ఆలయం చుట్టూ బోనాలతో ప్రదక్షిణలు… దండివారం సందర్బంగా భక్తుల సందడి

(అంకం భూమయ్య)

గొల్లపల్లి |నవంబర్ 26 (ప్రజా మంటలు):

గొల్లపల్లి మండలంలోని మల్లన్నపేట శ్రీ మల్లికార్జున స్వామివారి జాతర ఉత్సవాలు భక్తి శ్రద్ధల పర్వంగా కొనసాగుతున్నాయి. రెండో రోజు దండివారం కావడంతో అన్ని దిక్కులనుంచి తరలివచ్చిన భక్తులు ఆలయ పరిసరాలను మంగళధ్వనులతో మరింత పవిత్రంగా మార్చేశారు.

ఉదయం నుంచే “మల్లన్న… మల్లన్న…” అంటూ నాద వినిపిస్తూ వేలాదిగా వచ్చిన భక్తులు స్వామివారిని దర్శించుకుని బోనాలు సమర్పించి తమ మొక్కులు తీర్చుకున్నారు. ప్రతి ఏడాది భక్తి భావంతో నిర్వహించే ఈ జాతరను ఈసారి కూడా ఆలయ కమిటీ ఏడు రోజులపాటు అత్యంత వైభవంగా నిర్వహిస్తోంది. భక్తులకు ఎటువంటి అసౌకర్యం లేకుండా అవసరమైన అన్ని ఏర్పాట్లు చేశారు.

బెల్లంతో ప్రత్యేకంగా వండిన బోనాలు, నూనె లేకుండా పచ్చళ్లతో తయారు చేసిన శాఖాహార బోనాలతో భక్తులు నెత్తిపై బోనం ఎత్తుకొని, మెడలో బంతిపూలదండ వేసుకొని, ఒగ్గు పూజారుల డమరుక నాదాల మధ్య ఆలయం చుట్టూ ప్రదక్షిణలు చేశారు. శివసత్తుల పూనకాలు, భక్తుల నామస్మరణలు, ఒగ్గుల జాత, డప్పుల గంభీర స్వరం – ఇవన్నీ కలసిపడి జాతర ప్రాంతం మొత్తం దేవనాదాల ఆలవాలగా మారింది.

గర్భగుడిలో స్వామివారిని దర్శించుకోవడానికి పెద్దఎత్తున బారులు తీరాయి. పసుపు, బెల్లం, బియ్యం సమర్పిస్తూ భక్తులు తమ కోరికలు తీర్చుకున్నారు. ఆలయ పూజారులు కొండూరి రాజేందర్ శర్మ, కొండూరి రఘునందన్ శర్మ వేదమంత్రాలతో ప్రత్యేక పూజలు నిర్వహించారు.

కొంతమంది భక్తులు తమ చిన్నారులకు పుట్టిన వెంట్రుకలు తీయించుకోగా, మరికొందరు నిలువెత్తు బెల్లంతో తులాభారం వేయించి మొక్కులు తీర్చుకున్నారు. తమ కులదైవానికి పట్నాలు వేయించే భక్తుల సందడి కూడా కనిపించింది.

భక్తుల భద్రత కోసం ధర్మపురి సీఐ రామ్ నరసింహారెడ్డి పర్యవేక్షణలో గొల్లపల్లి ఎస్ఐ కృష్ణసాగర్ రెడ్డి, ధర్మపురి ఎస్ఐ మహేష్, బుగ్గారం ఎస్ఐ సతీష్, వెల్గటూర్ ఎస్ఐ ఉదయ్‌కుమార్ బందోబస్తు నిర్వహించారు. ప్రభుత్వ ప్రాథమిక ఆరోగ్య కేంద్రం ఆధ్వర్యంలో ఏర్పాటు చేసిన ఉచిత వైద్య శిబిరం భక్తులకు ఎంతో ఉపయుక్తమైంది. స్థానిక పాఠశాల విద్యార్థులు వాలంటీర్లుగా సేవలు అందించారు.

“ఈరోజు వేలాది మంది భక్తులు స్వామివారిని దర్శించుకున్నారు. జాతరను ఇంత భక్తిశ్రద్ధగా నిర్వహించగలగటం మా అదృష్టం” అని ఆలయ ఫౌండర్ కొండూరి శాంతయ్య తెలిపారు.

ఈ కార్యక్రమంలో వివో విక్రం, ఆలయ కమిటీ సభ్యులు, పంచాయతీ కార్యదర్శి రమేష్, సిబ్బంది, పెద్ద సంఖ్యలో భక్తులు పాల్గొన్నారు.