కొత్తగూడెం సెప్టెంబర్25:

వివాహేతర సంబంధం వ్యవహారంలో తలెత్తిన వివాదం పోలీస్ స్టేషన్‌లోనే ఇరువర్గాల పరస్పర దాడులకు దారితీసింది. భద్రాద్రి కొత్తగూడెం జిల్లాలోని కొత్తగూడెం పోలీస్ స్టేషన్ పరిధిలో ఈ ఘటన చోటుచేసుకుంది.

మొదట మాటల యుద్ధంగా ప్రారంభమైన వివాదం క్రమంగా ఘర్షణకు దారితీసింది. ఒకరిపై ఒకరు దాడులు చేసుకుంటూ ఇరువర్గాలు పోలీస్ స్టేషన్‌లోకి చేరడంతో అక్కడ కొంతసేపు ఉద్రిక్త పరిస్థితి నెలకొంది. స్టేషన్‌లోనూ ఇరువర్గాలు పరస్పరం దాడులకు పాల్పడ్డాయి.

అదే సమయంలో వినాయక నిమజ్జనం బందోబస్తు విధుల్లో త్రీ టౌన్ పోలీసులు, సిబ్బంది తక్కువగా ఉండటంతో స్టేషన్‌లో జరిగిన ఘర్షణతో హల్‌చల్ నెలకొంది. వివాదానికి సంబంధించిన ఇరువర్గాలకు చెందిన పదుల సంఖ్యలో వ్యక్తులు పోలీస్ స్టేషన్‌కు చేరుకున్నారు.

పరిస్థితిని గమనించిన డ్యూటీలో ఉన్న కానిస్టేబుళ్లు అప్రమత్తమై ఇరువర్గాలను చెదరగొట్టారు. ఘర్షణకు పాల్పడిన కొంతమందిని పోలీసులు అదుపులోకి తీసుకుని విచారణ చేపట్టారు. ఘటనకు సంబంధించిన పూర్తి వివరాలు పోలీసుల విచారణ అనంతరం వెల్లడయ్యే అవకాశం ఉంది.

హైదరాబాద్, ఏప్రిల్ 18 (ప్రజా మంటలు):

కాంగ్రెస్ ప్రభుత్వం ఇచ్చిన హామీల అమలు కోసం “చలో సెక్రటేరియట్”కు వెళ్లిన తెలంగాణ ఉద్యమకారులను పోలీసులు అడ్డుకొని అరెస్ట్ చేశారు. 600 మందికి పైగా కార్యకర్తలను మెహదీపట్నం, నాంపల్లి, పంజాగుట్ట పోలీస్ స్టేషన్లలో నిర్బంధించారు.

ఈ సమాచారం తెలుసుకున్న తెలంగాణ జాగృతి అధ్యక్షురాలు కవిత మెహదీపట్నం పోలీస్ స్టేషన్‌కు చేరుకుని నిర్బంధితులకు సంఘీభావం తెలిపారు. అన్ని స్టేషన్లలో ఉన్న ఉద్యమకారులను విడుదల చేసే వరకు అక్కడి నుంచి వెళ్లబోనని బైఠాయించారు. చివరికి పోలీస్ అధికారులతో చర్చించి అరెస్ట్ చేసిన వారందరినీ విడుదల చేయించారు.

“హామీలు అమలు చేయకపోతే ప్రజల్లో తిరగలేరు”

ఉద్యమకారులకు ఇచ్చిన హామీలు నెరవేర్చకపోతే కాంగ్రెస్ నాయకులు ప్రజల్లో తిరగలేరని కవిత హెచ్చరించారు. భూములు, పెన్షన్లు, ఇండ్లు వంటి హామీలను వెంటనే అమలు చేయాలని డిమాండ్ చేశారు.

“భూములు ఇవ్వకపోతే ఆక్రమించుకుంటాం”
అమరవీరుల కుటుంబాలు, ఉద్యమకారులకు ఇచ్చిన హామీలు అమలు కాకపోవడంపై ఆగ్రహం వ్యక్తం చేస్తూ, ప్రభుత్వం వెంటనే ఇంటి స్థలాలు ఇవ్వకపోతే భూ పోరాటాలు చేస్తామని స్పష్టం చేశారు. ఇప్పటికే జాగృతి ఆధ్వర్యంలో పోరాటాలు ప్రారంభమయ్యాయని తెలిపారు.