వేములవాడ, మార్చి 01 (ప్రజా మంటలు):

సోషల్ మీడియాను వేదికగా చేసుకుని యువతీ–మహిళలను మోసం చేస్తున్న ఘటనలు రోజురోజుకీ పెరుగుతున్నాయి. తాజాగా వేములవాడలో చోటు చేసుకున్న ఘటన స్థానికంగా కలకలం రేపింది.
లాడ్జిలో మహిళ నగలు, నగదుతో ప్రియుడు పరార్
జగిత్యాల జిల్లా ధర్మపురి పట్టణానికి చెందిన ఒక మహిళకు విజయవాడకు చెందిన వంశీ అనే వ్యక్తి ఇన్‌స్టాగ్రామ్ ద్వారా పరిచయమయ్యాడు. పెళ్లి చేసుకుంటానని నమ్మబలికిన వంశీ, ఆమెను వేములవాడకు రప్పించాడు.

ఇద్దరూ కలిసి స్థానిక మహేశ్వరి పరమేశ్వర లాడ్జిలో గది అద్దెకు తీసుకున్నారు. ఈ క్రమంలో బాధితురాలు బాత్రూమ్‌కు వెళ్లిన సమయంలో అవకాశాన్ని అందిపుచ్చుకున్న వంశీ, ఆమె బ్యాగులో ఉన్న మూడు తులాల బంగారు గొలుసుతో పాటు రూ.10,000 నగదు దొంగిలించి అక్కడి నుంచి పరారయ్యాడు.
పోలీసులకు ఫిర్యాదు.. కేసు నమోదు
తాను మోసపోయినట్లు గ్రహించిన బాధితురాలు వెంటనే వేములవాడ టౌన్ పోలీస్ స్టేషన్ను ఆశ్రయించగా, ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు.
లాడ్జి యజమానిపై కూడా కేసు దర్యాప్తులో లాడ్జి నిర్వాహకుల నిర్లక్ష్యం స్పష్టంగా బయటపడింది.

అతిథుల ఆధార్ కార్డు లేదా గుర్తింపు పత్రాలు తీసుకోకపోవడం,
రిజిస్టర్‌ను సక్రమంగా నిర్వహించకపోవడం, భద్రతా నిబంధనలు పాటించకపోవడం వంటి కారణాలతో లాడ్జి యజమానిపై కూడా పోలీసులు కేసు నమోదు చేశారు.

సీఐ హెచ్చరిక
ఈ సందర్భంగా వీరా ప్రసాద్, వేములవాడ పట్టణ సీఐ స్పందిస్తూ —
పట్టణంలోని అన్ని లాడ్జిలు, గెస్ట్ హౌస్ నిర్వాహకులు ప్రభుత్వ నిబంధనలను కచ్చితంగా పాటించాలని ఆదేశించారు.
గదులు ఇచ్చే ముందు గుర్తింపు కార్డులు తప్పనిసరిగా తీసుకోవాలని, రిజిస్టర్లు సక్రమంగా నిర్వహించాలని సూచించారు.
ప్రతి లాడ్జిలో సీసీ కెమెరాలు పనిచేసేలా చూడాలని, అనుమానాస్పద వ్యక్తులు కనిపిస్తే వెంటనే పోలీసులకు సమాచారం ఇవ్వాలని కోరారు.
నిబంధనలు అతిక్రమిస్తే కఠిన చట్టపరమైన చర్యలు తప్పవని హెచ్చరించారు.