గుండె జబ్బుల నివారణను మిషన్‌గా తీసుకుందాం : సీఎం రేవంత్ రెడ్డి

హైదరాబాద్, జనవరి 11 (ప్రజా మంటలు):

గుండె సంబంధిత వ్యాధులు పెరుగుతున్న నేపథ్యంలో వాటి నివారణను ఒక మిషన్‌గా తీసుకొని ప్రభుత్వం, వైద్యులు, సమాజం అంతా కలిసి పనిచేయాల్సిన అవసరం ఉందని ముఖ్యమంత్రి శ్రీ ఎ. రేవంత్ రెడ్డి పిలుపునిచ్చారు. విద్యార్థులకు సీపీఆర్ (Cardiopulmonary Resuscitation) శిక్షణ ఇవ్వడానికి కార్డియాలజిస్టులు స్వచ్ఛందంగా ముందుకు వస్తే దేశవ్యాప్తంగా వేలాది ప్రాణాలను కాపాడగలమని ఆయన అభిప్రాయపడ్డారు.

ఇంటర్వెన్షనల్ కార్డియాలజీ రీసెర్చ్ అండ్ ట్రెయినింగ్ ఫౌండేషన్ (ICRTF) ఆధ్వర్యంలో హైదరాబాద్‌లో నిర్వహిస్తున్న ఫెలోస్ ఇండియా సదస్సు–2026లో ముఖ్యమంత్రి పాల్గొని ప్రసంగించారు. దేశంలోని వివిధ రాష్ట్రాలు, దక్షిణాసియా దేశాల నుంచి దాదాపు 500 మంది కార్డియాలజిస్టులు మూడు రోజుల పాటు జరుగుతున్న ఈ సదస్సులో పాల్గొన్నారు.

ఈ సందర్భంగా ముఖ్యమంత్రి మాట్లాడుతూ, తాను వృత్తి పరంగా డాక్టర్ కాకపోయినా, ప్రజాప్రతినిధిగా సామాజిక వైద్యుడి పాత్ర పోషిస్తూ సమాజంలోని సమస్యలకు పరిష్కారం చూపేందుకు ప్రయత్నిస్తున్నానన్నారు. ఇప్పటికే స్థిరపడిన వైద్యులైనా, తమ నాలెడ్జ్‌ను ఎప్పటికప్పుడు అప్‌డేట్ చేసుకోవాలనే లక్ష్యంతో ఈ తరహా కాన్ఫరెన్సులకు హాజరవడం అభినందనీయమని అన్నారు. నిరంతరం నేర్చుకోవడమే విజయానికి మంత్రం అని, కొత్త విషయాలు తెలుసుకోవడం మానేస్తే కెరీర్ అక్కడితో ముగిసినట్టేనని వ్యాఖ్యానించారు.

లైఫ్ సైన్సెస్, ఫార్మా, హెల్త్‌కేర్ అనుబంధ రంగాల్లో ఆవిష్కరణల కేంద్రంగా హైదరాబాద్ వేగంగా అభివృద్ధి చెందుతోందని సీఎం తెలిపారు. డాక్టర్లు సమాజంలో ఒక ప్రత్యేక స్థానం కలిగిన వర్గమని, ప్రజల ప్రాణాలను కాపాడతారన్న నమ్మకం వారిపై ఉందని గుర్తుచేశారు. వైద్యులు మానవీయతను ఎప్పటికీ మరిచిపోవద్దని సూచించారు.

ప్రజల ఆరోగ్య సంరక్షణకు రాష్ట్ర ప్రభుత్వం అత్యంత ప్రాధాన్యత ఇస్తోందని, పాలసీల రూపకల్పనలో వైద్యుల సూచనలు, సలహాలతో ముందుకు సాగేందుకు ప్రభుత్వం సిద్ధంగా ఉందన్నారు. ఆధునిక సాంకేతికతతో పాటు మానవీయ స్పర్శను కలిపిన వైద్య సేవలే సమాజానికి మేలు చేస్తాయని పేర్కొన్నారు.

ఇటీవల గుండె జబ్బులతో మరణాలు పెరుగుతున్న నేపథ్యంలో గుండె వ్యాధులపై అవగాహన కల్పించడం అత్యవసరమని సీఎం అన్నారు. విద్యార్థులకు సీపీఆర్ శిక్షణ ఇవ్వడం ద్వారా అత్యవసర పరిస్థితుల్లో అనేక ప్రాణాలను కాపాడే అవకాశం ఉందని తెలిపారు.

ఈ కార్యక్రమంలో ఫెలోస్ ఇండియా సదస్సు ఆర్గనైజింగ్ చైర్మన్ డాక్టర్ ఎన్. ప్రతాప్ కుమార్, ఆర్గనైజింగ్ సెక్రటరీ డాక్టర్ ఎ. శరత్ రెడ్డి తదితర ప్రముఖ కార్డియాలజిస్టులు, వైద్య ప్రతినిధులు పాల్గొన్నారు.