గోర్ బంజారా రెండు వందల ఏళ్ల చరిత్రను నవలరూపంలో ఆవిష్కరించిన ‘పోర్యతార’ – జూపల్లి కృష్ణారావు

హైదరాబాద్, డిసెంబర్ 20 (ప్రజా మంటలు):

గోర్ బంజారా సమాజానికి చెందిన రెండు వందల ఏళ్ల జనజీవన సంఘర్షణ, చరిత్రను తొలిసారిగా నవలరూపంలో తీసుకురావడం శుభపరిణామమని రాష్ట్ర పర్యాటక, సాంస్కృతిక, ఆబ్కారీ, పురావస్తు శాఖ మంత్రి జూపల్లి కృష్ణారావు అన్నారు. రచయిత ఆమ్ గోత్ వెంకట్ పవార్ రచించిన తొలి తెలుగు గోర్ బంజారా చారిత్రక నవల **‘పోర్యతార’**ను శనివారం హైదరాబాద్‌లోని రవీంద్రభారతి ఆవరణలో మంత్రి ఆవిష్కరించారు. ఈ నవలని తెలంగాణ సాహిత్య అకాడమీ ప్రచురించడం ప్రత్యేకతగా నిలిచిందని పేర్కొన్నారు.

ఈ సందర్భంగా మంత్రి మాట్లాడుతూ, విశ్వవ్యాప్తంగా విస్తరించిన గోర్ బంజారాల చరిత్ర గొప్పదని, అనేక యుద్ధాల్లో, దేశవ్యాప్తంగా రహదారుల నిర్మాణంలో వారి పాత్ర అనిర్వచనీయమని తెలిపారు. తీవ్ర కరువుల కాలంలో తెలంగాణ ప్రజలకు ధాన్యాన్ని సరఫరా చేసి ఆకలిని తీర్చిన చరిత్ర ఉన్నప్పటికీ, గోర్ బంజారాల ఘనచరిత్ర లిఖిత రూపంలో లేకపోవడం దురదృష్టకరమని అన్నారు. తరతరాలుగా మౌఖిక కథనాలుగా మాత్రమే మిగిలిపోయిన ఆ చరిత్రను నవల రూపంలో వెలికితీసిన వెంకట్ పవార్ కృషి ప్రశంసనీయమని పేర్కొన్నారు.

గోర్ బంజారాల జీవన విధానం నిరంతర సంఘర్షణతో కూడినదని, వలస బ్రిటిష్ పాలనలోని చట్టాలు, స్థానిక పాలకుల విధానాల వల్ల వృత్తులు కోల్పోయి, కొత్త జీవన మార్గాలను అన్వేషిస్తూ వందల ఏళ్లుగా పోరాట జీవితం గడిపారని తెలిపారు. ఎన్నో కష్టనష్టాలు ఎదురైనా, నీతి, నిజాయితీలనే ఆయుధాలుగా చేసుకుని ముందుకు సాగిన గోర్ బంజారాల జీవితాలను రచయిత మూడు తరాల నేపథ్యంతో కళ్లకు కట్టినట్లు చిత్రీకరించారని మంత్రి అన్నారు.

పాలమూరు జిల్లా కరువు, ఆకలి, వలసలు, పోరాటాలకు ప్రతీకగా నిలిచిన ప్రాంతమని పేర్కొంటూ, ఆ సామాజిక పరిస్థితుల నుంచి పుట్టిన వీరవనిత హీరిబాయి సాహస జీవితాన్ని ‘పోర్యతార’ నవలలో అత్యద్భుతంగా ఆవిష్కరించారని ప్రశంసించారు. తన ధైర్యసాహసాలతో పాలకులను ఎదిరించి, జాతి ప్రజల సమస్యలను దేశస్థాయిలో ప్రస్తావించి అభివృద్ధికి బాటలు వేసిన హీరిబాయి జీవితం ఈ నవలలో ప్రధానంగా నిలుస్తుందని తెలిపారు.

ఆదివాసీ, గిరిజన సమాజాల చరిత్రను ముద్రణలోకి తీసుకువచ్చి తెలంగాణ సాంస్కృతిక, సాహిత్య వారసత్వాన్ని పరిరక్షించాలనే లక్ష్యంతో ప్రజాపాలన ప్రభుత్వం ముందుకు సాగుతోందని మంత్రి స్పష్టం చేశారు. ఆ ప్రయత్నానికి ‘పోర్యతార’ నవల తొలిమెట్టుగా నిలుస్తుందని పేర్కొంటూ, అస్తిత్వ సాహిత్యంలో కొత్త బాట వేసిన రచయిత వెంకట్ పవార్‌ను, ఈ గ్రంథాన్ని ప్రచురించిన తెలంగాణ సాహిత్య అకాడమీని అభినందించారు.

ఈ కార్యక్రమంలో ట్రైకార్ చైర్మన్ డా. తేజావత్ బెల్లయ్య నాయక్, తెలంగాణ సాహిత్య అకాడమీ కార్యదర్శి డా. బాలాచారి, రచయిత ఆమ్ గోత్ వెంకట్ పవార్, తెలంగాణ సాంస్కృతిక సలహా మండలి సభ్యులు ముచ్చర్ల దినకర్, రచయిత సహచరి ఆమ్ గోత్ అనూషాబాయి తదితరులు పాల్గొన్నారు.