కోరుట్ల ఎమ్మెల్యే వ్యాఖ్యలను ఖండించిన జగిత్యాల నేతలు

జగిత్యాల, డిసెంబర్ 18 (ప్రజా మంటలు):

జగిత్యాల ఎమ్మెల్యే క్యాంప్ కార్యాలయంలో నిర్వహించిన ప్రెస్‌మీట్‌లో కోరుట్ల ఎమ్మెల్యే సంజయ్ చేసిన వ్యాఖ్యలను జగిత్యాల నియోజకవర్గ నాయకులు తీవ్రంగా ఖండించారు.

ఈ సందర్భంగా నాయకులు మాట్లాడుతూ, నియోజకవర్గ అభివృద్ధి పనులు కావాలంటే అసెంబ్లీలో మాట్లాడటమే కాకుండా ఉన్నతాధికారులు, మంత్రులతో తరచుగా సమావేశమై ప్రతిపాదనలు తీసుకెళ్లాలని సూచించారు. రాజకీయంగా తొలి సారి ఎమ్మెల్యే అయిన వారు ఈ విషయంపై అవగాహన పెంచుకోవాలని కోరారు.

కోరుట్ల మెడికల్ కాలేజీ అంశంపై కోరుట్ల ఎమ్మెల్యే చేసిన వ్యాఖ్యలు వాస్తవాలకు విరుద్ధమని తెలిపారు. గత ప్రభుత్వ హయాంలో రూ.60 కోట్ల విలువైన పనులకు కేవలం రూ.14 కోట్లు మాత్రమే మంజూరయ్యాయని, కాంగ్రెస్ ప్రభుత్వం వచ్చిన తరువాత జగిత్యాల ఎమ్మెల్యే కృషితో రూ.40 కోట్ల నిధులు మంజూరై మొత్తం రూ.63 కోట్లతో పనులు శరవేగంగా కొనసాగుతున్నాయని వివరించారు. అలాగే రూ.204 కోట్లతో నూతన ఆసుపత్రి మంజూరు జరిగిందని పేర్కొన్నారు.

తెలంగాణ ఉద్యమ కాలంలో జరిగిన రాజకీయ పరిణామాలను గుర్తు చేస్తూ, అప్పటి చర్యలపై ఇప్పుడు భిన్న వ్యాఖ్యలు చేయడం తగదని అన్నారు. రాజకీయ పరిపక్వతతో మాట్లాడాలని కోరారు.

జగిత్యాల నియోజకవర్గంలో ఇటీవల జరిగిన పంచాయతీ ఎన్నికల్లో జగిత్యాల ఎమ్మెల్యే మద్దతుతో దాదాపు 70 మంది సర్పంచ్ అభ్యర్థులు విజయం సాధించారని తెలిపారు. అభివృద్ధి, సంక్షేమ కార్యక్రమాల్లో జగిత్యాల ఎమ్మెల్యే నిరంతరం కృషి చేస్తున్నారని నాయకులు వెల్లడించారు.

కోరుట్ల నియోజకవర్గంలో అభివృద్ధి అంశాలపై ఆరోపణలు చేయడం కన్నా, ప్రజలకు చేసిన సేవలపై చర్చ జరగాలని సూచించారు. జగిత్యాల నియోజకవర్గానికి 15 పల్లె దవాఖానాలు తీసుకువచ్చిన ఘనత జగిత్యాల ఎమ్మెల్యే దేనని పేర్కొన్నారు.

ఈ కార్యక్రమంలో జగిత్యాల నియోజకవర్గ సీనియర్ నాయకులు రవీందర్ రావు, కోల శ్రీనివాస్, బాల ముకుందం, నక్కల రవీందర్ రెడ్డి, అడువల లక్ష్మణ్, సొల్లు సురేందర్, దుమాల రాజ్‌కుమార్, గోడిసెల గంగాధర్, మర్రిపెల్లి శ్రీనివాస్ గౌడ్, ఆరుముల్ల పవన్, ప్రవీణ్ రావు, ఆత్రం బీర్‌సాబ్ తదితరులు పాల్గొన్నారు.