హైదరాబాద్, మే 27 (ప్రజా మంటలు):

రేవంత్ రెడ్డి ప్రభుత్వం ప్రజా సమస్యల పరిష్కారంపై దృష్టి పెట్టకుండా సర్వేల పేరుతో కాలయాపన చేస్తోందని తెలంగాణ రక్షణ సేన (టీఆర్ఎస్) రాష్ట్ర నాయకులు విమర్శించారు. బంజారాహిల్స్‌లోని పార్టీ కార్యాలయంలో నిర్వహించిన మీడియా సమావేశంలో రాష్ట్ర నాయకులు సయ్యద్ ఇస్మాయిల్, ఆర్వీఆర్ ప్రసాద్, లోక రవిచంద్ర ప్రభుత్వ పనితీరుపై తీవ్ర వ్యాఖ్యలు చేశారు. ఎన్నికల ముందు ప్రజలకు ఇచ్చిన హామీలు అమలు చేయకుండా ప్రభుత్వం ప్రజలను నిరాశకు గురిచేస్తోందని ఆరోపించారు.
సయ్యద్ ఇస్మాయిల్ మాట్లాడుతూ ప్రభుత్వం ప్రకటించిన ఆరు గ్యారంటీలు అమలులో కనిపించడం లేదని అన్నారు. సంక్షేమ కార్యక్రమాల కంటే సర్వేలపైనే ఎక్కువ దృష్టి పెట్టడం వల్ల ప్రజల్లో అసంతృప్తి పెరుగుతోందని పేర్కొన్నారు. ముఖ్యంగా పెన్షన్ పథకాల అమలులో వృద్ధులు, వితంతులు వంటి లబ్ధిదారులను ఇబ్బందులకు గురిచేయడం సరికాదన్నారు. అర్హులైన వారికి సకాలంలో పెన్షన్ అందించాలని ప్రభుత్వాన్ని కోరారు. వ్యవసాయ రంగ సమస్యల విషయంలో కూడా ప్రభుత్వం స్పందన చూపడం లేదని, కోతుల బెడద వంటి అంశాలపై బాధ్యతాయుత చర్యలు తీసుకోవాల్సిందిగా డిమాండ్ చేశారు.
టీఆర్ఎస్ రాష్ట్ర నాయకులు ఆర్వీఆర్ ప్రసాద్ మాట్లాడుతూ ప్రభుత్వం వృద్ధులను ఓటు బ్యాంకుగా మాత్రమే ఉపయోగించుకుందని విమర్శించారు. పెన్షన్ మొత్తాన్ని రూ.4 వేలకు పెంచుతామని చెప్పి హామీ నిలబెట్టుకోలేదన్నారు. రైతులు ధాన్యం విక్రయంలో తీవ్ర ఇబ్బందులు ఎదుర్కొంటున్నా ప్రభుత్వం స్పందించడం లేదని ఆరోపించారు. రైతులు దళారుల చేతుల్లో పడే పరిస్థితి ఏర్పడిందని పేర్కొన్నారు. వ్యవసాయశాఖ పనితీరుపైనా విమర్శలు చేస్తూ రైతుల సమస్యలపై తక్షణ చర్యలు తీసుకోవాలని కోరారు.
విద్యా రంగానికి సంబంధించిన అంశాలపై లోక రవిచంద్ర మాట్లాడుతూ కేంద్రం తీసుకొస్తున్న జాతీయ నూతన విద్యా విధానం అమలులో స్పష్టత లేకపోవడం వల్ల విద్యార్థులు గందరగోళానికి గురవుతున్నారని అన్నారు. మూడు భాషల విధానాన్ని అమలు చేసే విషయంలో అకస్మాత్తుగా తీసుకుంటున్న నిర్ణయాలు విద్యార్థులపై అదనపు ఒత్తిడి పెంచుతాయని తెలిపారు. ముఖ్యంగా పదో తరగతి పరీక్షలకు సిద్ధమవుతున్న విద్యార్థులపై దీని ప్రభావం ఉంటుందని పేర్కొన్నారు.
తెలంగాణలో ఇంటర్ బోర్డు రద్దు అంశంపై సీఎం చేసిన ప్రకటనలు విద్యా వ్యవస్థలో అనిశ్చితిని పెంచాయని విమర్శించారు. ఒకవైపు రద్దు ప్రకటనలు, మరోవైపు అడ్మిషన్ల నోటిఫికేషన్లు రావడం వల్ల విద్యార్థులు, తల్లిదండ్రులు అయోమయానికి గురయ్యారని అన్నారు. ఫీజు రీయింబర్స్‌మెంట్ బకాయిలు కూడా విద్యార్థుల భవిష్యత్తుపై ప్రభావం చూపుతున్నాయని పేర్కొన్నారు. సుమారు 13 లక్షల మంది విద్యార్థులకు సంబంధించిన వేల కోట్ల రూపాయల బకాయిలు పెండింగ్‌లో ఉండటం వల్ల కాలేజీలు, విద్యార్థులు ఇబ్బందులు పడుతున్నారని చెప్పారు.
ప్రభుత్వం వెంటనే ఫీజు రీయింబర్స్‌మెంట్ బకాయిలు విడుదల చేసి, విద్యా రంగంలో స్పష్టమైన విధానాలు అమలు చేయాలని తెలంగాణ రక్షణ సేన డిమాండ్ చేసింది. అవసరమైతే రాష్ట్రవ్యాప్తంగా ఆందోళన కార్యక్రమాలు చేపడతామని నేతలు హెచ్చరించారు.