పాలమూరు–రంగారెడ్డి, కల్వకుర్తి ప్రాజెక్టుల నిర్లక్ష్యంపై కల్వకుంట్ల కవిత ఘాటు విమర్శలు

నాగర్ కర్నూల్, డిసెంబర్ 27 (ప్రజా మంటల):

తెలంగాణ జాగృతి అధ్యక్షురాలు కల్వకుంట్ల కవిత నాగర్ కర్నూల్ జిల్లాలో పర్యటించి పాలమూరు–రంగారెడ్డి, కల్వకుర్తి లిఫ్ట్ ఇరిగేషన్ ప్రాజెక్టుల పరిస్థితిని తీవ్రంగా విమర్శించారు. జాగృతి జనంబాట కార్యక్రమంలో భాగంగా జిల్లాలోని పలు ప్రాంతాలను సందర్శించిన ఆమె, సాగునీటి ప్రాజెక్టుల నిర్వహణలో ప్రభుత్వ వైఫల్యాలను ఎండగట్టారు.

వట్టెం రిజర్వాయర్, ఎల్లూరు పంప్ హౌస్, కల్వకుర్తి లిఫ్ట్ ఇరిగేషన్ స్కీమ్‌లను పరిశీలించిన కవిత, ప్రాజెక్టుల రూపకల్పనలో జరిగిన మార్పులు, నాణ్యతలేని పనులు, అధిక వ్యయాలు, తక్కువ ఫలితాలపై తీవ్ర అసంతృప్తి వ్యక్తం చేశారు. పాలమూరు–రంగారెడ్డి ప్రాజెక్టు సక్రమంగా పూర్తయి ఉంటే నేడు 90 టీఎంసీల నీటి హక్కు రాష్ట్రానికి దక్కేదని, కానీ రాజకీయ నిర్లక్ష్యంతో ఆ అవకాశం కోల్పోయామని విమర్శించారు.

కృష్ణా జలాల వినియోగంలో తెలంగాణకు జరుగుతున్న అన్యాయంపై స్పందించిన కవిత, శ్రీశైలం నుంచి నీటి ఆధారంగా ప్రాజెక్టులు నిర్మించడం వల్ల రాష్ట్రం శాశ్వత జలవివాదాల్లో చిక్కుకుందని పేర్కొన్నారు. పాలమూరు–రంగారెడ్డి ప్రాజెక్టును పూర్తి చేయకుండా వదిలేయడం వల్ల సాగు, త్రాగునీటి సమస్యలు మరింత పెరిగాయని అన్నారు.

వట్టెం రిజర్వాయర్ పరిధిలో 900 ఎకరాల భూమి అక్రమంగా కాంట్రాక్టర్ల చేతుల్లోకి వెళ్లిందని ఆరోపించిన ఆమె, ఆ భూములను రైతులకు తిరిగి ఇవ్వాలని డిమాండ్ చేశారు. అలాగే నల్లమట్టి తవ్వకాలపై, భూముల ఆక్రమణలపై తక్షణ చర్యలు తీసుకోవాలని ప్రభుత్వాన్ని కోరారు.

నాగర్ కర్నూల్ ప్రభుత్వ ఆసుపత్రిని సందర్శించిన కవిత, మౌలిక వసతుల లోపాలు, శుభ్రతా సమస్యలపై ఆందోళన వ్యక్తం చేశారు. నూతనంగా నిర్మించిన భవనాల్లో సిబ్బంది కొరత, శిశు సంరక్షణ విభాగంలో అసౌకర్యాలు ఉన్నాయని తెలిపారు. వెంటనే అవసరమైన చర్యలు తీసుకోవాలని డిమాండ్ చేశారు.

అదే విధంగా నాగర్ కర్నూల్‌లోని సాహితీవేత్త కపిలవాయి లింగమూర్తి నివాసాన్ని సందర్శించి ఆయన సాహిత్య సేవలను గుర్తు చేశారు.

జాగృతి జనంబాటలో భాగంగా జిల్లాలోని నీటి వనరులు, వ్యవసాయం, ఆరోగ్యం, మౌలిక వసతులు, ప్రజల జీవన స్థితిగతులపై సమగ్ర అధ్యయనం చేసి, ప్రజా సమస్యల పరిష్కారానికి ఉద్యమిస్తామని కవిత స్పష్టం చేశారు.