హైదరాబాద్, మార్చి 01 (ప్రజా మంటలు):

ముఖ్యమంత్రి ప్రజావాణి రాష్ట్ర ప్రజలకు విశ్వసనీయమైన సమస్యల పరిష్కార వేదికగా నిలుస్తోంది. ప్రజా సమస్యలు వేగంగా పరిష్కారమవుతున్న నేపథ్యంలో రాష్ట్ర నలుమూలల నుంచి ప్రజలు పెద్ద ఎత్తున హైదరాబాద్లోని మహాత్మా జ్యోతిబా ఫూలే ప్రజా భవన్కు తరలివస్తున్నారు.
రెండేళ్ల ఒక నెల క్రితం ప్రారంభమైన సీఎం ప్రజావాణి, ప్రతి వారం మంగళవారం మరియు శుక్రవారం నిర్వహించబడుతూ ఇప్పటివరకు 24 సెషన్లు పూర్తి చేసుకుంది.
దరఖాస్తులు – పరిష్కార వివరాలు

రెండేళ్ల కాలంలో సీఎం ప్రజావాణికి మొత్తం 1,12,245 దరఖాస్తులు నమోదు కాగా, వాటిలో 64,558 దరఖాస్తులు పరిశీలనకు తీసుకున్నారు. ఇందులో 47,935 దరఖాస్తులు పూర్తిగా పరిష్కరించగా, మిగిలిన 47,687 దరఖాస్తులు ప్రభుత్వ విధాన నిర్ణయాలు, పథకాలకు సంబంధించినవి, ఉద్యోగాలకు సంబంధించిన అంశాలు కావడంతో సంబంధిత శాఖలకు సిఫార్సు చేశారు.
దీంతో సీఎం ప్రజావాణి 74 శాతం పరిష్కార శాతం నమోదు చేసింది. ఈ స్థాయి సక్సెస్ రేటుతో ప్రజల్లో సీఎం ప్రజావాణిపై మరింత భరోసా పెరిగింది. ప్రస్తుతం ప్రతి వారం సగటున వెయ్యి దరఖాస్తులు నమోదు అవుతున్నాయి.

డాక్టర్ జీ. చిన్నారెడ్డి కీలక పాత్ర
రాష్ట్ర ప్రణాళికా సంఘం వైస్ చైర్మన్ డాక్టర్ జీ. చిన్నారెడ్డి సీఎం ప్రజావాణి ఇంచార్జిగా బాధ్యతలు చేపట్టి రెండేళ్లు పూర్తయ్యాయి. ఆయన స్వయంగా ప్రజల నుంచి దరఖాస్తులు స్వీకరించి, ఓపికగా సమస్యలు విని, సంబంధిత అధికారులతో నేరుగా ఫోన్‌లో మాట్లాడి పరిష్కారానికి చర్యలు తీసుకుంటున్నారు. ప్రతి దరఖాస్తుపై ఎండార్స్‌మెంట్ చేసి స్వయంగా స్టాంప్ వేయడం ప్రజల్లో విశ్వాసాన్ని పెంచుతోంది.
అలాగే అన్ని దరఖాస్తులను ఆన్లైన్ ద్వారా సంబంధిత శాఖలకు పంపడం వల్ల సమస్యలు వేగంగా పరిష్కారమవుతున్నాయి.

ప్రవాసి ప్రజావాణి ప్రత్యేక కేంద్రం
గల్ఫ్‌లోని ఏడు దేశాలు సహా ఇతర దేశాల్లో నివసిస్తున్న తెలంగాణ ప్రజల సమస్యల పరిష్కారం కోసం ఈ ప్రాంగణంలో ప్రవాసి ప్రజావాణి కేంద్రంను కూడా ప్రత్యేకంగా ఏర్పాటు చేశారు.

ప్రజలకు కల్పిస్తున్న సౌకర్యాలు
సీఎం ప్రజావాణిలో ప్రజలకు అనేక వసతులు అందుబాటులో ఉన్నాయి.
దరఖాస్తులు రాయడానికి హెల్ప్‌డెస్క్
ప్రతి శాఖ అధికారులతో ప్రత్యేక డెస్కులు
వైద్య సహాయం కోసం మెడికల్ క్యాంపు
వృద్ధులు, దివ్యాంగుల కోసం బ్యాటరీ బగ్గీలు, వీల్‌చైర్లు
అత్యవసర వైద్య సేవల కోసం అంబులెన్స్
తాగునీటి సౌకర్యం
జీహెచ్‌ఎంసీ ఆర్థిక సహకారంతో హరే కృష్ణ ఫౌండేషన్ ద్వారా ఐదు రూపాయల భోజనం

దివ్య దేవరాజన్ సేవలు
సీఎం ప్రజావాణి స్టేట్ నోడల్ అధికారి, **సెర్ప్ సీఈవో దివ్య దేవరాజన్ కూడా ప్రజా సమస్యల పరిష్కారంలో కీలక పాత్ర పోషిస్తూ ఎంతో ఓపికతో సేవలందిస్తున్నారు.

పరిష్కారమవుతున్న ముఖ్య సమస్యలు
పట్టాదారు పాసు పుస్తకాల సమస్యలు
పబ్లిక్ సర్వీస్ కమిషన్ గ్రూప్ పరీక్షలు
వైద్య, ఆరోగ్య శాఖ నియామకాలు
పోలీస్ రిక్రూట్‌మెంట్ జాప్యాలు
రైతుల వ్యవసాయ సమస్యలు
విద్యుత్, రేషన్ కార్డులు, పెన్షన్లు
ఇందిరమ్మ ఇళ్లు, డబుల్ బెడ్‌రూమ్ ఇళ్లు
**ఆర్టీసీ కార్మికుల సమస్యలు
గల్ఫ్ కార్మికుల సమస్యలు
సీఎం ప్రజావాణి విజయాన్ని ఇతర రాష్ట్రాలకు చెందిన ట్రైనీ ఐఏఎస్, గ్రూప్–1 అధికారులు కూడా పరిశీలించారు.

భవిష్యత్ లక్ష్యం
సీఎం ప్రజావాణి కార్యక్రమం విజయవంతంగా కొనసాగడంలో డాక్టర్ జీ. చిన్నారెడ్డి, దివ్య దేవరాజన్ ప్రత్యేక శ్రద్ధ వహిస్తున్నారని అధికారులు తెలిపారు. రానున్న రోజుల్లో పరిష్కార శాతాన్ని మరింత పెంచేందుకు అన్ని చర్యలు తీసుకుంటామని చిన్నారెడ్డి వెల్లడించారు.