(అంకం భూమయ్య)

 జగిత్యాల ఫిబ్రవరి 15 (ప్రజా మంటలు):

జగిత్యాల పట్టణంలో పట్టపగలు జరిగిన హత్య కలకలం రేపింది. జగిత్యాల బైపాస్ రోడ్డులోని కరీంనగర్ డైరీ ఎదుట ఈ ఘటన చోటుచేసుకుంది.

జగిత్యాల రూరల్ మండలానికి చెందిన ఓ మహిళతో సహజీవనం చేస్తున్న విశ్వనాథ్ అనే వ్యక్తిని గుర్తు తెలియని వ్యక్తులు నడిరోడ్డుపై అత్యంత దారుణంగా హత్య చేసినట్లు సమాచారం. స్థానికులు తెలిపిన వివరాల ప్రకారం, దాడి చేసిన వారు ముందుగా ప్రణాళిక ప్రకారం వచ్చి దారుణంగా దాడి చేసి అక్కడి నుంచి పరారైనట్లు తెలుస్తోంది.

ఈ ఘటన వెనుక వివాహేతర సంబంధమే కారణమై ఉండవచ్చని పోలీసులు అనుమానిస్తున్నారు. సహజీవనం చేస్తున్న మహిళ భర్తే విశ్వనాథ్‌ను హత్య చేసినట్లు అనుమానాలు వ్యక్తమవుతున్నాయి.

సమాచారం అందుకున్న పోలీసులు ఘటనాస్థలికి చేరుకుని కేసు నమోదు చేసి దర్యాప్తు చేపట్టారు. మృతదేహాన్ని పోస్టుమార్టం నిమిత్తం ఆసుపత్రికి తరలించారు. పూర్తి వివరాలు తెలియాల్సి ఉంది.