హైదరాబాద్‌లో సినిమా అవకాశాల పేరిట 9వ తరగతి విద్యార్థినిపై లైంగిక దాడి

హైదరాబాద్, డిసెంబర్ 04 (ప్రజా మంటలు):

సినిమా, సీరియల్ అవకాశాలు ఇస్తామని చెప్పి ఒక 13 ఏళ్ల 9వ తరగతి విద్యార్థినిపై లైంగిక దాడికి పాల్పడిన ఘటన హైదరాబాద్‌ను కుదిపేసింది. ఫిల్మ్‌నగర్ పోలీస్ స్టేషన్ పరిధిలో జరిగిన ఈ షాకింగ్ కేసులో ఇద్దరు సినిమా ఇండస్ట్రీ వ్యక్తులు మరియు బాలిక పెద్దమ్మ అరెస్టయ్యారు.

 నిందితులు:బండి వెంకట శివారెడ్డి – కడపకు చెందిన సినిమా కో-డైరెక్టర్,పెనికెలపాటి అనిల్ – కెమెరామెన్,బాలిక పెద్దమ్మ – నిందితులకు సహకరించిన కారణంగా అరెస్ట్ చేశారు.

13 ఏళ్ల బాలిక తన పెద్దమ్మ ఇంటిలో నివసిస్తూ 9వ తరగతి చదువుతోంది. పెద్దమ్మకు పరిచయస్తులుగా తరచూ ఇంటికి తిరిగివచ్చే ఈ ఇద్దరు ఇండస్ట్రీ వ్యక్తులు బాలికపై కన్నేశారు. సినిమా అవకాశాలు ఇస్తామని పెద్దమ్మను నమ్మించి, ఆమె ద్వారానే బాలికను తమకు దగ్గర చేశారు.

పెద్దమ్మ కూడా వారిద్దరికి ఇండస్ట్రీలో ‘మంచి పలుకుబడి ఉంది’, వారితో చనువుగా ఉంటే ‘సినిమాల్లో అవకాశం వస్తుంది’ అని బాలికను తప్పుదోవ పట్టించింది. ఈ నేపథ్యంలో నిందితులు పలుమార్లు బాలికపై లైంగిక దాడికి పాల్పడ్డారు.

దుర్ఘటన బయట పెట్టిన ఉపాధ్యాయురాలు:

దాడుల నుండి తీవ్ర మనస్తాపానికి గురైన బాలిక ఈ విషయం తన స్కూల్ టీచర్‌కి ధైర్యంగా తెలిపింది. వెంటనే చర్య తీసుకున్న ఉపాధ్యాయురాలు పోలీసులకు సమాచారమిచ్చారు.

ఫిల్మ్‌నగర్ పోలీసులు బాలిక పెద్దమ్మ, కో డైరెక్టర్ శివారెడ్డి, కెమెరామెన్ అనిల్‌పై POCSO చట్టం కింద కేసు నమోదు చేసి అరెస్టు చేశారు. ఈ ఘటన సినిమా రంగంలో అవకాశాల పేరుతో జరుగుతున్న దుర్వినియోగంపై తీవ్ర ఆందోళన కలిగిస్తోంది.