అప్పంపల్లి, (దేవరకద్ర) అక్టోబర్ 28 (ప్రజా మంటలు):

తెలంగాణ జాగృతి అధ్యక్షురాలు కల్వకుంట్ల కవిత దేవరకద్ర మండలం అప్పంపల్లి గ్రామంలో తెలంగాణ సాయుధ రైతాంగ పోరాట యోధులకు నివాళులర్పించారు. గ్రామంలో ఉన్న పోరాట యోధుల స్థూపం వద్ద పూలమాల వేసి, అమరవీరుల కుటుంబ సభ్యులను కలుసుకున్నారు.

కవిత మాట్లాడుతూ –“ఉద్యమ సమయంలో ఇక్కడికి వచ్చిన జ్ఞాపకం ఉంది. ఆ సమయంలో తెలంగాణ ప్రజల కోసం ప్రాణాలు అర్పించిన వీరుల స్ఫూర్తితో తెలంగాణను సాధించాం. ఇప్పుడు కూడా ఆ స్ఫూర్తితోనే తెలంగాణను అభివృద్ధి చేయాలి,” అని చెప్పారు.

“గత పది ఏళ్లలో చాలా మంచి పనులు జరిగాయి. కానీ ఇంకా చేయాల్సింది చాలా ఉంది. 1948లో దొరల, నిజాం ప్రభువుల అరాచకాలకు వ్యతిరేకంగా ఈ ప్రాంత ప్రజలు ధైర్యంగా పోరాడారు. ఇప్పుడు కూడా మన హక్కుల కోసం అందరం కలిసిపోవాలి,” అన్నారు.

“1948, 1969, మలిదశ తెలంగాణ ఉద్యమాల్లో ప్రాణాలు అర్పించిన కుటుంబాలకు ప్రభుత్వం సాయం చేయాల్సి ఉంది. కానీ చాలా మందికి అది అందలేదు. వారికి సహాయం అందేంత వరకు నేను కృషి చేస్తాను,” అన్నారు.

“తెలంగాణలో ఇలాంటి పోరాట స్థూపాలు చాలా ఉన్నాయి. వాటిని కాపాడాలి, అమరవీరుల కుటుంబాలను గౌరవించాలి. మహబూబ్‌నగర్ జిల్లాలో ఇంకా కొంతమంది పోరాట యోధులు ఉన్నారు. వారి అనుభవాలను యువతకు చేరవేయడానికి ప్రయత్నిస్తాను,” అని చెప్పారు.

“జనంబాట కార్యక్రమం కింద రెండు రోజులు మహబూబ్‌నగర్ జిల్లాలో పర్యటిస్తాను. అమరవీరుల కుటుంబాలను కలుస్తాను. రేపు మేధావులతో చర్చలు జరిపి, పోరాట యోధుల కుటుంబాలకు ఎలా సహాయం చేయాలన్న దానిపై నిర్ణయం తీసుకుంటాం,” అని తెలిపారు.

చివరిగా కవిత, “తెలంగాణ కోసం పోరాడిన వారందరినీ ఒకే వేదికపైకి తీసుకురావడానికి ప్రయత్నిస్తున్నాం. ఈ కార్యక్రమానికి మీ అందరి ఆశీర్వాదం కావాలి,” అని పేర్కొన్నారు..