ఉపాధి హామీ పథకం నుంచి గాంధీ పేరు తొలగింపు దారుణం

సికింద్రాబాద్, డిసెంబర్ 17 (ప్రజామంటలు) :

ఉపాధి హామీ పథకానికి మహాత్మా గాంధీ పేరును తొలగిస్తూ ‘వికసిత్ భారత్–గ్యారంటీ ఫర్ రోజ్‌గార్ అండ్ అజీవిక మిషన్ గా పేరు మార్చేందుకు కేంద్ర ప్రభుత్వం లోక్‌సభలో ప్రవేశపెట్టిన బిల్లును పీసీసీ వైస్‌ప్రెసిడెంట్‌, సనత్‌నగర్ కాంగ్రెస్ ఇంచార్జి డా. కోట నీలిమ తీవ్రంగా ఖండించారు. గాంధీజీ ఆలోచనలు, విలువల పట్ల కేంద్రానికి ఉన్న వ్యతిరేక వైఖరి ఈ నిర్ణయంతో స్పష్టమవుతోందని ఆమె విమర్శించారు.

సికింద్రాబాద్ డీసీసీ ఆధ్వర్యంలో రాంగోపాల్‌పేట్ డివిజన్ ఎంజీ రోడ్డులోని మహాత్మా గాంధీ విగ్రహం వద్ద నిర్వహించిన నిరసనలో ఆమె మాట్లాడారు. ఇది కేవలం పేరు మార్పు కాదని, గాంధీజీ స్ఫూర్తితో రూపుదిద్దుకున్న పథక తాత్విక పునాదులపై దాడి అని అన్నారు. గ్రామ స్వరాజ్యం, చివరి వ్యక్తికి న్యాయం అనే గాంధీ ఆశయాలకు ఈ పథకం ప్రతీక అని గుర్తు చేశారు. కొత్త విధానంలో వేతన వ్యయాన్ని కేంద్రం 60 శాతం, రాష్ట్రాలు 40 శాతం భరించాలని ప్రతిపాదించడం వల్ల పేద రాష్ట్రాలపై తీవ్ర భారం పడుతుందని, వేతనాల చెల్లింపుల్లో జాప్యం జరిగి పథకం నిర్వీర్యం అయ్యే ప్రమాదం ఉందని ఆందోళన వ్యక్తం చేశారు.

ఇది సమాఖ్య స్ఫూర్తికి విరుద్ధమని విమర్శించారు.కేంద్ర ప్రభుత్వం ఈ నిర్ణయాన్ని వెంటనే ఉపసంహరించుకోవాలని, గ్రామీణ ప్రజలకు జీవనోపాధి భద్రత కల్పించే కీలక పథకాన్ని కొనసాగించాలని డా. కోట నీలిమ డిమాండ్ చేశారు. ఉపాధి హామీ పథకం గ్రామీణ ఆర్థిక వ్యవస్థకు ఆధార స్తంభమని, దాన్ని బలహీనపరచడం దేశాభివృద్ధికి హానికరమని ఆమె పేర్కొన్నారు.
–