దేశమే ప్రథమం – విభజన భాషకు చోటు లేదు: అండమాన్‌లో మోహన్ భాగవత్ కీలక సందేశం

పోర్ట్ బ్లెయిర్ డిసెంబర్ 13:

జాతీయ స్వయం సేవక్ సంఘ్ (ఆర్ఎస్ఎస్) సర్‌సంఘచాలక్ మోహన్ భాగవత్ దేశభక్తి, జాతీయ ఏకత్వంపై గట్టి సందేశం ఇచ్చారు. దేశాన్ని అన్ని విషయాల కంటే ముందుగా ఉంచాలని, ఇది భారత్ కోసం జీవించే సమయం కానీ చనిపోయే సమయం కాదని స్పష్టం చేశారు. “మన దేశంలో మన దేశ భక్తి మాత్రమే ఉండాలి. ‘తుమ్హారే టుక్డే-టుక్డే హోంగే’ వంటి విభజనాత్మక భాషకు ఇక్కడ చోటు లేదు” అని అన్నారు.

అండమాన్ నికోబార్ దీవుల్లో వీరసావర్కర్ రచించిన ప్రసిద్ధ గీతం ‘సాగర్ ప్రాణ తలమాలా’ 115వ వార్షికోత్సవం సందర్భంగా ఏర్పాటు చేసిన కార్యక్రమంలో భాగవత్ పాల్గొన్నారు. ఈ సందర్భంగా మాట్లాడుతూ, నేటి సమాజంలో చిన్నచిన్న విషయాలపై ఆలోచనా విధానాల తేడాలతో టकरార్లు పెరుగుతున్నాయని ఆందోళన వ్యక్తం చేశారు. ఒక గొప్ప దేశాన్ని నిర్మించాలంటే సావర్కర్ సందేశాన్ని గుర్తుచేసుకోవాల్సిన అవసరం ఉందన్నారు.

సావర్కర్ ఎప్పుడూ తాను మహారాష్ట్రవాడినని గానీ, ఏదైనా కులానికి చెందినవాడినని గానీ చెప్పలేదని, ఆయన ఎల్లప్పుడూ ‘ఒకే జాతి – ఒకే దేశం’ అనే ఆలోచనను బోధించారని భాగవత్ తెలిపారు. మనమంతా భారతీయులమనే భావనతో, దేశాన్ని అన్ని రకాల అంతర్గత విభేదాలకు మించి ఉంచాలని పిలుపునిచ్చారు.

ఈ కార్యక్రమంలో భాగంగా దీవుల సమూహంలోని బియోదనాబాద్‌లో వినాయక్ దామోదర్ సావర్కర్ విగ్రహాన్ని ఆవిష్కరించారు. ఈ కార్యక్రమంలో మోహన్ భాగవత్‌తో పాటు కేంద్ర హోంమంత్రి అమిత్ షా, కేంద్ర మంత్రి ఆశిష్ శేలార్, పద్మశ్రీ హృదయనాథ్ మంగేశ్కర్, నటుడు రణదీప్ హుడా, శరద్ పొంక్షే, చరిత్రకారుడు డా. విక్రమ్ సంపత్ తదితరులు పాల్గొన్నారు.

భాగవత్ శనివారం శ్రీ విజయపురంలో ఉన్న నేతాజీ స్టేడియంలో నిర్వహించనున్న విరాట్ హిందూ సమ్మేళనం సందర్భంగా మధ్యాహ్నం 3.30 గంటలకు ప్రజలనుద్దేశించి ప్రసంగించనున్నారు.

సావర్కర్ ఆశయాలను నెరవేర్చాలంటే స్వార్థాన్ని పక్కనపెట్టి దేశం కోసం పని చేయాలని, ప్రొఫెషనల్‌గా ఎదగండి, సంపాదించండి కానీ దేశాన్ని మర్చిపోవద్దని భాగవత్ పిలుపునిచ్చారు. దేశ నిర్మాణానికి సాధువులవ్వాల్సిన అవసరం లేదని, కానీ దేశాన్ని ఎప్పుడూ ముందుగా ఉంచాల్సిందేనని ఆయన స్పష్టం చేశారు.