యర్థులకు ఉచిత శిక్షణ, హాస్టల్ సదుపాయాలు అందేలా చర్యలు తీసుకోవాలని మాజీ మంత్రి జీవన్ రెడ్డి డిప్యూటీ సీఎంకు విజ్ఞప్తి చేశారు.