కృష్ణానగర్ కాలనీలో ఐటీ ఉద్యోగి ఆత్మహత్య

సికింద్రాబాద్,నవంబర్ 14 (ప్రజా మంటలు):

గాంధీనగర్ పోలీస్ స్టేషన్ పరిధిలోని కృష్ణానగర్ కాలనీలో చోటుచేసుకున్న విషాద ఘటనలో యువ ఐటీ ఉద్యోగి విశాల్ గౌడ్ (28) ఆత్మహత్యకు పాల్పడ్డాడు. ఈ సంఘటనపై తండ్రి సుర్వి శ్రీనివాస్ గౌడ్ గాంధీనగర్ పోలీసులకు ఫిర్యాదు చేశారు. ఇన్స్పెక్టర్ బోస్ కిరన్ తెలిపిన వివరాల ప్రకారం... కృష్ణానగర్ కాలనీలో నివసించే శ్రీనివాస్ గౌడ్‌కు ఇద్దరు కుమారులు ఉండగా, పెద్ద కొడుకు 12 ఏళ్ల క్రితం మరణించాడు.

చిన్న కుమారుడు విశాల్ గౌడ్ టీసీఎస్‌లో ఉద్యోగం చేస్తూ, 2023 డిసెంబర్‌లో నవ్య అనే యువతితో వివాహం చేసుకున్నాడు. వివాహం తర్వాత దంపతుల మధ్య తరచూ కలహాలు జరిగేవని, పెద్దల సమక్షంలో అనేక సార్లు పరిష్కరించినా మళ్లీ మళ్లీ విభేదాలు తలెత్తాయని ఫిర్యాదులో పేర్కొన్నారు. ఈ ఏడాది మార్చిలో కోడలు తన తల్లిదండ్రుల ఇంటికి వెళ్లి ఇప్పటివరకు తిరిగి రాలేదని ఆయన తెలిపారు.రెండు నెలల క్రితం కోడలు ఇచ్చిన ఫిర్యాదు నేపథ్యంలో ఉప్పల్ పోలీసుల నుంచి విశాల్‌కు కాల్ రావడంతో అతను కౌన్సెలింగ్‌కు హాజరయ్యాడు. అనంతరం కేసు నమోదు అయ్యిందని, స్టేషన్‌కు రమ్మని మరోసారి ఉప్పల్ పోలీసులు ఫోన్ చేశారని తండ్రి వివరించారు. ఈ పరిణామాలతో తీవ్ర ఒత్తిడికి గురైన విశాల్ గత రెండు రోజులుగా డిప్రెషన్‌లోకి వెళ్లాడని తెలిపారు. శుక్రవారం ఉదయం 9 గంటల సమయంలో తన గదిలోకి వెళ్లిన విశాల్ బయటకు రాకపోవడంతో అనుమానం వచ్చిన కుటుంబ సభ్యులు తలుపు పగులగొట్టి చూడగా, అతను సీలింగ్ ఫ్యాన్‌కు ఉరేసుకొని ఉన్నట్లు గమనించారు.

వెంటనే అతన్ని గాంధీ ఆసుపత్రికి తరలించగా, వైద్యులు అప్పటికే మృతి చెందినట్లు ధృవీకరించారు. భార్య నవ్య  దురాలవాట్లు, చేసిన  టార్చర్  తోనే విశాల్ చనిపోయినట్లు కుటుంబసభ్యులు ఆరోపించారు. భర్త అంత్యక్రియలకు భార్య నవ్య గాని ఆమె తరపున ఎవరు రాలేదని వారు పేర్కొన్నారు. ఈ సంఘటనపై పూర్తి విచారణ జరిపి, నిందితులను కఠినంగా శిక్షించాలని వారు డిమాండ్ చేశారు.  ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.
––