జర్నలిస్టుల సంక్షేమం కోసం లెక్కలేనన్ని పోరాటాలు – టీయూడబ్ల్యూజే అధ్యక్షులు విరాహత్ అలీ

హైదరాబాద్, నవంబర్ 19 (ప్రజా మంటలు):

తెలంగాణ రాష్ట్రంలో జర్నలిస్టుల సంక్షేమం కోసం నిరంతరం పోరాడింది ఏ ఒక్క సంఘమో అయితే, అది టీయూడబ్ల్యూజే (తెలంగాణ రాష్ట్ర వర్కింగ్ జర్నలిస్టుల సంఘం) అని ఆ సంఘం రాష్ట్ర అధ్యక్షుడు కే. విరాహత్ అలీ స్పష్టం చేశారు. బషీర్‌బాగ్‌లోని యూనియన్ కార్యాలయంలో బుధవారం ఉమ్మడి మహబూబ్‌నగర్ జిల్లాకు చెందిన ఉర్దూ జర్నలిస్టులు టీయూడబ్ల్యూజేలో చేరిన సందర్భంగా ఆయన మాట్లాడారు.

విరాహత్ అలీ మాట్లాడుతూ,“70 ఏళ్ల సుదీర్ఘ చరిత్ర కలిగిన టీయూడబ్ల్యూజే ఏ పార్టీకి, ఏ ప్రభుత్వానికి అనుబంధంగా లేదు. ప్రొఫెషనల్ ట్రేడ్ యూనియనిజమే మా లక్ష్యం. తెలంగాణలో జర్నలిస్టులకు ఎలాంటి సమస్య వచ్చినా, ముందుండి కష్టకాలంలో తోడుగా నిలబడే చిత్తశుద్ధి మా సంఘం దే” అని తెలిపారు.

రాష్ట్రంలో వేలాది కలం కార్మికుల ఆదరాభిమానాలతో టీయూడబ్ల్యూజే దేశంలో రోల్ మోడల్‌గా నిలవడం గర్వకారణమని అన్నారు.
తెలుగు రాష్ట్రాల్లో జర్నలిస్టులు అందుకుంటున్న అనేక సౌకర్యాలు టీయూడబ్ల్యూజే పోరాటాల ఫలితమే అని గుర్తుచేశారు.

ప్రభుత్వంపై వ్యాఖ్యానిస్తూ విరాహత్ అలీ అన్నారు—
“గత ప్రభుత్వం జర్నలిస్టుల సమస్యల పరిష్కారంలో నిర్లక్ష్యం చూపింది. ప్రస్తుత ప్రభుత్వం మేనిఫెస్టోలో హామీలు ఇచ్చినా, రెండుేళ్లు గడిచినా అక్రెడిటేషన్లు, హెల్త్ కార్డులు జారీ చేయడంలో ఆలస్యం జర్నలిస్టుల్లో నిరాశను పెంచుతోంది. కనీసం ఇప్పుడు అయినా ప్రభుత్వం స్పందించి సమస్యల పరిష్కారానికి యుద్ధప్రాతిపదికన చర్యలు తీసుకోవాలి*” అని సూచించారు.

ఉర్దూ జర్నలిస్టులకు కూడా రాష్ట్ర కమిటీల్లో ప్రాతినిధ్యం కల్పించేందుకు టీయూడబ్ల్యూజే కృషి చేస్తుందని హామీ ఇచ్చారు.

ఈ కార్యక్రమంలో రాష్ట్ర కార్యదర్శి జి. మధు గౌడ్, కోశాధికారి మోతె వెంకట్ రెడ్డి, మహబూబ్‌నగర్ జిల్లా సీనియర్ నాయకులు విజయసింహా రావు తదితరులు పాల్గొన్నారు.