ఆరా (బీహార్) నవంబర్ 02:

బీహార్ అసెంబ్లీ ఎన్నికలకు ముందు జరిగిన బహిరంగ సభలో ప్రధానమంత్రి నరేంద్ర మోదీ కీలక ప్రకటనలు చేశారు. ఆరాలో జరిగిన ఈ భారీ సభలో ఆయన మాట్లాడుతూ, “బీహార్‌ను మేడ్ ఇన్ ఇండియా హబ్‌గా మార్చడమే నా లక్ష్యం. బీహార్ ప్రజలు ఎన్డీఏతో ఉన్నారు” అని స్పష్టం చేశారు.

“ఢిల్లీ లో కూర్చున్నవారికి గాలి దిశ అర్థం కావడం లేదు. బీహార్ ప్రజల మనసు ఎన్డీఏ పట్ల ఉంది. బీహార్ అభివృద్ధి కోసం ఎన్డీఏ ప్రభుత్వం సమగ్ర ప్రణాళికతో ముందుకు సాగుతోంది” అని మోడీ పేర్కొన్నారు.

ప్రధాని మోదీ బీహార్‌లో పరిశ్రమల అభివృద్ధి, ఉద్యోగావకాశాల పెంపుపై దృష్టి సారించామని తెలిపారు. “వచ్చే ఏడాది నాటికి 10 మిలియన్ల (1 కోటి) కొత్త ఉద్యోగాలు సృష్టించడానికి పూర్తి రోడ్‌మ్యాప్ సిద్ధం చేశాం. బీహార్‌లో నూతన పారిశ్రామిక మండలాలను ఏర్పాటు చేయనున్నాం. బీహార్ యువతను దేశ ఆర్థిక వ్యవస్థకు ప్రధాన శక్తిగా తీర్చిదిద్దుతాం” అని ఆయన పేర్కొన్నారు.

అలాగే మోదీ బీహార్‌లోని మౌలిక వసతుల అభివృద్ధి, రోడ్లు, రైలు ప్రాజెక్టులు, విద్య, వైద్య రంగాలలో కేంద్రమంత్రి స్థాయి పథకాలను త్వరలో ప్రారంభిస్తామని తెలిపారు.

బీహార్ ఎన్నికల ప్రచారంలో ఈ సభకు వేలాది మంది హాజరయ్యారు. ఎన్డీఏ అభ్యర్థుల పక్షాన ప్రజలను సమీకరించేందుకు ఈ సభలో బీజేపీ ప్రధాన నాయకులు, జేడీయూ ప్రతినిధులు పాల్గొన్నారు.