హైదరాబాద్, ఆగస్టు 31 (ప్రజా మంటలు):

గురుకుల పాఠశాలలు, వసతి గృహాల్లో ఆహార నాణ్యత, పరిశుభ్రతపై అప్రమత్తంగా ఉండాలని తెలంగాణ రాష్ట్ర మానవ హక్కుల కమిషన్ (టీజీహెచ్‌ఆర్‌సీ) సూచించింది.

బెల్లంపల్లి బీసీ బాలికల గురుకుల పాఠశాలలో విద్యార్థినులు అస్వస్థతకు గురైన ఘటనపై కమిషన్ హెచ్‌ఆర్‌సీ నంబర్ 3034/2026 కింద సుమోటో కేసు నమోదు చేసింది. 2026 జూలై 24న ఆహారం తీసుకున్న అనంతరం అస్వస్థతకు గురైన విద్యార్థినులకు చికిత్స అందించి డిశ్చార్జ్ చేసినట్లు జిల్లా కలెక్టర్ నివేదించారు. వైద్య పరీక్షల్లో ఆహార విషబాధ నిర్ధారణ కాలేదని కమిషన్ తెలిపింది.

వంటగది పరిశుభ్రత, ఆహార నాణ్యత, వంట, నిల్వ, వడ్డింపులో జాగ్రత్తలు తీసుకోవాలని, ఆరోగ్య, పరిశుభ్రత, ఆహార భద్రతా ప్రమాణాలను కచ్చితంగా అమలు చేయాలని జిల్లా కలెక్టర్‌కు సూచించింది.

హైదరాబాద్, జూలై 14: (ప్రజా మంటలు)

యూసుఫ్‌గూడ గార్బేజ్ ట్రాన్స్‌ఫర్ స్టేషన్‌లో పారిశుద్ధ్య కార్మికుడు మీశాల సుధాకర్ మృతి చెందిన ఘటనపై తెలంగాణ మానవ హక్కుల కమిషన్ (టీజీహెచ్‌ఆర్‌సీ) స్వప్రేరణతో నమోదు చేసిన కేసును గ్రేటర్ హైదరాబాద్ మున్సిపల్ కార్పొరేషన్ (జీహెచ్‌ఎంసీ) ఆదేశాల అమలు నేపథ్యంలో ముగించింది.
టీజీహెచ్‌ఆర్‌సీ ఛైర్‌పర్సన్ డా. జస్టిస్ షమీమ్ అక్తర్ అధ్యక్షతన విచారణ జరిపిన కమిషన్, ఈ కేసులో జారీ చేసిన ఆదేశాలను జీహెచ్‌ఎంసీ అమలు చేసినట్లు సమర్పించిన నివేదికను పరిశీలించి, 2026 జూలై 6న కేసును ముగించింది.
జీహెచ్‌ఎంసీ నివేదిక ప్రకారం, మృతుడి కుటుంబానికి రూ.15.50 లక్షల ఎక్స్‌గ్రేషియా అందజేసింది. అలాగే అర్హత నిబంధనలకు లోబడి కుటుంబ సభ్యులకు రెండు ఉద్యోగాలు కల్పించనున్నట్లు తెలిపింది. భవిష్యత్తులో ఇలాంటి ప్రమాదాలు పునరావృతం కాకుండా గార్బేజ్ ట్రాన్స్‌ఫర్ స్టేషన్లలో సమగ్ర భద్రతా చర్యలను అమలు చేసినట్లు నివేదికలో పేర్కొంది.
బాధిత కుటుంబానికి తగిన మానవతా సహాయం అందించడంతో పాటు అవసరమైన నివారణ చర్యలు చేపట్టినందున, ఈ వ్యవహారంలో తదుపరి విచారణ అవసరం లేదని కమిషన్ అభిప్రాయపడుతూ కేసును అధికారికంగా ముగించింది.