హైదరాబాద్, ఆగస్టు 06 (ప్రజా మంటలు):

సామాజిక న్యాయ తెలంగాణ సాధన లక్ష్యంగా టీఆర్ఎస్ నిర్వహించిన **"సామాజిక న్యాయ సంకల్ప సభ"**లో పార్టీ చీఫ్ కల్వకుంట్ల కవిత కీలక ప్రసంగం చేశారు. ఈ సభ దేశంలోని కోట్లాది మంది వెనుకబడిన వర్గాల జీవితాలను మార్చే ఉద్యమానికి నాంది అవుతుందని ఆమె పేర్కొన్నారు.

తాను బీసీల కోసం మాట్లాడితే అగ్రకులంలో పుట్టిన వ్యక్తిగా విమర్శలు ఎదుర్కొంటున్నానని, అయితే "నా పుట్టుక నా చేతిలో లేదు.. కానీ ఎవరి కోసం పనిచేయాలో నిర్ణయించుకోవడం మాత్రం నా చేతిలోనే ఉంది" అంటూ స్పష్టం చేశారు. అన్ని వర్గాలకు సామాజిక న్యాయం జరిగే వరకు తన జీవితాన్ని అంకితం చేస్తానని ప్రకటించారు.

కేంద్ర ప్రభుత్వం వచ్చే బడ్జెట్ సమావేశాల లోపు బీసీ రిజర్వేషన్ బిల్లును ఆమోదించాలని, లేనిపక్షంలో వెయ్యి కార్లతో "ఛలో ఢిల్లీ" కార్యక్రమం చేపడతామని హెచ్చరించారు.

కుల వివక్ష పూర్తిగా అంతం కాలేదని, ఆర్థిక అసమానతలతో పాటు సామాజిక అసమానతలను కూడా నిర్మూలించాల్సిన అవసరం ఉందన్నారు. బీసీలకు చట్టసభల్లో 50 శాతం రిజర్వేషన్లు కల్పించే వరకు దేశవ్యాప్తంగా ఉద్యమాన్ని కొనసాగిస్తామని వెల్లడించారు.

అగ్రవర్ణాల ప్రజాస్వామ్యవాదులు కూడా సామాజిక మార్పులో కీలక పాత్ర పోషించారని గుర్తు చేసిన కవిత, గౌతమ బుద్ధుడు, సాహూ మహారాజ్, విశ్వనాథ్ ప్రతాప్ సింగ్, జయలలిత వంటి నాయకులను ఉదాహరణగా ప్రస్తావించారు.

ఎస్సీ, ఎస్టీ, బీసీ, ముస్లిం, ఆదివాసీ, మహిళలు, ట్రాన్స్‌జెండర్లు, వికలాంగులు సహా అన్ని వర్గాలకు రాజ్యాంగబద్ధమైన హక్కులు, రిజర్వేషన్లు, ఆర్థిక స్వావలంబన కల్పించాలని డిమాండ్ చేశారు. ఎస్సీ, ఎస్టీ బ్యాక్‌లాగ్ పోస్టులను భర్తీ చేయాలని, మహిళలకు డీలిమిటేషన్‌తో సంబంధం లేకుండా 33 శాతం రిజర్వేషన్లు అమలు చేయాలని కోరారు.

సభలో చేసిన ప్రధాన తీర్మానాలు

1.  బీసీలకు చట్టసభల్లో 50% రిజర్వేషన్లు వచ్చే వరకు దేశవ్యాప్తంగా ఉద్యమం.

2.  మహాత్మా జ్యోతిరావు ఫూలే, సావిత్రిబాయి ఫూలే దంపతులకు భారతరత్న ఇవ్వాలి.

3.  ప్రొఫెసర్ జయశంకర్‌కు పద్మవిభూషణ్ ప్రకటించి, ట్యాంక్‌బండ్‌పై విగ్రహం ఏర్పాటు చేయాలి.

4.  ఎస్సీ, ఎస్టీ బ్యాక్‌లాగ్ పోస్టుల భర్తీకి ప్రత్యేక నోటిఫికేషన్ విడుదల చేయాలి.

5.ఆదివాసీలకు అడవులపై సంపూర్ణ హక్కులు కల్పించాలి.

6. మహిళలకు 33% రిజర్వేషన్లు అమలు చేయాలి.

7. ముస్లింలకు రాజ్యాంగబద్ధమైన రిజర్వేషన్లు, వక్ఫ్ బోర్డు చట్టం తీసుకురావాలి.

8. ట్రాన్స్‌జెండర్లు, వికలాంగులకు పూర్తి హక్కులు, సంక్షేమ చర్యలు అమలు చేయాలి.

సరూర్‌నగర్‌లో వేలాది మంది పార్టీ నాయకులతో కలిసి కవిత సామాజిక న్యాయ తెలంగాణ సాధనకు ప్రతిజ్ఞ చేయించారు. ఈ కార్యక్రమానికి సంబంధించిన వీడియోను ఆమె ఎక్స్ (ట్విట్టర్)లో పోస్ట్ చేయగా, #TRS4SocialJustice హ్యాష్‌ట్యాగ్ దేశవ్యాప్తంగా ఇండియా నంబర్-1 ట్రెండింగ్లో నిలిచిందని పార్టీ వర్గాలు తెలిపాయి.

హైదరాబాద్, జూలై 02 (ప్రజా మంటలు):

రాష్ట్రవ్యాప్తంగా తెలంగాణ రక్షణ సేన నాయకులు, టీఆర్ఎస్ నాయకులు, తెలంగాణ ఉద్యమకారులను పోలీసులు ముందస్తుగా అదుపులోకి తీసుకున్నట్లు సమాచారం. ఉప్పల్ అసెంబ్లీ నియోజకవర్గంలో నిర్వహించనున్న భూపోరాటానికి హాజరయ్యే అవకాశమున్న నేపథ్యంలో ఈ చర్యలు చేపట్టినట్లు తెలుస్తోంది.
తెలంగాణ ఉద్యమకారులతో కలిసి భూపోరాటానికి టీఆర్ఎస్ చీఫ్ కల్వకుంట్ల కవిత పిలుపునిచ్చారు. ఈ కార్యక్రమం ఈరోజు ఉదయం 9 గంటల నుంచి సాయంత్రం 5 గంటల వరకు ఉప్పల్ అసెంబ్లీ నియోజకవర్గం పరిధిలో కొనసాగనుంది.

భూపోరాటానికి పెద్ద సంఖ్యలో నాయకులు, కార్యకర్తలు తరలివెళ్లే అవకాశం ఉందన్న సమాచారంతో రాష్ట్రంలోని పలు జిల్లాల్లో పోలీసులు ముందస్తు అరెస్టులు చేపట్టినట్లు సమాచారం. పలువురు తెలంగాణ ఉద్యమకారులు, టీఆర్ఎస్ నాయకులను వారి నివాసాల వద్దనే అదుపులోకి తీసుకున్నట్లు పార్టీ వర్గాలు పేర్కొంటున్నాయి.
ఇదిలా ఉండగా, ఈరోజు ఉదయం 9 గంటలకు ఉప్పల్ నియోజకవర్గంలోని భూపోరాట ప్రాంతానికి టీఆర్ఎస్ చీఫ్ కల్వకుంట్ల కవిత చేరుకుని కార్యక్రమంలో పాల్గొననున్నట్లు పార్టీ వర్గాలు వెల్లడించాయి. భూపోరాటం నేపథ్యంలో ఉప్పల్ పరిసరాల్లో పోలీసులు భారీ భద్రతా ఏర్పాట్లు చేసినట్లు సమాచారం.

 హైదరాబాద్, జూన్ 30 (ప్రజా మంటలు):

తెలంగాణ రక్షణ సేన (టీఆర్ఎస్) రాష్ట్ర నాయకుడు వేణుమాధవ్ బీజేపీపై తీవ్ర విమర్శలు చేశారు. తెలంగాణకు కేంద్ర ప్రభుత్వం వివక్ష చూపుతోందని, బీజేపీ తెలంగాణపై "సవతి తల్లి ప్రేమ" ప్రదర్శిస్తోందని ఆరోపించారు.
కాళేశ్వరం ప్రాజెక్టులో అవినీతి జరిగిందని బీజేపీ నాయకులు పదేపదే ఆరోపిస్తున్నప్పటికీ, ఇప్పటివరకు ఎలాంటి దర్యాప్తు లేదా చర్యలు తీసుకోలేదని ప్రశ్నించారు. రాష్ట్ర ప్రభుత్వం సీబీఐ విచారణ కోరినప్పటికీ నెలలుగా నిర్ణయం తీసుకోకపోవడాన్ని విమర్శించారు.
తెలంగాణకు కేంద్రం అందించిన నిధులు, కల్పించిన ఉద్యోగాలపై శ్వేతపత్రం విడుదల చేయాలని బీజేపీని డిమాండ్ చేశారు. కాజీపేట రైల్వే కోచ్ తయారీ యూనిట్, మామునూర్ విమానాశ్రయం వంటి హామీల అమలుపై కూడా కేంద్రం స్పష్టత ఇవ్వాలని కోరారు.
ఇదిలా ఉండగా, ముషీరాబాద్‌లో పార్టీ జెండా ఆవిష్కరణ సందర్భంగా టీఆర్ఎస్ అధ్యక్షురాలు కల్వకుంట్ల కవిత మాట్లాడుతూ రాష్ట్రంలోని ప్రధాన రాజకీయ పార్టీలపై విమర్శలు చేశారు. తెలంగాణ ఏర్పడిన తర్వాత కూడా పేద, మధ్యతరగతి ప్రజల జీవితాల్లో ఆశించిన మార్పు రాలేదన్నారు.
తమ పార్టీ ప్రధాన లక్ష్యాల్లో కార్పొరేట్ స్థాయి విద్య, వైద్యాన్ని ఉచితంగా అందించడం, యువతకు రూ.2 లక్షల నుంచి రూ.20 కోట్ల వరకు రుణాలు, రైతు సంక్షేమం, సామాజిక న్యాయానికి ప్రాధాన్యం కల్పించడం ఉన్నాయని తెలిపారు.
తెలంగాణ ఉద్యమకారులకు హామీ ఇచ్చిన 250 గజాల స్థలాలను ఇప్పటికీ ఇవ్వలేదని ఆరోపిస్తూ, జూలై 2న ఉప్పల్ భగాయత్‌లో భూపోరాటం నిర్వహిస్తామని ప్రకటించారు.
ముషీరాబాద్‌లో పోస్టర్లు చింపివేస్తున్నారని ఆరోపిస్తూ స్థానిక ఎమ్మెల్యే ముఠా గోపాల్‌కు కవిత హెచ్చరిక చేశారు. "దాదాగిరి, గుండాగిరి చెల్లదు. మాతో పెట్టుకుంటే పుట్టగతులు ఉండవు. మేము తిరగబడితే మీ జెండాలు కనబడవు" అని అన్నారు.
జీహెచ్ఎంసీ ఎన్నికల్లో అన్ని డివిజన్లలో, అలాగే భవిష్యత్ అసెంబ్లీ ఎన్నికల్లో అన్ని స్థానాల్లో టీఆర్ఎస్ పోటీ చేస్తుందని కవిత ప్రకటించారు.

హైదరాబాద్, జూన్ 29 (ప్రజా మంటలు):

ఉద్యోగ నోటిఫికేషన్లు వెంటనే విడుదల చేయాలని, రెండు లక్షల ప్రభుత్వ ఉద్యోగాలను భర్తీ చేయాలని, జాబ్ క్యాలెండర్ అమలు చేయాలని డిమాండ్ చేస్తూ తెలంగాణ రక్షణ సేన చీఫ్ కల్వకుంట్ల కవిత సోమవారం దిల్‌సుఖ్‌నగర్ చౌరస్తాలో నిరుద్యోగులతో కలిసి ధర్నా నిర్వహించారు. ప్రభుత్వం స్పందించే వరకు నిరుద్యోగుల వెన్నంటి ఉంటానని ఆమె ప్రకటించారు.
ధర్నాలో మాట్లాడుతూ, నిరుద్యోగులతో విభేదించిన ఏ ప్రభుత్వం కూడా నిలదొక్కుకోలేదని అన్నారు. ఎన్నికల సమయంలో రెండు లక్షల ఉద్యోగాలు ఇస్తామని హామీ ఇచ్చిన ప్రభుత్వం ఇప్పటివరకు సుమారు 11 వేల ఉద్యోగాలనే భర్తీ చేసిందని విమర్శించారు.
కానిస్టేబుల్ పోస్టుల విషయంలో ప్రభుత్వం గతంలో 19 వేలకుపైగా ఖాళీలు ఉన్నాయని ప్రకటించి, ఇప్పుడు కేవలం 5 వేల పోస్టులకు మాత్రమే నోటిఫికేషన్ ఇవ్వడం అన్యాయమని పేర్కొన్నారు. కనీసం 20 వేల కానిస్టేబుల్ పోస్టులకు నోటిఫికేషన్ విడుదల చేయాలని డిమాండ్ చేశారు.
కానిస్టేబుల్ పోస్టులకు 36 సంవత్సరాలు, ఎస్సై పోస్టులకు 38 సంవత్సరాల వరకు ఏజ్ రిలాక్సేషన్ ఇవ్వాలని కోరారు. గతంలో ఏజ్ రిలాక్సేషన్ ఇచ్చి, ఇప్పుడు కొత్త జీవో ద్వారా దానిని తొలగించడం నిరుద్యోగులను మోసం చేయడమేనని ఆరోపించారు.
తెలంగాణ రాష్ట్ర ఏర్పాటుకు తర్వాత పోలీసు నియామకాలలో మహిళలకు 33 శాతం రిజర్వేషన్ అమలు చేయడంలో తాను కూడా పాత్ర పోషించానని చెప్పారు. ప్రస్తుతం ఉద్యోగాల కోసం శిక్షణ పొందుతున్న మహిళల ఇబ్బందులను ప్రభుత్వం గుర్తించాలని సూచించారు.
మూసీ అభివృద్ధి ప్రాజెక్టుపై కూడా ఆమె విమర్శలు చేశారు. ప్రజలు ఉద్యోగాలు కోరుతుంటే వేల కోట్ల రూపాయలతో మూసీ ప్రాజెక్టును చేపట్టడం కంటే ఉద్యోగాల కల్పనకు ప్రాధాన్యం ఇవ్వాలని అన్నారు. పేదల ఇళ్లను తొలగిస్తూ ప్రాజెక్టు చేపట్టాల్సిన అవసరం ఏమిటని ప్రశ్నించారు.
జులై 2న నిరుద్యోగులు చేపట్టనున్న సచివాలయం ముట్టడి కార్యక్రమానికి అవసరమైతే తమ ఉద్యమకారులు కూడా మద్దతు ఇస్తారని తెలిపారు. నిరుద్యోగులు ఒంటరివారు కాదని, వారికి అన్ని విధాలుగా అండగా ఉంటామని స్పష్టం చేశారు.
చివరగా, ఎన్నికల హామీలను అమలు చేయడంలో ప్రభుత్వం పూర్తిగా విఫలమైందని, ప్రజలను మోసం చేస్తోందని ఆరోపించారు.