బీఆర్ఎస్‌ను బొందపెట్టాలి.. కేసీఆర్‌ను తరిమికొట్టాలి

ఖమ్మం, జనవరి 18 (ప్రజా మంటలు):

బీఆర్ఎస్ అధినేత కేసీఆర్‌పై రాష్ట్ర ముఖ్యమంత్రి ఏ. రేవంత్ రెడ్డి సంచలన వ్యాఖ్యలు చేశారు. తెలంగాణలో తెలుగుదేశం పార్టీని లేకుండా చేస్తానని కంకణం కట్టుకున్న కేసీఆర్‌ను రాజకీయంగా తరిమికొట్టాలని హెచ్చరించారు. బీఆర్ఎస్ పాలనలో డబుల్ బెడ్రూమ్ ఇళ్లను ఇవ్వకుండా పేదలను తీవ్ర ఇబ్బందులకు గురిచేశారని ఆరోపించారు. పేదలను మోసం చేసిన బీఆర్ఎస్ దిమ్మలు కూలగొట్టాలని ప్రజలను పిలుపునిచ్చారు.

ఖమ్మం జిల్లాలో ఆదివారం పర్యటించిన సీఎం రేవంత్ రెడ్డి పలు అభివృద్ధి కార్యక్రమాల్లో పాల్గొన్నారు. ఈ సందర్భంగా మాట్లాడుతూ, రాష్ట్ర అభివృద్ధిని అడ్డుకుంటున్న బీఆర్ఎస్‌ను బొందపెట్టాలని హెచ్చరించారు. అనంతరం మద్దులపల్లిలో నిర్వహించిన మున్సిపల్ ఎన్నికల సన్నాహక సమావేశంలో పాల్గొని, కాంగ్రెస్ శ్రేణులకు పలు అంశాలపై దిశానిర్దేశం చేశారు.

ఈ సమావేశంలో డిప్యూటీ సీఎం మల్లు భట్టి విక్రమార్క, మంత్రులు పొంగులేటి శ్రీనివాసరెడ్డి, తుమ్మల నాగేశ్వరరావు, వాకిటి శ్రీహరి, ఉత్తమ్ కుమార్ రెడ్డి తదితరులు పాల్గొన్నారు.

ఈ సందర్భంగా నందమూరి తారక రామారావు వర్థంతిని స్మరించుకుంటూ సీఎం రేవంత్ రెడ్డి మాట్లాడారు. దేశవ్యాప్తంగా తెలుగు వారిని ‘మదరాసీలు’ అని పిలిచే పరిస్థితుల్లో తెలుగు జాతికి ఆత్మగౌరవం తీసుకువచ్చిన మహానేత ఎన్టీఆర్ అని కొనియాడారు. ఖమ్మం జిల్లాలో ఎన్టీఆర్, చంద్రబాబు నాయుడు అభిమానులు పెద్ద సంఖ్యలో ఉన్నారని ప్రస్తావించారు.

పేదల గుండెల్లో చిరస్థాయిగా నిలిచిన నాయకుడు ఎన్టీఆర్ అని పేర్కొన్న సీఎం, ఆయన స్ఫూర్తితోనే పేదలకు సన్నబియ్యం పథకాన్ని అమలు చేస్తున్నామని తెలిపారు. పేదలకు సంక్షేమం అందించడమే ఎన్టీఆర్‌కు మనమిచ్చే ఘన నివాళి అని చెప్పారు.

2007లో తొలిసారిగా మధిర నియోజకవర్గంలో నిర్వహించిన టీడీపీ కార్యక్రమంలో పాల్గొన్న విషయాన్ని గుర్తు చేసుకున్నారు. ఆ సందర్భంగా స్నానాల లక్ష్మీపురం వెళ్లి మల్లు భట్టి విక్రమార్కను ఆయన స్వగ్రామంలో కలిశానని తెలిపారు. గత ఇరవై సంవత్సరాలుగా ఎప్పుడూ ఖమ్మం జిల్లాకు వచ్చినా ప్రజలు తనకు అపారమైన ప్రేమాభిమానాలు చూపుతున్నారని, ముఖ్యమంత్రి స్థాయికి ఎదగటంలో ప్రజల సహకారం మరవలేనిదని సీఎం రేవంత్ రెడ్డి పేర్కొన్నారు.