లక్ష్మణ్ కుమార్ ప్రశ్నలకు జాబితాతో సమాధా నం ఇచ్చిన మాజీ మంత్రి కొప్పుల ఈశ్వర్

ధర్మపురి, జనవరి 12 (ప్రజా మంటలు):

బీఆర్‌ఎస్ ప్రభుత్వంలో ధర్మపురిలో ఏం అభివృద్ధి జరిగిందని ఎమ్మెల్యే లక్ష్మణ్ కుమార్ చేసిన వ్యాఖ్యలకు ప్రతిస్పందనగా మాజీ మంత్రి కొప్పుల ఈశ్వర్ ధర్మపురిలో ప్రెస్‌మీట్ నిర్వహించారు.

ఈ సందర్భంగా ఆయన మాట్లాడుతూ, తన హయాంలో ధర్మపురి మున్సిపాలిటీ ఏర్పాటు, డబుల్ రోడ్లు, హైవే అభివృద్ధి, ఇంటర్నల్ రోడ్లు, బ్రిడ్జిల నిర్మాణం, బస్ స్టాండ్ ఆధునీకరణకు నిధుల మంజూరు జరిగిందని తెలిపారు. క్యాంపు కార్యాలయం, కోర్టు, షాదీఖానా, ఇంటిగ్రేటెడ్ మార్కెట్, పోలీస్ స్టేషన్ కాంపౌండ్ వాల్, అంబేద్కర్ భవనం, శారద మహిళల మండలి భవనం, హరిత హోటల్ వంటి అనేక నిర్మాణ పనులు చేపట్టామని వివరించారు.

ఆరోగ్య రంగంలో 50 పడకల మాతా శిశు ఆసుపత్రి, డయాలసిస్ సెంటర్, ఆక్సిజన్ ప్లాంట్, బస్తీ దవాఖానాలు, వెటర్నరీ ఆసుపత్రి ఏర్పాటు చేశామని చెప్పారు. సాగునీటి రంగంలో లిఫ్ట్ ఇరిగేషన్ ప్రాజెక్టులు, చెరువుల మరమ్మతులు, రోళ్లవాగు ప్రాజెక్టు దాదాపు పూర్తి చేశామని తెలిపారు.

ధర్మపురి ఆలయ అభివృద్ధికి 100 కోట్ల రూపాయలు మంజూరు చేయించగా, బీఆర్‌ఎస్ ప్రభుత్వ హయాంలోనే సుమారు 40 కోట్ల పనులు ప్రారంభమయ్యాయని, కాంగ్రెస్ ప్రభుత్వం వచ్చిన తర్వాత మిగిలిన పనులు, అలాగే మున్సిపాలిటీ అభివృద్ధి, రోడ్లు, ఎస్‌టీపీ, స్మశానవాటిక, ఫైర్ స్టేషన్ వంటి అనేక పనులు క్యాన్సల్ అయ్యాయని ఆరోపించారు.

తాను చేసిన అభివృద్ధి పనులు లక్ష్మణ్ కుమార్‌కు కనిపించడం లేదని విమర్శించిన కొప్పుల ఈశ్వర్, “మేము చేయని పని ఏదైనా ఉంటే చెప్పండి” అంటూ సవాల్ విసిరారు.

ఈ సమావేశంలో బీఆర్‌ఎస్ పార్టీ నాయకులు, కార్యకర్తలు పాల్గొన్నారు.