భగవద్గీతే నిజమైన విద్యకు పునాది., సిద్దార్థ విద్యా సంస్థల ఎస్ ఎస్ సి  విద్యార్థులకు దేవనాథ జీయర్ స్వామీజీ బోధ

జగిత్యాల జనవరి 7(ప్రజా మంటలు)
పట్టణం లోని సిద్ధార్థ విద్యాసంస్థ ఆధ్వర్యంలో మానస స్కూల్ ఆఫ్ ఎక్సలెన్స్ పాఠశాలలో సూర్య గ్లోబల్ స్కూల్, జ్యోతి హై స్కూల్, మానస హై స్కూల్ విద్యార్థుల భవిష్యత్తును దిశానిర్దేశం చేసే ఉద్దేశంతో 10వ తరగతి విద్యార్థులకోసం “ఎగ్జామ్ ఛాలెంజెస్– మోటివేషనల్ సెషన్ ” అనే ప్రేరణాత్మక కార్యక్రమాన్ని  నిర్వహించారు.

ఈ కార్యక్రమానికి ముఖ్య అతిథిగా శ్రీశ్రీశ్రీ త్రిదండి దేవనాథ రామానుజ జీయర్ స్వామీజీ పాల్గొని విద్యార్థులకు అమూల్యమైన సందేశాలు అందించారు.

ఈ సందర్భంగా జీయర్ స్వామీజీ మాట్లాడుతూ, పిల్లలకు భారతీయ సంస్కృతి, సంప్రదాయ విలువలు తప్పనిసరిగా నేర్పాలని అన్నారు. విద్యకు ఎప్పటికీ పుల్ స్టాప్ ఉండదని, ప్రతి వ్యక్తి జీవితాంతం విద్యార్థిగానే ఉండాలని స్పష్టం చేశారు. నేటి విద్యా విధానం కేవలం డబ్బు సంపాదించి సెటిల్ అవ్వడానికే పరిమితం అయిపోతోందని, విద్య అసలు ఉద్దేశం అది కాదని హితవు పలికారు.

ప్రస్తుత చదువు విద్యార్థిని వ్యక్తిత్వంతో కూడిన వ్యక్తిగా నిలబెట్టడం లేదని, అందులో విలువలు, సంస్కారం లోపిస్తున్నాయని ఆవేదన వ్యక్తం చేశారు. 1940 ప్రాంతంలో భారతీయులను బానిసలుగా మార్చే ఉద్దేశంతో మెకాలే రూపొందించిన విద్యా విధానం ఇప్పటికీ ప్రభావం చూపుతోందని, అయితే ప్రస్తుత ప్రధాని నరేంద్ర మోదీ  ఆ వ్యవస్థను మార్చే ప్రయత్నాలు చేస్తున్నారని పేర్కొన్నారు.

ప్రపంచంలోని అనేక దేశాల్లో భగవద్గీతను బోధిస్తున్నారని, పాకిస్తాన్ వంటి దేశాల్లో కూడా గీతను మూలభాష అయిన సంస్కృతంలోనే బోధిస్తున్నారని తెలిపారు. మనం ఎంత సంపాదించాలనే దానికోసమే చదువుతున్నామని, ప్రపంచానికి విజ్ఞానం అందిస్తున్నామనుకుంటూ మనమే చీకట్లో ఉన్నామని ఆలోచనాత్మకంగా వివరించారు.

ప్రతి ఒక్కరూ తప్పనిసరిగా భగవద్గీతను అధ్యయనం చేయాలని, దాని ద్వారా క్రమశిక్షణ, ఒత్తిడి నుండి ఉపశమనం,ఆత్మవిశ్వాసం పెరుగుతాయని తెలిపారు. నేటి చదువు కేవలం ఉద్యోగం కోసం కాకుండా, మంచి మనిషిగా తీర్చిదిద్దేలా ఉండాలని సూచించారు.

జీయర్ స్వామీజీ సందేశాలు విద్యార్థుల్లో నూతన ఆలోచనలు రేకెత్తించాయి. ఈ కార్యక్రమం ప్రజ్ఞా వికాస్ కో ఆర్డినేటర్ ట్రస్మా జిల్లా అధ్యక్షులు  యాదగిరి శేఖర్  ఆధ్వర్యంలో నిర్వహించబడటం గర్వకారణమని పాఠశాల నిర్వాహకులు శ్రీధర్ రావు, హరిచరణ్ రావు,రజిత రావు ,మౌనిక రావు ,సుమన్ రావు తెలిపారు. విద్యార్థులు, ఉపాధ్యాయులు, తల్లిదండ్రులు ఈ కార్యక్రమాన్ని అత్యంత ఆసక్తితో వీక్షించి, జీయర్ స్వామీజీ ప్రసంగానికి విశేష స్పందన వ్యక్తం చేశారు.