నదీ జలాలపై వివాదాలు కాదు.. చర్చల ద్వారానే పరిష్కారం కావాలి: సీఎం రేవంత్ రెడ్డి

మహేశ్వరం  జనవరి 9 (ప్రజా మంటలు):

నదీ జలాల విషయంలో పక్క రాష్ట్రాలతో వివాదాలు కోరుకోవడం లేదని, చర్చలు మరియు పరస్పర సహకారం ద్వారానే సమస్యలను పరిష్కరించుకోవాలని తెలంగాణ ప్రభుత్వం భావిస్తోందని ముఖ్యమంత్రి శ్రీ ఏ. రేవంత్ రెడ్డి స్పష్టం చేశారు. “పంచాయతీ కావాలా.. నీళ్లు కావాలా అని అడిగితే తెలంగాణకు నీళ్లే కావాలి” అని ఆయన వ్యాఖ్యానించారు.

రంగారెడ్డి జిల్లా మహేశ్వరం మండలం రావిర్యాలలోని ఈ-సిటీలో ఏర్పాటు చేసిన సుజెన్ మెడికేర్ (Suzen Medicare) ఐవీ ఫ్లూయిడ్స్ తయారీ యూనిట్‌ను ముఖ్యమంత్రి ప్రారంభించారు. ఈ సందర్భంగా జరిగిన సభలో ఆయన తెలంగాణ నదీ జల వివాదాలు, అభివృద్ధి ప్రణాళికలపై విస్తృతంగా మాట్లాడారు.

నదీ జలాలపై రాజకీయ ప్రయోజనాలు పొందాలనే ఆలోచన తమ ప్రభుత్వానికి లేదని, రాజకీయాలకు అతీతంగా సమస్యలను పరిష్కరించుకోవాలనే ఉద్దేశంతో ముందుకు వెళ్తున్నామని సీఎం తెలిపారు. అభివృద్ధి సాధించాలంటే పక్క రాష్ట్రాల సహకారం, సయోధ్య అవసరమని పేర్కొన్నారు.

కృష్ణా నదిపై ఉమ్మడి రాష్ట్రంలో మంజూరైన ప్రాజెక్టులకు ఎలాంటి అడ్డంకులు సృష్టించవద్దని ఆంధ్రప్రదేశ్ ముఖ్యమంత్రి శ్రీ నారా చంద్రబాబు నాయుడుకు విజ్ఞప్తి చేశారు. పాలమూరు–రంగారెడ్డి, కల్వకుర్తి, డిండి, ఎస్‌ఎల్‌బీసీ, బీమా, నెట్టెంపాడు వంటి ప్రాజెక్టులకు అభ్యంతరాల వల్ల పర్యావరణ, సీడబ్ల్యూసీ అనుమతుల్లో జాప్యం జరుగుతోందని, దీని కారణంగా రాష్ట్రంపై ఆర్థిక భారం పడుతోందని ఆందోళన వ్యక్తం చేశారు.

రాజకీయాల కంటే ప్రజలు, రైతుల ప్రయోజనాలే ముఖ్యమని, పరస్పర సహకారంతోనే సమస్యలకు శాశ్వత పరిష్కారం లభిస్తుందని సీఎం అన్నారు. పోర్టు కనెక్టివిటీ లేని తెలంగాణకు మచిలీపట్నం పోర్టుతో అనుసంధానం కోసం 12 లేన్ల గ్రీన్ ఫీల్డ్ ఎక్స్‌ప్రెస్‌వే, రైల్వే కనెక్టివిటీ అవసరమని, ఇందుకు ఏపీ సహకారం కీలకమని తెలిపారు. అదే విధంగా అమరావతి అభివృద్ధికి తెలంగాణ సహకారం అవసరమవుతుందని పేర్కొన్నారు.

తెలంగాణ సమగ్రాభివృద్ధి లక్ష్యంగా CURE, PURE, RARE విధానాలతో Telangana Rising 2047 Vision Document విడుదల చేశామని, ప్రపంచ నగరాలతో పోటీ పడేలా రాష్ట్రాన్ని అభివృద్ధి చేయడమే లక్ష్యమన్నారు. ఐటీ, ఫార్మా, డేటా సెంటర్లు, గ్లోబల్ కేపబిలిటీ సెంటర్ల రంగాల్లో పెట్టుబడులను ప్రోత్సహిస్తూ నిరుద్యోగ యువతకు ఉపాధి అవకాశాలు కల్పిస్తున్నామని తెలిపారు.

1995 నుంచి 2025 వరకు నిరంతర శ్రమతో హైదరాబాద్ ప్రపంచ నగరాలతో పోటీ పడగల స్థాయికి చేరిందని సీఎం పేర్కొన్నారు. జర్మన్ సాంకేతికతతో దక్షిణ భారతదేశంలోనే ఐవీ ఫ్లూయిడ్స్ తయారీ యూనిట్ ఏర్పాటు చేయడం అభినందనీయమని సుజెన్ మెడికేర్ సంస్థను ప్రశంసించారు.

ఈ కార్యక్రమంలో శాసనసభ స్పీకర్ గడ్డం ప్రసాద్ కుమార్, మంత్రి దుద్దిళ్ల శ్రీధర్ బాబు, ఎంపీ కొండా విశ్వేశ్వరరెడ్డి, శాసనమండలి చీఫ్ విప్ పట్నం మహేందర్ రెడ్డి తదితర ప్రజాప్రతినిధులు పాల్గొన్నారు.