హైదరాబాద్‌ సెప్టెంబర్ 24 (ప్రజా మంటలు)

:తెలంగాణలో పెరుగుతున్న ట్రాఫిక్‌ సమస్యలు, రోడ్డు ప్రమాదాలకు సమగ్ర పరిష్కారం చూపే లక్ష్యంతో రాష్ట్ర ప్రభుత్వం ప్రత్యేక వ్యవస్థను ఏర్పాటు చేసింది. **‘తెలంగాణ ట్రాఫిక్‌ మేనేజ్‌మెంట్‌, రోడ్‌ అండ్‌ రైల్‌ సేఫ్టీ బ్యూరో’ (TG-TMARS)**ను ఏర్పాటు చేస్తూ ప్రభుత్వం జీవో 135 జారీ చేసింది. ట్రాఫిక్‌ నిర్వహణను కేవలం చలానాలు విధించడం, జరిమానాలు వసూలు చేయడానికే పరిమితం చేయకుండా శాస్త్రీయ పద్ధతుల్లో నిర్వహించడం ఈ వ్యవస్థ ప్రధాన ఉద్దేశంగా ప్రభుత్వం పేర్కొంది. (National Revealed)

రాష్ట్రవ్యాప్తంగా పర్యవేక్షణ

రాష్ట్ర రోడ్డు భద్రతా మండలి పరిధిలో పనిచేసే ఈ ప్రత్యేక బ్యూరోకు హైదరాబాద్‌ కేంద్రంగా రాష్ట్రవ్యాప్త అధికార పరిధి ఉంటుంది. అదనపు డీజీపీ లేదా ఐజీపీ స్థాయి అధికారి దీనికి నేతృత్వం వహిస్తారు. రాష్ట్రంలోని ట్రాఫిక్‌ పోలీస్‌ స్టేషన్లు, ట్రాఫిక్‌ విభాగాలపై బ్యూరో పర్యవేక్షణ ఉంటుంది. అదే సమయంలో జిల్లాలు, కమిషనరేట్లలో రోజువారీ కార్యాచరణ ఆయా పోలీస్‌ కమిషనర్లు, ఎస్పీల ఆధ్వర్యంలో కొనసాగుతుంది. (National Revealed)

రాష్ట్రంలో 32 వేల కిలోమీటర్లకు పైగా రహదారులు, 1.8 కోట్లకు పైగా వాహనాలు ఉన్న నేపథ్యంలో ట్రాఫిక్‌ నిర్వహణకు సాంకేతికతను విస్తృతంగా వినియోగించనున్నారు. రోడ్డు రవాణాతో పాటు మెట్రో, రైల్వే భద్రతకు సంబంధించిన అంశాలను కూడా ఈ వ్యవస్థ పరిధిలోకి తీసుకువచ్చారు.

ప్రమాదం జరిగిన వెంటనే స్పందన

రోడ్డు ప్రమాదాల్లో తొలి గంట అత్యంత కీలకమైనదిగా పరిగణించే నేపథ్యంలో ప్రతి పోలీస్‌ స్టేషన్‌లో **24 గంటలూ అందుబాటులో ఉండే ‘రోడ్‌ యాక్సిడెంట్‌ రెస్పాన్స్‌ ఆఫీసర్‌’**ను నియమించే ప్రతిపాదన ఉంది. ప్రమాదం జరిగిన వెంటనే క్షతగాత్రులకు ప్రాథమిక సహాయం అందించి, వారిని సాధ్యమైనంత త్వరగా ఆసుపత్రికి తరలించడం వీరి ప్రధాన బాధ్యతగా ఉంటుంది.

అలాగే ఔటర్‌ రింగ్‌ రోడ్డు, 50 కిలోమీటర్లకు పైబడిన హైవేలపై అత్యాధునిక కెమెరాలు, వేగాన్ని గుర్తించే పరికరాలతో హైవే పెట్రోలింగ్‌ యూనిట్లు ఏర్పాటు చేయనున్నారు. ప్రమాదాల నివారణతో పాటు ఉల్లంఘనలను సాంకేతిక ఆధారాలతో గుర్తించడం, ప్రమాద ప్రాంతాలను పర్యవేక్షించడం ఈ యూనిట్ల విధుల్లో భాగం కానుంది. (National Revealed)

జరిమానాల్లో 40 శాతం ట్రాఫిక్‌ నిర్వహణకు

కొత్త వ్యవస్థ కోసం ప్రత్యేకంగా **‘ట్రాఫిక్‌ మేనేజ్‌మెంట్‌ ఫండ్‌’**ను ఏర్పాటు చేశారు. పోలీసుల ద్వారా మోటార్‌ వాహన చట్టాల కింద వసూలయ్యే జరిమానాలు, కాంపౌండింగ్‌ ఫీజుల్లో 40 శాతం ఈ నిధికి మళ్లించే విధానం ప్రతిపాదించారు. ఈ మొత్తాన్ని సిబ్బంది శిక్షణ, అధునాతన సాంకేతిక పరికరాలు, బాడీ-వోర్న్‌, డాష్‌బోర్డ్‌ కెమెరాలు, పెట్రోలింగ్‌ వాహనాలు, హైవే పరికరాలు, అత్యవసర రహదారి పనులకు వినియోగించనున్నారు. (National Revealed)

కొత్త వ్యవస్థలో ప్రత్యేక సాంకేతిక విభాగం, విజిలెన్స్‌–స్టాండర్డ్స్‌–కంప్లయన్స్‌ విభాగం, రాష్ట్ర స్థాయి ట్రాఫిక్‌ శిక్షణ అకాడమీ వంటి ఏర్పాట్లు కూడా ఉన్నాయి. ట్రాఫిక్‌ సిబ్బందికి ఆధునిక ట్రాఫిక్‌ నిర్వహణ, ఇంటెలిజెంట్‌ ట్రాఫిక్‌ సిస్టమ్స్‌, ఎలక్ట్రానిక్‌ ఎన్‌ఫోర్స్‌మెంట్‌, ప్రమాదాల స్పందన, ప్రమాద దర్యాప్తుపై శిక్షణ ఇవ్వనున్నారు. 

ఈ విధానం సమర్థవంతంగా అమలైతే ట్రాఫిక్‌ జరిమానాల వసూళ్లకే పరిమితమైన దృక్పథం నుంచి ప్రమాదాల నివారణ, వేగవంతమైన వైద్య స్పందన, సాంకేతిక ఆధారిత ట్రాఫిక్‌ నిర్వహణ, రహదారి భద్రత వైపు రాష్ట్ర వ్యవస్థను మళ్లించే అవకాశం ఉంటుంది.