హైదరాబాద్‌లో జర్నలిస్టుల అరెస్టులు

హైదరాబాద్ జనవరి 14 (ప్రజా మంటలు):

హైదరాబాద్‌లో జర్నలిస్టుల వరుస అరెస్టుల వ్యవహారంపై మాజీ మంత్రి హరీశ్ రావు డీజీపీతో ఫోన్‌లో మాట్లాడారు. పండుగ పూట అర్ధరాత్రి జర్నలిస్టుల ఇళ్లకు వెళ్లి తలుపులు పగలగొట్టి అరెస్టులు చేయడం అవసరమా? అని ప్రశ్నించారు.

నోటీసులు ఇవ్వకుండా, చట్టపరమైన ప్రొసీజర్ అనుసరించకుండా జర్నలిస్టులను అరెస్టు చేయడం సరికాదని హరీశ్ రావు తెలిపారు. జర్నలిస్టులు క్రిమినల్స్ గానీ, ఉగ్రవాదులు గానీ కాదని, వారిపట్ల ఇంత కఠినంగా వ్యవహరించడం అన్యాయమని వ్యాఖ్యానించారు. పండుగ వేళ ఈ అరెస్టులు జర్నలిస్టుల కుటుంబాలను మానసిక వేదనకు గురిచేస్తాయని అన్నారు. అరెస్టు చేసిన జర్నలిస్టులను వెంటనే విడుదల చేయాలని డీజీపీని కోరారు.

NTV జర్నలిస్టుల అరెస్టు

NTV ఇన్‌పుట్ ఎడిటర్ దొంతు రమేష్‌తో పాటు రిపోర్టర్లు పరిపూర్ణ చారి, సుధీర్‌లను పోలీసులు అరెస్టు చేశారు. వీరిని ఇవాళ మెజిస్ట్రేట్ ముందు హాజరుపర్చే అవకాశం ఉందని సమాచారం.

మహిళా IAS అధికారి, మంత్రి సంబంధిత వార్త వ్యవహారంలో NTV న్యూస్ ఛానల్‌పై ప్రభుత్వం చర్యలకు సిద్ధమైంది. ఐదు రోజుల క్రితం ప్రసారమైన కథనంపై నిన్న సీపీ సజ్జనార్ నేతృత్వంలో ప్రత్యేక దర్యాప్తు బృందం (SIT) ఏర్పాటు చేశారు. ఈ నేపథ్యంలో నిన్న సాయంత్రం NTV యాజమాన్యం క్షమాపణ తెలిపింది.

అయితే సమస్య అక్కడితో ముగిసిందని భావించిన సమయంలో, కుటుంబంతో విదేశాలకు వెళ్తున్న దొంతు రమేష్‌ను హైదరాబాద్ ఎయిర్‌పోర్టులో పోలీసులు అరెస్టు చేయగా, మరో ఇద్దరు రిపోర్టర్లను కూడా అదుపులోకి తీసుకున్నారు.

జర్నలిస్టు సంఘాల ఖండన

అర్ధరాత్రి పూట జర్నలిస్టుల అరెస్టులను తెలంగాణ యూనియన్ ఆఫ్ వర్కింగ్ జర్నలిస్ట్స్ సంఘం తీవ్రంగా ఖండించింది.
నిరాధారమైన లేదా అసత్య కథనాలపై ముందుగా ఖండన కోరవచ్చని, అవసరమైతే చట్టపరమైన చర్యలు తీసుకోవచ్చని, కానీ నోటీసులు లేకుండా అరెస్టులు చేయడం సరికాదని సంఘం పేర్కొంది.

దొంతు రమేష్, పరిపూర్ణ చారి, సుధీర్‌లు సీనియర్ జర్నలిస్టులని, వారిని తీవ్రవాదుల్లా అర్ధరాత్రి అరెస్టు చేయడం అన్యాయమని పేర్కొంది. ప్రభుత్వం వెంటనే అరెస్టు చేసిన జర్నలిస్టులను బేషరతుగా విడుదల చేయాలని డిమాండ్ చేసింది.