గాంధీలో చికిత్స పొందుతూ సాయి ఈశ్వర్ చారి మృతి

రిజర్వేషన్ల అంశంపైనే ఆత్మహత్యాయత్నమని బీసీ నాయకుల ఆరోపణ

సికింద్రాబాద్,  డిసెంబర్  06(ప్రజా మంటలు): 

హైదరాబాద్ సిటీ శివారులోని మేడిపల్లి వద్ద గురువారం సాయంత్రం పెట్రోలు పోసుకుని ఆత్మహత్యాయత్నం చేసిన సాయి ఈశ్వర్ చారి (30) గాంధీ ఆసుపత్రిలో చికిత్స పొందుతూ శుక్రవారం మధ్యాహ్నం 12.26 గంటలకు మరణించాడు. సంగారెడ్డి జిల్లా పుల్కల్ మండలం, పోచారం గ్రామానికి చెందిన ఈశ్వర్ చారి, జీవనోపాధి కోసం జగద్గిరిగుట్టలో నివాసముంటూ క్యాబ్ డ్రైవర్‌గా పనిచేస్తున్నాడు.

మృతుడికి భార్య కవిత, తల్లి ప్రమీలతో పాటు ముగ్గురు చిన్న పిల్లలు—కృత్తిక (3), కృష్ణదత్త (2), చిట్టి (1) ఉన్నారు. ఇంటి పెద్ద దిక్కు మృతితో కుటుంబం కన్నీరుమున్నీరైంది. గాంధీ ఆసుపత్రిలో పోస్టుమార్టం అనంతరం మృతదేహాన్ని జగద్గిరిగుట్టకు తరలించగా, శనివారం ఉదయం అంత్యక్రియలు నిర్వహించనున్నట్లు బంధువులు తెలిపారు.

రిజర్వేషన్ల అంశంపైనే ఆత్మహత్యాయత్నమని బీసీ నాయకుల ఆరోపణ

బీసీలకు 42 శాతం రిజర్వేషన్లు అమలు చేయాలనే డిమాండ్‌ నేపథ్యంలోనే ఈశ్వర్ చారి ఆత్మహత్యకు పాల్పడ్డాడని బీసీ సంఘాల నాయకులు ఆక్షేపించారు. ఈ ఘటనతో గాంధీ ఆసుపత్రి వద్ద వాతావరణం ఉద్రిక్తమైందని పేర్కొన్నారు.

గాంధీ ఆసుపత్రి వద్ద ఆందోళనలు, అరెస్టులు

మధ్యాహ్నం నుంచి బీసీ జేఏసీ ఆధ్వర్యంలో పెద్ద ఎత్తున ఆందోళనలు ప్రారంభమయ్యాయి. జేఏసీ చైర్మన్ జాజుల శ్రీనివాస్ గౌడ్, ఎమ్మెల్సీ తీన్మార్ మల్లన్న, మాజీ ఐఏఎస్ చిరంజీవులు, చెరుకు సుధాకర్, మణిమంజరి, జూలూరి గౌరిశంకర్, పూర్ణచందర్ తదితరులు గాంధీ మెయిన్ బిల్డింగ్ ఎదుట బైఠాయించి ప్రభుత్వంపై నినాదాలు చేశారు.

నాయకులు పోలీస్ అడ్డుగోడను దాటి ఆరవ ఫ్లోర్‌లోని బర్న్ వార్డు వద్దకు చేరుకుని సాయి కుటుంబ సభ్యులతో కలిసి నిరసన వ్యక్తం చేశారు. దీంతో పరిస్థితి ఉద్రిక్తమవగా, ఈస్ట్‌జోన్ డీసీపీ బాలస్వామి, చిలకలగూడ ఇన్‌స్పెక్టర్ అనుదీప్ నేతృత్వంలో పోలీసులు భారీగా మోహరించి ఆందోళనకారులను అరెస్ట్ చేశారు.

అరెస్టైన వారిని బొల్లారం, తిరుమలగిరి, అంబర్‌పేట్, ఉప్పల్ పోలీస్ స్టేషన్లకు ప్రత్యేక వాహనాల్లో తరలించారు.

నేడు రాష్ట్రవ్యాప్తంగా నిరసనలకు పిలుపు

సాయి ఈశ్వర్ మృతిపై కేంద్ర–రాష్ట్ర ప్రభుత్వాలు స్పందించాలని, బీసీ రిజర్వేషన్ల చట్టాన్ని ఈ పార్లమెంట్ సమావేశాల్లోనే ఆమోదించాలని బీసీ జేఏసీ డిమాండ్ చేసింది. కుటుంబానికి ఆర్థిక సాయం ప్రకటించాలనూ కోరింది. రేపు రాష్ట్రవ్యాప్తంగా నిరసనలు చేపట్టాలని జాజుల శ్రీనివాస్ గౌడ్ పిలుపునిచ్చారు.

---

“బలిదానాలు వద్దు… బరి గీసి పోరాడుదాం” – మాజీ ఐఏఎస్ చిరంజీవులు

బీసీలకు 42% రిజర్వేషన్లు అందిస్తామని చెప్పి తప్పించిన కాంగ్రెస్ ప్రభుత్వం వైఖరికి నిరసనగా ఆత్మహత్యాయత్నం చేసిన సాయి ఈశ్వర్ చారి ఇంటికి మాజీ ఐఏఎస్ చిరంజీవులు వెళ్లి కుటుంబ సభ్యులను పరామర్శించారు. అనంతరం మీడియాతో మాట్లాడుతూ—

“బీసీ యువత ఆత్మహత్యల బాట పట్టకూడదు.

తమిళనాడు తరహాలో రాజ్యాంగబద్ధంగా శాంతియుత ఉద్యమంతో హక్కులు సాధించాలి.

సాయి ఈశ్వర్ వంటి యువకులు ఇలాంటి మార్గం ఎంచుకోవడం అత్యంత బాధాకరం.

ప్రాణం విలువైనది… పోతే తిరిగి రాదు.

రాజకీయ హక్కులు పోరాటంతోనే వస్తాయి” అని పిలుపునిచ్చారు.

ఈ కార్యక్రమంలో బీసీఐఎఫ్ చైర్మన్ బాలగౌని బాలరాజు గౌడ్, బీసీ మేధావుల సమాఖ్య రాష్ట్ర కోఆర్డినేటర్ డా. అవ్వారు వేణు కుమార్, పిడికిలి రాజు, కేవీ గౌడ్, ఆంజనేయులు, బైరూ శేఖర్ గంగపుత్ర, వీరమల్ల రమేష్ గౌడ్, సిలివేరు నాగరాజు తదితరులు పాల్గొన్నారు.
----