జూబ్లీహిల్స్‌లో ఎంఐఎం ఎందుకు పోటీ చేయడంలేదు? 

హైదరాబాద్‌, అక్టోబర్‌ 30 (ప్రజా మంటలు):

జూబ్లీహిల్స్‌ నియోజకవర్గంలో ఎంఐఎం పార్టీ పోటీ చేయకపోవడం వెనుక పెద్ద కుట్ర ఉందని బీజేపీ రాష్ట్ర అధ్యక్షుడు, కేంద్ర మంత్రి జీ. కిషన్‌రెడ్డి తీవ్ర విమర్శలు గుప్పించారు. హైదరాబాద్‌లో జరిగిన మీడియా సమావేశంలో మాట్లాడుతూ, నగరంలో ఉన్న స్లాటర్ హౌస్ మాఫియాతో పోలీసులు చేతులు కలిపారని, దాంతో అక్రమ మాంస వ్యాపారం పెరిగిపోయిందని ఆయన ఆరోపించారు.

కిషన్‌రెడ్డి మాట్లాడుతూ, “హైదరాబాద్‌లోని 39 స్లాటర్ హౌస్‌లపై మేము ప్రభుత్వానికి ఫిర్యాదు చేశాం. కానీ ఇప్పటివరకు ఎలాంటి చర్యలు తీసుకోలేదు. ఈ స్లాటర్ హౌస్‌ల వెనుక ఎంఐఎం నేతలే ఉన్నారు. అక్రమ మాంస వ్యాపారంలో నుంచి వందల కోట్ల రూపాయలు వసూలు చేస్తున్నారు. ఈ మాఫియాను రక్షించడానికే ఎంఐఎం జూబ్లీహిల్స్‌లో పోటీ చేయడం మానేసింది,” అని ఆయన తెలిపారు.

తెలంగాణకు పట్టిన చీడ ఎంఐఎం అని వ్యాఖ్యానించిన కిషన్‌రెడ్డి, “హైదరాబాద్‌ నగరాన్ని అభివృద్ధి చేయాల్సిన వారు మాఫియాలకు తలవంచారు. పోలీసులపై కూడా ఎంఐఎం నేతల ఒత్తిడి కొనసాగుతోంది. దీనిపై ప్రభుత్వం కఠిన చర్యలు తీసుకోవాలి,” అని డిమాండ్‌ చేశారు.

కిషన్‌రెడ్డి ఈ సందర్భంగా ప్రజలను నిజమైన ప్రజా హిత పార్టీని ఎంచుకోవాలని, మాఫియా రాజకీయాలకు తావివ్వకూడదని పిలుపునిచ్చారు.