గద్వాల్‌ జిల్లాలో అక్షరాస్యత, రోడ్లు, సాగునీటి వైఫల్యాలపై కవిత తీవ్ర విమర్శలు

గద్వాల్, డిసెంబర్ 22 (ప్రజా మంటలు):

జోగులాంబ గద్వాల్ జిల్లాలో తెలంగాణ జాగృతి ఆధ్వర్యంలో నిర్వహిస్తున్న జాగృతి జనంబాట కార్యక్రమంలో భాగంగా జాగృతి అధ్యక్షురాలు కల్వకుంట్ల కవిత విస్తృతంగా పర్యటించారు. సాగునీటి ప్రాజెక్టులు, విద్యా సంస్థలు, నిర్వాసితుల సమస్యలు, రైతుల ఇబ్బందులను ప్రత్యక్షంగా పరిశీలించి ప్రజలతో ముఖాముఖి మాట్లాడారు.

రాజకీయ మార్పే పరిష్కారం

“70 ఏళ్లుగా ఒకే కుటుంబానికి అధికారం ఇస్తే ఏం మారింది?కొత్త నాయకత్వం వచ్చినప్పుడే అభివృద్ధి సాధ్యం.
నడిగడ్డ ఎవరి అడ్డా కాదని ప్రజలు నిరూపించాలి” అని కవిత పిలుపునిచ్చారు.

గుడ్డెందొడ్డిలోని నెట్టెంపాడు ఎత్తిపోతల పథకం ఫస్ట్ స్టేజ్ పంప్ హౌస్, గుడ్డెందొడ్డి ఇరిగేషన్ క్వార్టర్స్‌లో నిర్వహిస్తున్న ఎస్సీ బాలికల గురుకులం, మల్లాపూర్ తండాలో నిర్మాణంలో ఉన్న గట్టు ఎత్తిపోతల పథకం రిజర్వాయర్ ను ఆమె సందర్శించారు. నిర్వాసిత రైతులతో మాట్లాడిన కవిత, పూర్తి స్థాయి పరిహారం ఇప్పించే బాధ్యత జాగృతి తీసుకుంటుందని హామీ ఇచ్చారు.

గద్వాల్‌లో నిర్వహించిన ప్రెస్‌మీట్‌లో కవిత సంచలన వ్యాఖ్యలు చేశారు.2029 అసెంబ్లీ ఎన్నికల్లో కచ్చితంగా పోటీ చేస్తామని, ఇకపై బీఆర్ఎస్‌లోకి వెళ్లే ప్రసక్తే లేదని స్పష్టం చేశారు.
“ఎన్నికలు ఉన్నా లేకున్నా ప్రజల మధ్యలోనే ఉంటాం. ఎంపీగా ఉన్నప్పుడు కూడా ‘మన ఊరు–మన ఎంపీ’ కార్యక్రమంతో ప్రజల్లోనే ఉన్నా” అని గుర్తు చేశారు.

అక్షరాస్యతపై ఆందోళనఓ

గద్వాల్ జిల్లాలో అక్షరాస్యత పరిస్థితి అత్యంత దయనీయంగా ఉందని కవిత ఆవేదన వ్యక్తం చేశారు.
జిల్లాలో పురుషుల అక్షరాస్యత 49.8 శాతం, మహిళల అక్షరాస్యత 39.4 శాతం మాత్రమే ఉందని తెలిపారు.
కేతిదొడ్డి మండలంలో మహిళల అక్షరాస్యత కేవలం 23 శాతంకే పరిమితమైందని పేర్కొంటూ,
“దేశవ్యాప్తంగా మహిళల విద్య పెరుగుతుంటే తెలంగాణలో మాత్రం తగ్గుతోంది. ఇలాంటి పరిస్థితుల్లో ‘రైజింగ్ తెలంగాణ’ అని ఎలా అంటారు?” అని ప్రశ్నించారు.

రోడ్లు, ఇసుక మాఫియాపై విమర్శలు

జిల్లాలో రోడ్ల పరిస్థితి భయంకరంగా ఉందని, స్కూల్ బస్సులు కూడా గ్రామాలకు రావడం లేదని కవిత తెలిపారు.
ఇసుక మాఫియా కారణంగానే రోడ్లు ధ్వంసమవుతున్నాయని ఆరోపించారు.
“సీఎం ఫోటోలు పెట్టుకొని టిప్పర్లతో ఇసుక దందా జరుగుతోంది. సీఎం గారికి సంబంధం లేకపోతే వెంటనే చర్యలు తీసుకోవాలి” అని డిమాండ్ చేశారు.

సాగునీటి ప్రాజెక్టులపై ప్రభుత్వ నిర్లక్ష్యం

నెట్టెంపాడు, ఆర్డీఎస్ ప్రాజెక్టులను పూర్తిస్థాయిలో వినియోగించుకోవడంలో ప్రభుత్వం విఫలమైందని కవిత విమర్శించారు.
తుమ్మిళ్ల ప్రాజెక్ట్ వద్ద మూడు మోటార్లలో ఒక్కటే నడుస్తోందని, కాలువల విస్తరణ, పైప్‌లైన్ అవసరమని వివరించారు.
“వివాదాలు లేని ఆర్డీఎస్ నీళ్లను కూడా సరిగా వాడుకోలేకపోతున్నారు” అని అన్నారు.

విత్తన పత్తి రైతుల సమస్యలు

జిల్లా కేంద్రంలో విత్తన పత్తి రైతులతో సమావేశమైన కవిత, రైతులు ఎదుర్కొంటున్న అన్యాయాన్ని తీవ్రంగా ఖండించారు.
కంపెనీలు ప్రకటించిన ధర కంటే తక్కువ చెల్లిస్తున్నారని, రైతులకు డైరెక్ట్ అగ్రిమెంట్లు, ప్రభుత్వ ఆధ్వర్యంలో టెస్టింగ్ వ్యవస్థ అవసరమని స్పష్టం చేశారు.

చేనేతలు, ఆరోగ్యం, విద్యపై డిమాండ్లు

గద్వాల్ చేనేత పరిశ్రమకు ప్రత్యేక స్థలం కేటాయించాలని, చేనేత కార్మికులకు న్యాయం చేయాలని డిమాండ్ చేశారు.
300 పడకల ఆసుపత్రి ఉన్నా సరైన వైద్యసౌకర్యాలు లేవని, ప్రజలు కర్నూల్‌కు వెళ్లాల్సి వస్తోందని విమర్శించారు.