ధర్మపురిలో కాంగ్రెస్‌లో చేరికలు: మంత్రి అడ్లూరి లక్ష్మణ్ సమక్షంలో బీఆర్ఎస్ నేతల పార్టీలో చేరిక

ధర్మపురి, జనవరి 15 (ప్రజా మంటలు):

ధర్మపురి పట్టణంలో కాంగ్రెస్ పార్టీ బలోపేతం దిశగా కీలక పరిణామం చోటుచేసుకుంది. ధర్మపురి పట్టణ మున్సిపాలిటీ మాజీ మున్సిపల్ వైస్ చైర్మన్ ఇందారపు రామన్నతో పాటు మాజీ కౌన్సిలర్లు మయూరి వేణు, యూనుస్, సాంబు, స్తంభంకాడి రమేష్ సహా బీఆర్ఎస్ పార్టీకి చెందిన పలువురు నాయకులు, కార్యకర్తలు మంత్రి అడ్లూరి లక్ష్మణ్ సమక్షంలో కాంగ్రెస్ పార్టీలో చేరారు. ఈ సందర్భంగా మంత్రి వారికి కాంగ్రెస్ పార్టీ కండువా కప్పి ఘనంగా పార్టీలోకి ఆహ్వానించారు.

ఈ సందర్భంగా మంత్రి అడ్లూరి లక్ష్మణ్ మాట్లాడుతూ…రాష్ట్ర ప్రభుత్వం అమలు చేస్తున్న ప్రజాప్రయోజన సంక్షేమ పథకాలు, అభివృద్ధి కార్యక్రమాలకు ఆకర్షితులై కాంగ్రెస్ పార్టీలో చేరిన ప్రతి ఒక్కరికి స్వాగతం పలుకుతున్నామని అన్నారు. నూతనంగా పార్టీలో చేరిన వారితో పాటు పార్టీలోని సీనియర్ నాయకులందరినీ సమన్వయం చేస్తూ ప్రతి కార్యకర్త గౌరవాన్ని కాపాడుతామని స్పష్టం చేశారు.

కాంగ్రెస్ ప్రభుత్వం అధికారంలోకి వచ్చిన తర్వాత ప్రజల జీవితాల్లో నేరుగా మార్పు తీసుకొచ్చేలా పలు చారిత్రక నిర్ణయాలు తీసుకుందని మంత్రి తెలిపారు. ఆరు గ్యారంటీల్లో భాగంగా మహిళలకు ఉచిత బస్సు ప్రయాణం, పేదలకు కొత్త రేషన్ కార్డులు, రైతులకు రైతు భరోసా, 200 యూనిట్ల వరకు ఉచిత విద్యుత్, ఇందిరమ్మ ఇండ్లు, నిరుద్యోగ యువతకు ఉద్యోగ కల్పన వంటి పథకాలు ప్రజల్లో విశేష స్పందన పొందుతున్నాయని పేర్కొన్నారు.

అలాగే రాజీవ్ యువ వికాసం, చేయూత, ఆసరా పెన్షన్ల పునరుద్ధరణ, కల్యాణ లక్ష్మి – షాదీ ముబారక్, గృహ లక్ష్మి, అన్నపూర్ణ పథకాల ద్వారా ప్రభుత్వం పేదల సంక్షేమానికి కట్టుబడి ఉందని తెలిపారు. విద్య, ఉపాధి రంగాల్లో కీలక నిర్ణయాలు తీసుకొని రెండేళ్లలో సుమారు 59 వేల మందికి ప్రభుత్వ ఉద్యోగాలు కల్పించడంతో పాటు గ్రూప్–1, గ్రూప్–2, డీఎస్సీ నియామకాలను పారదర్శకంగా నిర్వహించిందని చెప్పారు.

ధర్మపురి నియోజకవర్గంలో లక్ష్మీ నరసింహ సంస్కృత–ఆంధ్ర కళాశాల పునఃప్రారంభం, ఎల్లంపల్లి ముంపు బాధితులకు మిగిలిన రూ.18 కోట్ల పరిహారం పంపిణీ, మంజూరైన డిగ్రీ కళాశాల, ఇంటిగ్రేటెడ్ పాఠశాల నిర్మాణాలు, గోదావరి సివరేజ్ పనులు త్వరలో ప్రారంభం కానున్నాయని వివరించారు.

ఈ నెల 20న రాష్ట్ర ఉప ముఖ్యమంత్రి మల్లు భట్టి విక్రమార్క ధర్మపురి మండలానికి రానున్నారని, పలు అభివృద్ధి కార్యక్రమాలకు శంకుస్థాపనలు చేయనున్నట్లు తెలిపారు. రాబోయే రోజుల్లో ధర్మపురి నియోజకవర్గంలో స్పష్టమైన అభివృద్ధి ప్రజలకు కనబడేలా పనిచేస్తానని మంత్రి హామీ ఇచ్చారు. 2027లో జరిగే ధర్మపురి పుష్కరాలను దృష్టిలో ఉంచుకుని ఈ ప్రాంతాన్ని ఆధ్యాత్మిక–పర్యాటక కేంద్రంగా అభివృద్ధి చేసేందుకు సీఎం రేవంత్ రెడ్డి సహకారంతో ప్రత్యేక నిధులు కోరినట్లు తెలిపారు.

ఈ కార్యక్రమంలో మండల కాంగ్రెస్ పార్టీ నాయకులు, కార్యకర్తలు తదితరులు పాల్గొన్నారు.