హైదరాబాద్, జూన్ 13 (ప్రజా మంటలు):

తెలంగాణలో రైతులు పండించిన ధాన్యాన్ని ప్రతి గింజతో సహా ప్రభుత్వం కొనుగోలు చేయాలని తెలంగాణ రక్షణ సేన నాయకులు రూప్ సింగ్ డిమాండ్ చేశారు. కేంద్రం 58 లక్షల మెట్రిక్ టన్నుల ధాన్యం మాత్రమే కొనుగోలు చేస్తామని చెబుతుండగా, రాష్ట్రంలో 70 లక్షల మెట్రిక్ టన్నులకు పైగా ఉత్పత్తి జరిగిందని ఆయన పేర్కొన్నారు.
ఢిల్లీ పర్యటనలో ప్రధాని వద్ద ధాన్యం కొనుగోళ్ల అంశాన్ని సీఎం రేవంత్ రెడ్డి ప్రస్తావించారా అని ప్రశ్నించిన రూప్ సింగ్, పలుమార్లు ఢిల్లీ వెళ్లినా తెలంగాణకు ఎలాంటి ప్రయోజనం చేకూర్చలేదని విమర్శించారు. రైతుల సమస్యలను విస్మరించి పార్టీ అధిష్ఠానానికి కప్పం కట్టే రాజకీయాలు చేస్తే తెలంగాణ రక్షణ సేన ఊరుకోదని హెచ్చరించారు. రైతుల ధాన్యాన్ని పూర్తిగా కొనుగోలు చేయకపోతే రాష్ట్రవ్యాప్తంగా ఉద్యమాలు చేపడతామని తెలిపారు.