యూపీ ఎన్నికలు – యోగి నాయకత్వానికే ఆర్ఎస్ఎస్ ముద్ర: వ్యతిరేక ప్రచారానికి చెక్, బీజేపీలో స్పష్టత

లక్నో డిసెంబర్ 13:

ఉత్తరప్రదేశ్ ఎన్నికల సమీపిస్తున్న నేపథ్యంలో బీజేపీ–ఆర్ఎస్ఎస్ మధ్య జరిగిన కీలక భేటీ రాజకీయ వర్గాల్లో చర్చనీయాంశంగా మారింది. ఆర్ఎస్ఎస్ సర్‌సంఘచాలక్ మోహన్ భగవత్‌తో సమావేశం అనంతరం బీజేపీలో స్పష్టమైన సంకేతాలు వెలువడ్డాయి. యూపీ ఎన్నికలకు సీఎం యోగి ఆదిత్యనాథ్ నాయకత్వంలోనే వెళ్లాలన్నది ఆర్ఎస్ఎస్ స్పష్టమైన సందేశంగా పార్టీ వర్గాలు భావిస్తున్నాయి.

ఈ భేటీలో ప్రధానంగా రెండు అంశాలపై చర్చ జరిగినట్లు సమాచారం. మొదటిది – హిందూ సమాజంలో ఏకత్వాన్ని కాపాడటం. రెండవది – పార్టీ అంతర్గత విభేదాలు, వ్యతిరేక ప్రచారానికి అడ్డుకట్ట వేయడం. యోగి పాలనపై బహిరంగంగా లేదా పరోక్షంగా ప్రశ్నలు లేవనెత్తేవారిని ‘బాగీ’లుగా పరిగణిస్తామని ఆర్ఎస్ఎస్ కఠిన సందేశం ఇచ్చినట్లు తెలుస్తోంది. రాష్ట్రంలో యోగికి వ్యతిరేకంగా ప్రచారం చేస్తే చర్యలు తప్పవన్న సంకేతం కూడా ఇచ్చినట్లు పార్టీ వర్గాలు చెబుతున్నాయి.

ఇటీవల యూపీలో పాలన, అభివృద్ధి, సామాజిక సమీకరణలపై విభిన్న అభిప్రాయాలు వినిపించాయి. యోగిని మార్చాలన్న వర్గాల ఊహాగానాలకు ఈ సమావేశం గట్టి ఎదురుదెబ్బగా మారింది. బీజేపీకి యూపీ రాజకీయాలు కేవలం రాష్ట్ర స్థాయి అంశం మాత్రమే కాకుండా జాతీయ రాజకీయాలకూ కీలకంగా మారాయి. అందుకే ప్రయోగాలు లేకుండా, స్థిరమైన నాయకత్వంతోనే ముందుకెళ్లాలన్నది ఆర్ఎస్ఎస్ అభిప్రాయం.

యోగి ఆదిత్యనాథ్ హిందుత్వ రాజకీయాలు, కఠిన పరిపాలన, లా అండ్ ఆర్డర్ అంశాల్లో పార్టీకి బలంగా నిలిచారు. అదే సమయంలో సామాజిక సమతుల్యత, ఎన్నికల వ్యూహం విషయంలో కూడా పార్టీ ఏకగ్రీవత అవసరమని ఆర్ఎస్ఎస్ సూచించినట్లు తెలుస్తోంది. మొత్తంగా చూస్తే – యూపీ ఎన్నికల్లో యోగి నాయకత్వమే ఫైనల్, అంతర్గత భేదాభిప్రాయాలకు చోటు లేదన్నది ఈ సమావేశం ద్వారా బీజేపీ శ్రేణులకు వెళ్లిన స్పష్టమైన సందేశం.