కాంగ్రెస్ వీడే పరిస్థితి ఎందుకు వచ్చింది? జీవన్ రెడ్డి షాకింగ్ కామెంట్స్
జగిత్యాల రాజకీయాలు హీట్.. ఎమ్మెల్యేపై మాజీ మంత్రి ఆగ్రహం
కాంగ్రెస్‌లో చిచ్చు పెట్టిందెవరు? జీవన్ రెడ్డి బహిరంగ విమర్శలు

జగిత్యాల మార్చ్ 27 (ప్రజా మంటలు):

జగిత్యాల జిల్లా కేంద్రంలోని ఇందిరా భవన్‌లో మంగళవారం నిర్వహించిన విలేకరుల సమావేశంలో మాజీ మంత్రి తాటిపర్తి జీవన్ రెడ్డి కీలక వ్యాఖ్యలు చేశారు. జగిత్యాల ఎమ్మెల్యే సంజయ్ కుమార్ చర్యల వల్లే కాంగ్రెస్ పార్టీలో అంతర్గత విభేదాలు పెరిగాయని ఆరోపించారు.
తాను కాంగ్రెస్ పార్టీని విడిచిపోవాలని కోరుకోవడం లేదని స్పష్టం చేసిన జీవన్ రెడ్డి, నాలుగు దశాబ్దాల అనుబంధాన్ని ఎవ్వరూ సులభంగా వదులుకోరని అన్నారు. అయితే పార్టీని వీడే పరిస్థితి రావడానికి ప్రధాన కారణం సంజయ్ కుమార్ జోక్యమేనని పేర్కొన్నారు.
ఎమ్మెల్యేలు ప్రభుత్వంతో కలిసి పనిచేయడం సహజమని, కానీ కాంగ్రెస్ పార్టీ అంతర్గత వ్యవహారాల్లో జోక్యం చేసుకోవడం అనైతికమని విమర్శించారు. గతంలో తాను కూడా కేసీఆర్‌తో కలిసి పనిచేశానని, ప్రాంత అభివృద్ధి కోసం కృషి చేశానని గుర్తుచేశారు.
మున్సిపల్ ఎన్నికల్లో కాంగ్రెస్ కార్యకర్తలకు న్యాయం జరగలేదని, సంజయ్ జోక్యం వల్లే పార్టీ బలహీనపడిందని ఆరోపించారు. జగిత్యాలలో గతంలో కాంగ్రెస్ పార్టీ బలంగా ఉన్నదని, 2019 మినహా అన్ని ఎన్నికల్లో విజయం సాధించిందని తెలిపారు.
రైతులు, కార్మికులు, మహిళల హక్కుల కోసం తాను ఎప్పటికీ పోరాటం కొనసాగిస్తానని చెప్పారు. అక్రమ నిర్మాణాల తొలగింపు, పెట్రోల్ బంక్ ఆక్రమణలపై చర్యలు తీసుకోవాలని డిమాండ్ చేశారు.
రాజకీయాల్లో గౌరవం ముఖ్యమని, అవమానాన్ని భరించడం సాధ్యం కాదని స్పష్టం చేశారు. పార్టీ లోపలి సమస్యల పరిష్కారం కోసం అధిష్టానం కూడా బాధ్యత వహించాల్సిన అవసరం ఉందన్నారు.
తాను ఇప్పటికీ కాంగ్రెస్‌లోనే ఉన్నానని, పార్టీని బలోపేతం చేయడమే తన లక్ష్యమని చెప్పారు. పార్టీకి దూరంగా ఉండే కొంతమంది ఎమ్మెల్యేలను వేరుచేయాలని సూచించారు.