తెలంగాణ ప్రభుత్వం–భారత ఆర్మీ మధ్య సమస్యలు చర్చల ద్వారానే పరిష్కారం: సీఎం రేవంత్ రెడ్డి

హైదరాబాద్, జనవరి 15 (ప్రజా మంటలు):

తెలంగాణ ప్రభుత్వం, భారత ఆర్మీకి మధ్య ఉన్న వివిధ సమస్యలు నిరంతర చర్చల ద్వారానే పరిష్కారమవుతాయని ముఖ్యమంత్రి శ్రీ ఎ. రేవంత్ రెడ్డి అభిప్రాయపడ్డారు. పెండింగ్‌లో ఉన్న భూ సమస్యలు, ఇతర పరిపాలనా అంశాల సత్వర పరిష్కారానికి ఆర్మీ తరఫున ప్రత్యేక అధికారులను నియమించాలని ఆయన సూచించారు.

హైదరాబాద్ కమాండ్ కంట్రోల్ సెంటర్‌లో ముఖ్యమంత్రి అధ్యక్షతన నిర్వహించిన సివిల్–మిలిటరీ లైజన్ కాన్ఫరెన్స్‌లో ఈ అంశాలపై విస్తృతంగా చర్చించారు. తెలంగాణ ప్రభుత్వం–భారత సైన్యం మధ్య పెండింగ్‌లో ఉన్న భూ వివాదాలు, పరిపాలనా సమస్యలపై సమన్వయంతో పరిష్కారం సాధించాలని సీఎం సూచించారు.

ఈ సమావేశంలో ప్రభుత్వ ప్రధాన కార్యదర్శి రామకృష్ణారావు, తెలంగాణ–ఆంధ్రా సబ్ ఏరియా జనరల్ ఆఫీసర్ కమాండింగ్ (TASA) మేజర్ జనరల్ అజయ్ మిశ్రా, తెలంగాణ డీజీపీ శివధర్ రెడ్డి తదితర రాష్ట్ర ప్రభుత్వ, ఆర్మీ ఉన్నతాధికారులు పాల్గొన్నారు.

తెలంగాణ ప్రభుత్వం తరఫున పలు విజ్ఞప్తులను ముఖ్యమంత్రి ఆర్మీ ఉన్నతాధికారుల దృష్టికి తీసుకువచ్చారు. సదరన్ కమాండ్ సెంటర్ ప్రధాన కార్యాలయాన్ని హైదరాబాద్‌కు మార్చే అంశాన్ని పరిశీలించాలని కోరారు.

అలాగే దేశంలోని అనేక రాష్ట్రాలకు 2 నుంచి 4 సైనిక్ స్కూళ్లు మంజూరైనప్పటికీ, గత పదేళ్లలో తెలంగాణకు ఒక్క సైనిక్ స్కూల్ కూడా మంజూరు కాలేదని ముఖ్యమంత్రి గుర్తు చేశారు. తెలంగాణలో తక్షణమే సైనిక్ స్కూల్ ఏర్పాటు చేయాలని కోరారు.

దేశ భద్రతకు సంబంధించిన అన్ని అంశాల్లో కేంద్ర ప్రభుత్వం, భారత సైన్యానికి పూర్తి సహకారం అందించేందుకు తెలంగాణ ప్రభుత్వం ఎప్పుడూ సిద్ధంగా ఉందని సీఎం స్పష్టం చేశారు. ఇందులో భాగంగానే వికారాబాద్ జిల్లా దామగుండం వద్ద లో–ఫ్రీక్వెన్సీ వీఎల్ఎఫ్ (VLF) నేవీ రాడార్ స్టేషన్‌కు 3 వేల ఎకరాల భూమిని కేటాయించిన విషయాన్ని ఆయన గుర్తు చేశారు.