ఎఫ్‌పీఓ రైతులకు టిడిఎఫ్–జాతీయ సహజ వ్యవసాయ మిషన్‌పై అవేర్నెస్

సికింద్రాబాద్, డిసెంబర్28 (ప్రజామంటలు):

జాతీయ రైతు దినోత్సవాన్ని పురస్కరించుకుని తెలంగాణ డెవలప్‌మెంట్ ఫోరం (టిడిఎఫ్), బుగ్గ రాజేశ్వర స్వామి రైతు ఉత్పత్తిదారుల సంఘం (ఎఫ్‌పీఓ) మరియు వ్యవసాయ శాఖ సంయుక్త ఆధ్వర్యంలో నారాయణరావుపేట రైతు వేదికలో కార్యక్రమాన్ని ఘనంగా నిర్వహించారు.

ఈ కార్యక్రమంలో తెలంగాణ డెవలప్‌మెంట్ ఫోరం అధ్యక్షులు మట్టా రాజేశ్వర్ రెడ్డి రైతులకు సేంద్రీయ వ్యవసాయం ప్రాధాన్యతపై అవగాహన కల్పించారు. ముఖ్యంగా నేషనల్ నేచురల్ ఫార్మింగ్ మిషన్‌కు సంబంధించిన లక్ష్యాలు, ప్రయోజనాలు, అమలు విధానాలపై రైతులతో విస్తృతంగా చర్చించారు. రసాయనిక ఎరువులు, పురుగుమందులను మోతాదుకు మించి వినియోగించడం వల్ల నేల, నీరు, గాలి కాలుష్యం అవుతాయని, దీని ప్రభావం భవిష్యత్ తరాలపై కూడా పడుతుందని ఆయన హెచ్చరించారు.

రైతులు రసాయన ఎరువులపై ఆధారపడటం వల్ల పెట్టుబడి ఖర్చులు రోజురోజుకీ పెరుగుతున్నాయని, దీనిని అధిగమించాలంటే సుస్థిర వ్యవసాయం వైపు అడుగులు వేయాలని సూచించారు. వ్యవసాయ అధికారుల సలహాలు, సూచనల మేరకు మాత్రమే ఎరువులు వినియోగించాలని, వరి కోత అనంతరం పొట్టేలను తగలబెట్టకుండా వేస్ట్ డీకంపోజర్ ఉపయోగించాలని తెలిపారు. అదేవిధంగా పంటలలో కీటక నియంత్రణ కోసం జిగురు అట్టలు (స్టిక్కీ ట్రాప్స్) వాడటం ద్వారా రసాయనాల వినియోగాన్ని తగ్గించవచ్చని వివరించారు.

ఈ కార్యక్రమంలో వ్యవసాయ విస్తరణ అధికారి వరుణ్, బుగ్గ రాజేశ్వర స్వామి, టిడిఎఫ్ జై కిసాన్ ప్రాంతీయ అధికారి ఐలాపురం అనిల్‌తో పాటు పలువురు రైతులు పాల్గొని తమ సందేహాలను నివృత్తి చేసుకున్నారు. రైతుల సంక్షేమం, స్థిరమైన వ్యవసాయ అభివృద్ధే లక్ష్యంగా ఇలాంటి అవగాహన కార్యక్రమాలు కొనసాగిస్తామని నిర్వాహకులు తెలిపారు.