హైదరాబాద్‌, అక్టోబర్ 31 (ప్రజా మంటలు):

తెలంగాణ మాజీ క్రికెటర్, కాంగ్రెస్ నేత మహ్మద్ అజహరుద్దీన్ రాష్ట్ర మంత్రిగా ప్రమాణ స్వీకారం చేశారు. రాజ్ భవన్‌లో జరిగిన కార్యక్రమంలో గవర్నర్ జిష్ణు దేవ్ వర్మ ఆయనకు పదవీ ప్రమాణం చేయించారు. ఈ కార్యక్రమానికి ముఖ్యమంత్రి ఎ. రేవంత్ రెడ్డి, మంత్రులు, ప్రజాప్రతినిధులు, పార్టీ నాయకులు హాజరయ్యారు.

కాంగ్రెస్ పార్టీకి విశ్వాసపాత్రుడైన అజహరుద్దీన్‌కు క్రీడా రంగం మరియు యువజన సంక్షేమ శాఖలు అప్పగించే అవకాశం ఉన్నట్లు సమాచారం.
తెలంగాణలో రాజకీయ, క్రీడా రంగాల్లో ఆయనకు ఉన్న ప్రాచుర్యం దృష్ట్యా రేవంత్ ప్రభుత్వం ఈ కీలక నిర్ణయం తీసుకున్నట్లు పార్టీ వర్గాలు చెబుతున్నాయి.

అజహరుద్దీన్ తన రాజకీయ ప్రస్థానంలో మొదటిసారిగా మంత్రిగా అవకాశం దక్కించుకున్నారు. ఈ సందర్భంగా ఆయన మాట్లాడుతూ –

“క్రీడల ద్వారా నేర్చుకున్న క్రమశిక్షణతోనే ప్రజలకు సేవ చేస్తాను. సీఎం రేవంత్ రెడ్డి నాపై ఉంచిన విశ్వాసానికి కృతజ్ఞతలు తెలుపుతున్నాను” అని పేర్కొన్నారు.